Bilang mga Saksi ni Jehova, hinihinguwa ming maisagibo an klase nin Kristiyanismo na itinukdo ni Jesus, na iyo man an sinunod kaidto kan mga apostol. Sinumaryo sa artikulong ini an panginot na mga tinutubod mi:

1.   Diyos. An sinasamba mi iyo an Diyos na Makakamhan sa Gabos, an solamenteng tunay na Diyos, an Kaglalang, na an pangaran Jehova. (Salmo 83:18; Kapahayagan 4:11) Siya an Diyos ni Abraham, ni Moises, asin ni Jesus.​—Exodo 3:6; 32:11; Juan 20:17.

2.   Bibliya. Naniniwala kami na an Bibliya ipinasabong na mensahe nin Diyos para sa mga tawo. (Juan 17:17; 2 Timoteo 3:16) An samong mga tinutubod nakabasar sa gabos na 66 na libro kaiyan, kaiba an “Lumang Tipan” saka an “Bagong Tipan.” Angay nanggad an pagkakapaliwanag ni Propesor Jason D. BeDuhn kan isurat niya na ibinabasar kan mga Saksi ni Jehova an “saindang mga tinutubod asin paagi nin pamumuhay sa mismong Bibliya, na dai naggigibo nin sadiring ideya dapit sa mababasa diyan.” a

   Nagtutubod kami sa gabos na sinasabi kan Bibliya, pero bako kaming mga pundamentalista. Aram mi na may mga parte sa Bibliya na isinurat sa piguratibo o simbolikong tataramon asin dai dapat sabuton nin literal.​—Kapahayagan 1:1.

3.   Jesus. Sinusunod mi an mga itinukdo ni Jesu-Cristo asin an halimbawa niya. Iginagalang mi man siya bilang an satuyang Paraligtas asin an Aki nin Diyos. (Mateo 20:28; Gibo 5:31) Kaya, mga Kristiyano kami. (Gibo 11:26) Pero nanudan mi sa Bibliya na bako si Jesus an Diyos na Makakamhan sa Gabos saka dai itinutukdo kan Bibliya an doktrina nin Trinidad.​—Juan 14:28.

4.   An Kahadian nin Diyos. Saro ining totoong gobyerno na nasa langit, bakong basta nasa puso lang kan mga Kristiyano. Iyan an maribay sa mga gobyerno nin tawo asin uutubon kaiyan an katuyuhan nin Diyos para sa daga. (Daniel 2:44; Mateo 6:9, 10) Madali na iyan na maghiro, huling ipinapahiling kan propesiya sa Bibliya na nabubuhay na kita sa “huring mga aldaw.”​—2 Timoteo 3:1-5; Mateo 24:3-14.

   Si Jesus an Hadi sa Kahadian nin Diyos sa langit. Nagpuon siyang maghadi kan 1914.​—Kapahayagan 11:15.

5.   Kaligtasan. Nagin posible na mailigtas kita sa kasalan asin kagadanan paagi sa atang na pantubos ni Jesus. (Mateo 20:28; Gibo 4:12) Tanganing makinabang sa pantubos na iyan, dai sana dapat magtubod ki Jesus an mga tawo kundi dapat man sindang gumibo nin pagbabago asin magpabawtismo. (Mateo 28:19, 20; Juan 3:16; Gibo 3:19, 20) Mahihiling sa gibo nin sarong tawo kun baga buhay an pagtubod niya. (Santiago 2:24, 26) Pero, dai nakadepende sa satong paghihinguwa an satong kaligtasan—kundi paagi sa “daing kapantay na kabuutan nin Diyos.”​—Galacia 2:16, 21.

6.   Langit. An Diyos na Jehova, si Jesu-Cristo, pati an maimbod na mga anghel nakaistar sa langit. b (Salmo 103:19-21; Gibo 7:55) Igwa man nin sadit na grupo nin mga tawo​—144,000 gabos​—na bubuhayon liwat tanganing mamahala sa Kahadian duman sa langit kaiba ni Jesus.​—Daniel 7:27; 2 Timoteo 2:12; Kapahayagan 5:9, 10; 14:1, 3.

7.   Daga. Ginibo nin Diyos an daga para magin istaran nin mga tawo sagkod lamang. (Salmo 104:5; 115:16; Parahulit 1:4) Bebendisyunan nin Diyos an masinunod na mga tawo asin tatawan sindang perpektong hawak asin buhay na daing katapusan sa paraiso digdi sa daga.​—Salmo 37:11, 34.

8.   Karatan asin pagsakit. Nagpuon ini kan magrebelde an saro sa mga anghel nin Diyos. (Juan 8:44) An anghel na ini, na pakatapos kan saiyang pagrebelde inapod na “Satanas” asin “Diyablo,” inengganyar an inot na tawong mag-agom na mag-iba saiya, na nagresulta nin kapahamakan sa mga aki ninda. (Genesis 3:1-6; Roma 5:12) Tanganing maresolberan an isyu na ibinangon ni Satanas dapit sa moral, tinugutan nin Diyos na maeksperyensiyahan nin mga tawo an karatan asin pagsakit, pero dai Niya iyan tutugutan na magpadagos sagkod lamang.

9.   Kagadanan. An mga tawong nagadan mayo na, dai na nabubuhay. (Salmo 146:4; Parahulit 9:5, 10) Dai sinda nagsasakit sa nagkakalayong impiyerno.

