“Asin nahiling ko an sarong bagong langit asin an sarong bagong daga; huli ta an dating langit asin an dating daga napara na, asin an dagat mayo na.”—Kapahayagan 21:1, Bagong Kinaban na Traduksiyon.

 ‘Dangan nahiling ko an sarong bagong langit asin an sarong bagong daga. An inot na langit saka an inot na daga napara, siring man an dagat.’—Kapahayagan 21:1, An Marahay na Bareta Biblia.

 Sa bersikulong ini, naggamit nin piguratibong pananaram para ipahiling na sasalidahan kan Kahadian nin Diyos sa langit an gabos na gobyerno nin tawo. Hahalion kan Kahadian an mga maraot asin papamahalaan kaiyan an sarong bagong sosyedad nin mga tawo na nagpapasakop sa Kahadian na iyan.

 An libro nin Kapahayagan iprinesentar paagi sa “mga tanda,” o mga simbolo. (Kapahayagan 1:1) Kaya tama sanang sabihon na an langit asin daga na sinambit sa bersikulong ini bakong literal kundi simboliko. Dugang pa, sinambit man sa ibang mga bersikulo kan Bibliya an “bagong mga langit” asin “bagong daga” sa piguratibong paagi. (Isaias 65:17; 66:22; 2 Pedro 3:13) An pagsiyasat sa mga ini asin sa iba pang mga bersikulo sa Bibliya makakatabang sa sato na mas masabutan an kahulugan kaini.

 “Sarong bagong langit.” Kun minsan, ginagamit kan Bibliya an terminong “langit” para ipanungod sa pamamahala o sa mga gobyerno. (Isaias 14:12-14; Daniel 4:25, 26) Sinasabi kan sarong reperensiya na kun manungod sa propetikong mga bisyon, “an langit nangangahulugan sa simbolikong paagi na kapangyarihan na mamahala o gobyerno.” a Sa Kapahayagan 21:1, an “bagong langit” malinaw na nanunungod sa Kahadian nin Diyos. An gobyernong ini sa langit, na kun minsan inaapod na “an Kahadian kan kalangitan,” sinasambit sa bilog na libro nin Kapahayagan asin sa iba pang mga libro sa Bibliya. (Mateo 4:17; Gibo 19:8; 2 Timoteo 4:18; Kapahayagan 1:9; 5:10; 11:15; 12:10) An Kahadian nin Diyos, na si Jesus an Hadi, iyo an masalida sa “dating langit,” na nanunungod sa gabos na gobyerno na ginibo kan mga tawo.—Daniel 2:44; Lucas 1:31-33; Kapahayagan 19:11-18.

 “Sarong bagong daga.” Sinasabi kan Bibliya na an literal na daga dai nuarin man malalaglag o masasalidahan. (Salmo 104:5; Eclesiastes 1:4) Kaya, sa ano nanunungod an simbolikong daga? Sa parati, ginagamit kan Bibliya an terminong “daga” para ipanungod sa mga tawo. (Genesis 11:1; 1 Cronica 16:31; Salmo 66:4; 96:1) Kun siring, “an sarong bagong daga” nanunungod sa bagong sosyedad nin mga tawo na nagpapasakop sa gobyerno nin Diyos sa langit. An “dating daga,” o an sosyedad nin mga tawo na kontra sa Kahadian nin Diyos, mapapara.

 “An dagat mayo na.” An “dagat” na sinasambit sa Kapahayagan 21:1 simboliko man. Sa parati, an dagat maalon saka bakong kalmado, kaya nanunungod iyan sa mga tawong nagkakawsa nin kariribukan asin habong magsunod sa Diyos. (Isaias 17:12, 13; 57:20; Kapahayagan 17:1, 15) Sinda mapapara man. Sinasabi kan Salmo 37:10: “Dikit na sanang panahon, asin an mga maraot mawawara na; hihilingon mo an dati nindang kinamumugtakan, asin mayo na sinda diyan.”

 Ihinula kan libro nin Kapahayagan kun ano an mangyayari sa “aldaw kan Kagurangnan.” (Kapahayagan 1:10) Sigun sa propesiya sa Bibliya, an aldaw na iyan nagpuon kan 1914 kan si Jesus magin Hadi kan Kahadian nin Diyos. b Pero dai pa siya mamamahala nin lubos sa daga. Sa katunayan, sinasabi kan iba pang propesiya na an kamugtakan sa kinaban magrabe sa inot na kabtang kan “aldaw kan Kagurangnan.” An peryodong iyan nin panahon inaapod na “huring mga aldaw.” (2 Timoteo 3:1-5, 13; Mateo 24:3, 7; Kapahayagan 6:1-8; 12:12) Pag natapos na an delikado asin masakit na mga panahon na iyan, hahalion kan Kahadian nin Diyos an dating simbolikong langit saka daga asin magdadara iyan nin katuninungan asin pagkasararo sa bilog na daga. An mga sakop kan Kahadian—an “bagong daga”—maugmang maeeksperyensiyahan an pinakamagayon na klase nin buhay na may perpektong salud.—Kapahayagan 21:3, 4.

 Hilingon an halipot na videong ini para mahiling an sumaryo kan libro nin Kapahayagan.