Si Maria Daw an Ina nin Diyos?

I-PLAY

An simbag kan Bibliya

Bako. Mayong itinutukdo an Bibliya na si Maria an ina nin Diyos; mayo man iyan sinasabi na dapat na sambahon o labi-labing igalang si Maria kan mga Kristiyano. a Pag-isipan:

Nungkang hiningako ni Maria na siya an ina nin Diyos. Sinasabi kan Bibliya na ipinangaki niya “an Aki nin Diyos,” bako an Diyos mismo.—Marcos 1:1; Lucas 1:32.
Nungkang sinabi ni Jesu-Cristo na si Maria an ina nin Diyos o na maninigo siyang tawan nin espesyal na debosyon. Sa katunayan, itinanos niya an sarong babayi na nagtao nin espesyal na atensiyon sa maugmang papel ni Maria bilang saiyang ina, na sinasabi: “Dai, imbes, maugma an mga nagdadangog kan tataramon nin Diyos asin nag-uutob kaiyan!”—Lucas 11:27, 28.
An terminong “Ina nin Diyos” saka “Theotokos” (Nangaki sa Diyos) mayo sa Bibliya.
An termino sa Bibliya na ‘Reyna kan Langit’ nanunungod, bako ki Maria, kundi sa sarong palsong diyosa na sinasamba kan apostatang mga Israelita. (Jeremias 44:15-19, An Marahay na Bareta Biblia) An ‘Reyna kan Langit’ posibleng iyo si Istar (Astarte), sarong diyosa kan Babilonya.
Dai nagsamba ki Maria an inot na mga Kristiyano, asin dai man ninda siya tinawan nin ano man na espesyal na onra. Sinabi nin sarong historyador na “isisikwal [kan inot na mga Kristiyano] an mga kulto asin posibleng marhay na matakot sinda na an dai maninigong atensiyon ki Maria magin garo na man sana pagsamba sa diyosa.”—In Quest of the Jewish Mary.
Sinasabi kan Bibliya na an Diyos mayong kapinunan. (Salmo 90:1, 2; Isaias 40:28) Huli kaiyan, dai siya puwedeng magkaigwa nin ina. Saro pa, dai posible na darahon ni Maria an Diyos sa matris niya dahil malinaw na sinasabi kan Bibliya na maski sa langit dai Siya magkakaigo.—1 Hade 8:27.

Maria—Ina ni Jesus Bakong “Ina nin Diyos”

Si Maria ipinangaking Judio, asin direkta siyang gikan ni Hading David. (Lucas 3:23-31) Para sa Diyos, kawili-wili siyang marhay huli sa saiyang pagtubod asin debosyon. (Lucas 1:28) Pinili siya nin Diyos na magin ina ni Jesus. (Lucas 1:31, 35) Nagkaigwa man sinda kan agom niyang si Jose nin iba pang mga aki.—Marcos 6:3.

Maski ipinapahiling kan Bibliya na nagin disipulo ni Jesus si Maria, mayo nang gayong itinataong impormasyon manungod saiya.—Gibo 1:14.

Taano ta para sa nagkapira si Maria iyo an ina nin Diyos?

An pinakainot na ebidensiya manungod sa pagsamba ki Maria nagpuon kaidto pang huring kabtang kan ikaapat na siglo C.E. Kan panahon na iyan, an Iglesya Katolika nagin an opisyal na relihiyon kan Imperyo nin Roma. Huli kaiyan, an dakul na may paganong pinaghalian nagin naghihingakong mga Kristiyano. Inako na man kan simbahan an bakong basado sa Kasuratan na katukduan na Trinidad.

Dahil sa doktrina nin Trinidad, inisip kan dakul na miyembro kan simbahan na kun si Jesus an Diyos, siguradong si Maria an ina nin Diyos. Kan 431 C.E., opisyal na pigproklamar nin sarong konsilyo kan simbahan sa Efeso na si Maria an “Ina nin Diyos.” An Mariolatry—an labi-labing paggalang ki Maria—luminakop pagkatapos kan Konsilyo nin Efeso. Asin mantang minaiba sa simbahan an mga may paganong pinaghalian, luway-luway na an sinasamba na ninda iyo na an mga imahen saka ladawan kan Birhen Maria imbes na an saindang mga diyosa nin pagigin mainaki, arog ni Artemis (Diana, sa mga Romano) asin Isis.

Kan 432 C.E., ipinagbuot ni Pope Sixtus III na magtugdok nin sarong simbahan sa Roma bilang pagtaong-onra sa “Ina nin Diyos.” Itinugdok iyan harani sa lugar kan mas nainot na templo na itinugdok bilang pagtaong-onra ki Lucina, an diyosa nin pagigin mainaki kan mga Romano. Ilinadawan nin sarong awtor an simbahan na ini bilang “simbolo kun paano an Dakulang Ina kan mga paganong kulto nagin parte kan kulto ni Maria pagkatapos na magin Kristiyano an Roma.”—Mary—The Complete Resource.

a Itinutukdo kan nagkapirang relihiyosong denominasyon na si Maria an ina nin Diyos. Tibaad inaapod ninda siya na ‘Reyna kan Langit’ o Theotokos, sarong Griegong tataramon na nangangahulugan na “Nangaki sa Diyos.”