Dai, an planetang Daga nungkang magugunaw, susuluon, o riribayan. Itinutukdo kan Bibliya na linalang nin Diyos an daga para istaran sagkod pa man.

•   “Magigin pagsadiri kan mga matanos an daga, asin maistar sinda diyan nin daing sagkod.”—Salmo 37:29.

•   “Inestablisar [nin Diyos] an daga sa ibabaw kan mga pundasyon kaiyan; dai iyan mahihiro sa kinamumugtakan kaiyan sagkod nuarin pa man.”—Salmo 104:5.

•   “An daga nagdadanay sagkod lamang.”—Eclesiastes 1:4.

•   “An Saro na naghaman kan daga, an Kaggibo kaiyan na marigon na nag-establisar kaiyan, . . . dai iyan linalang na mayong katuyuhan, kundi hinaman iyan tanganing istaran.”—Isaias 45:18.

 Dai tutugutan nin Diyos na biyong rauton kan mga tawo an daga paagi sa polusyon, giyera, o sa ano pa man na ibang paagi. Imbes, ‘lalaglagon niya idtong mga nagraraot kan daga.’ (Kapahayagan 11:18) Paano niya iyan gigibuhon?

 An mga gobyerno nin tawo, na dai nagibong protektaran an daga, riribayan nin Diyos nin sarong perpektong langitnon na Kahadian. (Daniel 2:44; Mateo 6:9, 10) An Kahadian na iyan papamahalaan kan Aki nin Diyos, si Jesu-Cristo. (Isaias 9:6, 7) Kan nasa daga si Jesus, ipinahiling niya na igwa siya nin pambihirang kapangyarihan sa natural na mga elemento. (Marcos 4:35-41) Bilang an Hadi kan Kahadian nin Diyos, lubos na mapapasairarom sa kontrol niya an daga asin an mga elemento kaiyan. Ibabalik niya an dating kamugtakan kan daga, arog kan sa hardin nin Eden kaidto.—Mateo 19:28; Lucas 23:43.

 Dai. An salang ideyang iyan sa parati dahil sa salang pakasabot sa 2 Pedro 3:7, na an sabi: “An mga langit asin an daga na nag-eeksister ngunyan nakatagama sa kalayo.” Pag-isipan an duwang mahalagang punto na makakatabang sato na masabutan an kahulugan kan mga tataramon na iyan:

1.   Ginagamit kan Bibliya an mga terminong “mga langit,” “daga,” asin “kalayo” bako sana sa sarong kahulugan. Halimbawa, sinasabi kan Genesis 11:1: “An bilog na daga nagpadagos na saro sana an lengguwahe saka parareho an ginagamit na tataramon.” Digdi, an “daga” nanunungod sa sosyedad nin tawo.

2.   An konteksto kan 2 Pedro 3:7 nagtatao nin ideya sa kun ano an kahulugan kan mga langit, daga, asin kalayo na sinambit diyan. Ginamit kan bersikulo 5 asin 6 an Baha kan panahon ni Noe bilang pagkumparar. Sa pangyayaring iyan, an suanoy na kinaban linaglag, o pinuho, pero an satong planeta dai man nawara. Imbes, pinara kan Baha an maringis na sosyedad nin tawo, o an “daga.” (Genesis 6:11) Linaglag man kaiyan an sarong klase nin “kalangitan,” o mga langit—an mga tawo na namahala sa sosyedad nin tawo. Kaya, an maraot na mga tawo an linaglag, bako an satong planeta. Si Noe asin an saiyang pamilya nakaligtas sa paglaglag sa kinaban na iyan asin nag-istar sa daga pagkatapos kan Baha.—Genesis 8:15-18.

 Kaagid kan mga tubig kan Baha, an paglaglag, o “kalayo,” na sinambit sa 2 Pedro 3:7 tatapuson an kinaban nin maraot na mga tawo, bako an planetang Daga. Nanunuga an Diyos na magkakaigwa nin “bagong mga langit asin sarong bagong daga” na diyan “magdadanay an katanusan.” (2 Pedro 3:13) An “bagong daga,” o bagong sosyedad nin tawo, papamahalaan kan “bagong mga langit,” o bagong gobyerno—an Kahadian nin Diyos. Sa pamamahala kan Kahadian na iyan, an daga magigin matuninong na paraiso.—Kapahayagan 21:1-4.