   Babawion nin Diyos sa kagadanan an binilyon na tawo paagi sa pagkabuhay liwat. (Gibo 24:15) Pero idtong mga habong makanuod kan mga pamantayan nin Diyos pagkatapos buhayon liwat permanente nang paparaon asin dai nang paglaom na mabuhay giraray.​—Kapahayagan 20:14, 15.

10.   Pamilya. Sinusunod mi an orihinal na pamantayan nin Diyos para sa pag-agom, na iyan pag-ibanan nin sarong lalaki asin sarong babayi, na an solamenteng balidong dahilan sa pagdiborsiyo iyo an seksuwal na imoralidad. (Mateo 19:4-9) Kumbinsido kami na an kadunungan na yaon sa Bibliya nakakatabang para magkaigwa nin maugmang pamilya.​—Efeso 5:22–6:1.

11.   Pagsamba. Dai mi sinasamba an krus o ano man na imahen. (Deuteronomio 4:15-19; 1 Juan 5:21) An pinakapanginot na parte kan samong pagsamba iyo an minasunod:

    •   Pamimibi sa Diyos.​—Filipos 4:6.

    •   Pagbasa asin pag-adal kan Bibliya.​—Salmo 1:1-3.

    •   Paghurop-hurop kan samong mga nanunudan sa Bibliya.​—Salmo 77:12.

    •   Pag-atender sa mga pagtiripon tanganing iribang mamibi, mag-adal kan Bibliya, magkanta, magpahayag kan samong pagtubod, asin magpakusog nin mga kapwa mi Saksi pati na nin iba.​—Colosas 3:16; Hebreo 10:23-25.

    •   Paghuhulit kan ‘maugmang bareta kan Kahadian.’​—Mateo 24:14.

    •   Pagtabang sa mga nangangaipo.​—Santiago 2:14-17.

    •   Pagtugdok saka pagmentenar nin mga Kingdom Hall asin iba pang pasilidad na ginagamit para suportaran an ginigibong pagtutukdo sa Bibliya sa bilog na kinaban.​—Salmo 127:1.

    •   Pagtao nin ayuda sa panahon nin kalamidad.​—Gibo 11:27-30.

12.   Organisasyon. An samong organisasyon kompuwesto nin mga kongregasyon, na an kada saro pinapangatamanan nin sarong grupo nin kamagurangan o mga elder. Pero, an mga elder na ini mayo nin pagranggo-ranggo o espesyal na titulo asin dai man sinda pigsusuwelduhan. (Mateo 10:8; 23:8) Mayo kaming ikapu o tithing, saka daing pangungulekta nin kuwarta sa mga pagtiripon mi. (2 Corinto 9:7) An gabos ming aktibidad sinusuportaran nin donasyon kan mga tawong dai nagpapabisto.

     An Namamahalang Grupo, an sadit na grupo nin maygurang na mga Kristiyano na naglilingkod sa samong pambilog na kinaban na headquarters, iyo an naggigiya sa gibuhon kan mga Saksi ni Jehova sa bilog na kinaban.​—Mateo 24:45.

13.   Pagkasararo. Sa bilog na kinaban, parareho an samong mga tinutubod. (1 Corinto 1:10) Pinagmamaigutan mi man na halion an diskriminasyon huli sa lahi, estado sa buhay, o kultura. (Gibo 10:34, 35; Santiago 2:4) Nagkakasararo kami pero nakakapamili kami kan gusto mi. An kada saro sa samo naggigibo nin sadiring desisyon basado sa konsiyensiya na natukduan sa Bibliya.​—Roma 14:1-4; Hebreo 5:14.

14.   Paggawi. Nagmamaigot kaming ipahiling sa gabos ming ginigibo an pagkamuot na bakong makasadiri. (Juan 13:34, 35) Piglilikayan ming gibuhon an mga bagay na dai nakakapaugma sa Diyos, arog kan salang paggamit nin dugo paagi sa pagpasalin kaiyan. (Gibo 15:28, 29; Galacia 5:19-21) Mapagpatuninong kami saka dai nakikiayon sa giyera. (Mateo 5:9; Isaias 2:4) Iginagalang mi an gobyerno sa lugar mi asin sinusunod an ipinapautob nindang ley basta dai kaiyan hinahagad samo na suwayon an pagbuot nin Diyos.​—Mateo 22:21; Gibo 5:29.

15.   Pakikiiba mi sa kapwa. An sabi ni Jesus: “Kamutan mo an saimong kapwa nin siring sa saimong sadiri.” Sinabi man niya na an mga Kristiyano ‘bakong kabtang kan kinaban.’ (Mateo 22:39; Juan 17:16) Kaya naghihinguwa kaming ‘gumibo nin marahay sa gabos,’ pero nagdadanay kaming neutral pag-abot sa pulitika saka dai kami nin ano man na koneksiyon sa ibang relihiyon. (Galacia 6:10; 2 Corinto 6:14) Pero, iginagalang mi an desisyon kan iba sa mga bagay na iyan.​—Roma 14:12.

 Kun igwa pa kamong hapot mapadapit sa mga tinutubod kan Mga Saksi ni Jehova, dakul pa an mababasa nindo manungod samo sa samong website, kontakon an saro sa samong mga opisina, mag-atender nin pagtiripon sa Kingdom Hall na harani saindo, o makipag-ulay sa saro sa mga Saksi ni Jehova sa lugar nindo.