Iginagalang kan organisasyon kan Mga Saksi ni Jehova an deretso sa privacy kan lambang indibidwal basado sa mga prinsipyo na sinasabi sa Bibliya. Rinerekonoser kan organisasyon na kaipuhan an hayag asin direktang komunikasyon asin pagkolekta nin personal saka sensitibong personal na impormasyon para maasikaso an mga kaipuhan kan Mga Saksi ni Jehova asin para magibo an saindang relihiyoso asin humanitaryong mga aktibidad, asin rinerekonoser man ninda na kaipuhan na papagdanayon an pagigin kumpidensiyal asin masiyerto na talagang naiingatan an mga impormasyon. (Talinhaga 15:22; 25:9) Dakula an pagpapahalaga ninda sa pagigin kumpidensiyal.—Talinhaga 20:19.

Dakul na nasyon an naggibo nin mga ley dapit sa data protection tanganing maprotektaran an deretso sa privacy kan lambang indibidwal. Pero dawa kan panahon na mayo pa an arog kaiyan na mga ley, haloy nang iginagalang kan organisasyon kan Mga Saksi ni Jehova an deretso sa privacy asin an pagpadanay na kumpidensiyal kan mga impormasyon. Padagos na iingatan kan organisasyon kan Mga Saksi ni Jehova an mga impormasyon na itinatao sa sainda arog kan haloy na nindang ginigibo, na ngunyan nakasurat sa palisiya na ini.

An palisiya na ini aplikado sa bilog na organisasyon kan Mga Saksi ni Jehova, na irinerepresentar kan mga sangang opisina kaiyan sa bilog na kinaban.

Ginagamit kan organisasyon kan Mga Saksi ni Jehova an gabos na personal na impormasyon kauyon kan minasunod na mga regulasyon:

1. An personal na impormasyon gagamiton sa marahay na paagi asin kauyon kan ley.

2. An personal na impormasyon kokolektahon, ipoproseso, asin gagamiton sana sagkod na kaipuhan para magibo kan Mga Saksi ni Jehova an saindang relihiyoso saka humanitaryong mga katuyuhan.

3. An personal na impormasyon dapat na tama asin pirming iyo an pinakabago. Tulos-tulos na itatanos an ano man na sala sa oras na maaraman kan organisasyon an dapit diyan.

4. An personal na impormasyon isasaray sana sagkod sa panahon na kaipuhan iyan para sa lehitimong (mga) katuyuhan kan organisasyon.

5. Tatawan nin maninigong konsiderasyon an kagsadiri kan impormasyon tanganing igalang an saiyang mga deretso.

6. Gigibuhon an angay na teknikal asin organisasyonal na aksiyon tanganing malikayan an bakong awtorisado o ilegal na paghayag sa personal na mga impormasyon. May password an mga kompyuter na sinasarayan kan personal na mga impormasyon asin mga awtorisadong tawo sana an nakakaaram kan mga password. Pigla-lock an mga opisina pagkatapos kan oras nin pagtrabaho asin mga awtorisado sana an puwedeng makalaog diyan.

7. An personal na impormasyon dai ililipat sa ibang sangang opisina apuwera na sana kun kaipuhan iyan tanganing magibo an relihiyoso asin humanitaryong mga katuyuhan kan organisasyon kan Mga Saksi ni Jehova, na diyan an gabos na Saksi ni Jehova nagtutugot asin gikan sa buot na nagdesisyon na magin asin midbidon bilang saro sa mga Saksi ni Jehova.

1. An kagsadiri kan impormasyon tinatawan kan deretso na magin protektado an saiyang personal asin sensitibong personal na impormasyon asin na baguhon o i-delete iyan kauyon kan ginigibo kan Mga Saksi ni Jehova na sinasabi sa palisiya na ini.

2. An siisay man na magpadara nin request na kauyon sa sinasabi kan seksiyon na ini dapat magtao nin igong ebidensiya na magpapatunay kun siisay siya.

3. Kun mag-request an kagsadiri kan impormasyon na i-access, baguhon, o i-delete an personal na impormasyon o sensitibong personal na impormasyon manungod sa saiya, daing pagpaurog na pag-aadalan kan organisasyon kun baga an pagtugot sa request na ma-access o mabago o ma-delete an impormasyon dai magkakaigwa nin negatibong epekto sa legal na kapakanan kan organisasyon, pati na kun baga an pagtugot sa request magsasapeligro sa deretso kan organisasyon dapit sa katalingkasan asin aktibidad ninda.

4. Intensiyon kan organisasyon na permanenteng sarayon an impormasyon manungod sa indibidwal na Saksi ni Jehova. Makakaulang sa relihiyosong paniniwala asin aktibidad kan organisasyon an pag-delete sa arog kaiyan na mga impormasyon.

Kun sa hiling kan sarong indibidwal nabalga an saiyang mga deretso, puwede siyang mag-apelar sa Komite kan Sangay paagi sa personal na surat. Dapat na ipadara an surat sa laog nin duwang semana pagkatapos kan pangyayari na iyo an magigin basehan kan pag-apelar.