Bakong totoo: Dai nagseselebrar an mga Saksi ni Jehova kan Pasko nin Pagkabuhay o Easter dahil bako sindang mga Kristiyano.

 Totoo: Nagtutubod kami na si Jesu-Cristo an satong Paraligtas, asin ginigibo mi an pinakamakakaya mi tanganing ‘sundan na marhay an saiyang mga lakad.’—1 Pedro 2:21; Lucas 2:11.

Bakong totoo: Dai kamo nagtutubod na si Jesus binuhay liwat hali sa mga gadan.

 Totoo: Nagtutubod kami na binuhay liwat si Jesus; ibinibilang mi iyan na mahalagang marhay sa Kristiyanong pagtubod asin idinuduon mi iyan sa samong paghuhulit.—1 Corinto 15:3, 4, 12-15.

Bakong totoo: Dai kamong pakiaram kun dai lamang mamati kan saindong mga aki an kaugmahan sa pagselebrar kan Easter.

 Totoo: Namumutan mi an samong mga aki—ginigibo mi an gabos para sanayon sinda asin tabangan na magin maugma.—Tito 2:4.

•   Bakong basado sa Bibliya an pagselebrar kan Pasko nin Pagkabuhay o Easter.

•   Ipinagbuot ni Jesus na girumdumon ta an saiyang kagadanan, bako an saiyang pagkabuhay liwat. Taon-taon, ginigirumdom mi an Memoryal na ini sa eksaktong petsa kan anibersaryo kan saiyang kagadanan sigun sa kalendaryong lunar kan Bibliya.—Lucas 22:19, 20.

•   Nagtutubod kami na bakong akseptable sa Diyos an Easter dahil an mga kaugalian diyan hali sa suanoy na mga ritwal sa pangangaki. Hinahagad sa sato kan Diyos an satong “eksklusibong debosyon,” asin nakukulgan siya pag sinasamba siya kan mga tawo sa paaging dai niya inuuyunan.—Exodo 20:5; 1 Hadi 18:21.

 Nagtutubod kami na an samong desisyon na dai magselebrar nin Easter basado nanggad sa Bibliya, na nagdadagka sa sato na gamiton an “praktikal na kadunungan asin kakayahan na mag-isip” imbes na basta sana sunudon an mga tradisyon nin tawo. (Talinhaga 3:21; Mateo 15:3) Sinasabi mi sa iba an mga paniniwala mi manungod sa Easter pag hinahapot kami, pero irinerespeto mi man an deretso kan kada saro na magdesisyon kun ano an gigibuhon niya.—1 Pedro 3:15.