Iyo. Nagmamalasakit an Diyos sa mga lingkod niya na naghihilang. Mapadapit sa sarong maimbod na lingkod, sinasabi kan Bibliya: ‘Si Jehova pangangatamanon siya sa ibabaw kan higdaan nin kasakitan.’ (Salmo 41:3) Kun igwa ka nin naghahaloy na hilang, makakatabang saimo an mga ini:

1.   Ipamibi na lugod makatagal ka. Puwede kang mag-ako kan “katuninungan nin Diyos na nakakalabi sa gabos na pakasabot.” (Filipos 4:6, 7) Makakatabang iyan para dai ka magparahadit na marhay asin magpadagos dawa may hilang.

2.   Magin positibo. Sinasabi kan Bibliya: ‘An magaya-gayang puso sarong marahay na bulong, alagad an mamundong espiritu minaubos kan kusog nin tawo.’ (Talinhaga 17:22, An Marahay na Bareta Biblia) Magtagapangirit, dai pakaseryoso. Makakabawas iyan sa saimong kamunduan saka may marahay na epekto pa iyan sa saimong hawak.

3.   Pakusugon an saimong paglaom. Pag sigurado ka sa saimong linalauman, makakatabang iyan sa saimo na magin maugma man giraray dawa igwa ka nin naghahaloy na hilang. (Roma 12:12) Sinasabi kan Bibliya na maabot an panahon na ‘mayo nin siisay man na nag-iirok sa satong daga na mag-aagrangay na siya naghihilang.’ (Isaias 33:24, BPV a) Papaumayan nin Diyos an gabos na igwa nin naghahaloy na hilang na dai kayang bulungon nin modernong siyensiya. Halimbawa, sinasabi kan Bibliya na an mga gurang magigin hoben asin magigin makusog giraray. ‘Mababago an saiyang laman nin mas marahay kisa kan aki pa siya; mabalik siya sa panahon kan saiyang pagkahoben.’—Job 33:25, An Banal na Biblia (Paulines).

 Mangnuhon: Aram kan mga Saksi ni Jehova na may itinataong tabang an Diyos, pero dai buot sabihon kaini na dai na sinda nagpapadoktor. (Marcos 2:17) Minsan siring, dai kami nagrerekomenda nin ano man na paagi nin pagbulong; desisyon iyan kan lambang indibidwal.