An dakulang kasakitan iyo an panahon nin daing kaagid na kapurisawan na maeeksperyensiyahan kan mga tawo kasuarin man. Sinasabi kan propesiya sa Bibliya na mangyayari iyan sa panahon kan “huring mga aldaw,” o kan “panahon kan katapusan.” (2 Timoteo 3:1; Daniel 12:4) Iyan magigin “kasakitan na dai pang arog kaiyan na nangyari puon sa kapinunan kan kinaban na linalang nin Diyos sagkod sa panahon na iyan, asin dai na giraray iyan mangyayari pa.”​—Marcos 13:19; Daniel 12:1; Mateo 24:21, 22.

Mga pangyayari sa panahon kan dakulang kasakitan

•   Paglaglag sa palsong relihiyon. Magigin marikas nanggad an paglaglag sa palsong relihiyon. (Kapahayagan 17:1, 5; 18:9, 10, 21) An pulitikal na kapangyarihan na irinerepresentar kan United Nations iyo an masagibo kan kabutan na ini nin Diyos.​—Kapahayagan 17:3, 15-18. a

•   Pag-atake sa tunay na relihiyon. Sarong koalisyon nin mga nasyon, na iyo an “Gog kan daga nin Magog” sa bisyon ni Ezekiel, an pupurbaran na puhuon an mga kabilang sa tunay na relihiyon. Pero dai iyan mangyayari huling poproteksiyunan nin Diyos an saiyang mga parasamba.​—Ezekiel 38:1, 2, 9-12, 18-23.

•   Paghusgar sa mga nakaistar sa daga. Huhusgaran ni Jesus an bilog na katawuhan asin “pagsusuwayon niya an mga tawo, kun paanong isinusuway nin pastor an mga karnero sa mga kanding.” (Mateo 25:31-33) Huhusgaran niya an mga tawo base sa kun baga sinuportaran ninda o dai an “mga tugang” ni Jesus na mamamahala sa langit kaiba niya.​—Mateo 25:34-46.

•   Pagtipon sa mga tagapamahala kan Kahadian. An mga maimbod na napiling mamahala kaiba ni Cristo matatapos an buhay sa daga asin dadarahon pasiring sa langit.​—Mateo 24:31; 1 Corinto 15:50-53; 1 Tesalonica 4:15-17.

•   Armagedon. Ini an “giyera kan dakulang aldaw kan Diyos na Makakamhan sa Gabos” na inaapod man na “aldaw ni Jehova.” (Kapahayagan 16:14, 16; Isaias 13:9; 2 Pedro 3:12) Lalaglagon an mga hinukuman ni Cristo. (Sofonias 1:18; 2 Tesalonica 1:6-10) Kaiba digdi an paglaglag sa pambilog na kinaban na pulitikal na sistema, na ilinadawan sa Bibliya bilang an mabangis na hayop na may pitong payo.​—Kapahayagan 19:19-21.

Mga pangyayari pagkatapos kan dakulang kasakitan

•   Ilalaom si Satanas asin an mga demonyo. Iaapon kan sarong anghel si Satanas asin an mga demonyo “sa kairaruman,” na nagrerepresentar sa garo gadan na kamugtakan na diyan mayo sindang magigibo. (Kapahayagan 20:1-3) An kamugtakan ni Satanas sa kairaruman puwedeng ikumparar sa pagkakapreso; dai na niya magigibong impluwensiyahan an siisay man.​—Kapahayagan 20:7.

•   Mapuon an Milenyo. Mapuon an 1,000-taon na pamamahala kan Kahadian nin Diyos na madara nin dakulon na mga bendisyon sa katawuhan. (Kapahayagan 5:9, 10; 20:4, 6) Sarong dai mabilang na “dakulang kadaklan” na ‘mabalyo hali sa nag-aging dakulang kasakitan’ an makakaligtas asin mahihiling an pagpuon kan Milenyo sa daga.​—Kapahayagan 7:9, 14; Salmo 37:9-11.