“Mayo nin pagkamuot na malabi pa kaini, na itao kan saro an saiyang buhay para sa mga amigo niya.”—Juan 15:13, Bagong Kinaban na Traduksiyon.

 ‘Dai nin pagkamuot na umurog pa kaini, na itao nin tawo an saiyang buhay dahil sa saiyang mga katuod.’—Juan 15:13, Magna Banal na Kasuratan (BIC).

 Tinatabangan ni Jesus an saiyang mga parasunod na masabutan na an saindang pagkamuot dapat na magin makusugon na handa pa ngani sindang magadan para sa lambang saro.

 Sa inot na mga tataramon ni Jesus, sinabi niya sa saiyang mga apostol: “Ini an sakuyang tugon, na kamutan nindo an lambang saro arog kan pagkamuot ko sa saindo.” (Juan 15:12) Anong klaseng pagkamuot igwa si Jesus para sa sainda? Iyan bakong makasadiri, mapagsakripisyong pagkamuot. Sa ministeryo niya digdi sa daga, ininot niya an mga pangangaipo saka kapakanan kan saiyang mga parasunod asin kan iba. Pinaumayan niya an mga tawo sa saindang mga hilang asin tinukduan sinda manungod sa Kahadian nin Diyos. a Maski ngani hababang trabaho ginibo niya para sa kapakinabangan kan iba. (Mateo 9:35; Lucas 22:27; Juan 13:3-5) Pero sa Juan 15:13, mas dakula pang akto nin pagkamuot an pinanunungdan ni Jesus. Sa katunayan, pirang oras sana pagkatapos niyang sabihon an mga tataramon na iyan, ipinahiling niya an dakulang pagkamuot na iyan kan gikan sa buot niyang itao “an saiyang buhay bilang pantubos na karibay nin dakul.” (Mateo 20:28; 22:39) Kaya sa kahanga-hangang paagi, ipinahiling niya na mas namumutan niya an iba kisa an sadiri niya.

 Namumutan ni Jesus an mga tawo. Pero lalo nang namumutan niya an mga nagsusunod sa saiyang mga katukduan. Ibinilang ni Jesus na dayupot niyang mga amigo an saiyang mga disipulo huling nagsusunod sinda sa mga instruksiyon niya, asin nagdanay sindang kaiba niya dawa sa panahon nin kasakitan. (Lucas 22:28; Juan 15:14, 15) Kaya mas may dahilan siya na isakripisyo an saiyang buhay para sa sainda.

 Isinapuso kan inot na siglong mga Kristiyano an mga tataramon ni Jesus, kaya andam sindang magadan para sa lambang saro. (1 Juan 3:16) Iyo, an bakong makasadiring pagkamuot—an pagkamuot na ipinahiling ni Jesus—iyo an magigin panginot na midbidan kan tunay na mga Kristiyano.—Juan 13:34, 35.

 Mababasa sa kapitulo 13 sagkod 17 sa Ebanghelyo ni Juan an huring sadol ni Jesus sa saiyang 11 maimbod na apostol asin an huring pamibi niya kaiba sinda. Paglihis nin pirang oras nagadan siya. Sa kapitulo 15, ikinumparar ni Jesus an saiyang mga disipulo sa mga sanga nin puon nin ubas tanganing ipahiling na kaipuhan nindang magdanay na kasaro niya para mapatunayan na mga parasunod niya sinda. Sinadol niya sinda na ‘padagos na mamunga nin dakul.’ (Juan 15:1-5, 8) An sarong paagi para magibo ninda iyan iyo na magpahiling nin mapagsakripisyong pagkamuot sa iba, kaiba diyan an paghuhulit kan mensahe na ihinulit ni Jesus—“an maugmang bareta kan Kahadian nin Diyos.”—Lucas 4:43; Juan 15:10, 17.

 Hilingon an halipot na videong ini para mahiling an sumaryo kan libro nin Juan.