Sa Bibliya, parating inaapod si Jesus na “Aki nin Diyos.” (Juan 1:49) Ipinapahiling kan mga tataramon na “Aki nin Diyos na an Diyos an Kaglalang, o Burabod nin buhay, kan gabos, kaiba na si Jesus. (Salmo 36:9; Kapahayagan 4:11) Dai man itinutukdo kan Bibliya na literal na nagkaaki an Diyos arog kan pag nag-aaki an mga tawo.

 Inaapod man kan Bibliya an mga anghel na ‘mga aki nin Diyos.’ (Job 1:6) An inot na tawong si Adan inapod man sa Bibliya na “aki nin Diyos.” (Lucas 3:38) Pero dahil si Jesus an pinakainot na linalang nin Diyos asin siya sana an direkta niyang linalang, inaapod si Jesus sa Bibliya na panginot na Aki nin Diyos.

•  Nabuhay na daw si Jesus sa langit bago pa siya ipangaki digdi sa daga?

•  Ano an mga ginibo ni Jesus bago siya nagdigdi sa daga?

 Iyo. Si Jesus sarong espiritung linalang sa langit bago siya ipinangaki sa daga bilang tawo. Sinabi mismo ni Jesus: “Nagbaba ako hali sa langit.”—Juan 6:38; 8:23.

 Linalang nguna nin Diyos si Jesus bago niya linalang an iba pang mga bagay. Ini an sabi kan Bibliya manungod ki Jesus:

•   “Siya . . . an panganay sa gabos na linalang.”—Colosas 1:15.

•   Siya “an kapinunan kan paglalang nin Diyos.”—Kapahayagan 3:14.

 Nagkatotoo ki Jesus an hula manungod sa saro “na an ginikanan kaidto pang suanoy na mga panahon, kaidto pang mga aldaw na haloy nang nakaagi.”—Miqueas 5:2; Mateo 2:4-6.

 Halangkawon an posisyon niya sa langit. An posisyon na ini an sinasabi ni Jesus kan mamibi siya: “Ama, tawan mo ako nin kamurawayan . . . siring kan kamurawayan ko kaidto kan nasa kaibanan mo ako bago pa an kinaban.”—Juan 17:5.

 Tinabangan niya an saiyang Ama sa paglalang kan gabos na iba pang bagay. Kaiba nin Diyos si Jesus bilang “ekspertong trabahador.” (Talinhaga 8:30) Ini an sinabi kan Bibliya manungod ki Jesus: “Paagi sa saiya an gabos na iba pang bagay linalang sa langit asin sa daga.”—Colosas 1:16.

 Ginamit nin Diyos si Jesus para lalangon an gabos na iba pang linalang. Kaiba sa mga linalang na ini an gabos na iba pang espiritung linalang, pati na an uniberso. (Kapahayagan 5:11) Puwede tang ikumparar an pagtabangan nin Diyos saka ni Jesus sa trabaho kan arkitekto saka kan nagtutugdok mismo. An arkitekto an nagdidisenyo; an mga nagtutugdok an nagtatrabaho para mahaman iyan.

 Siya an nagserbing Tataramon. Inapod kan Bibliya si Jesus na “an Tataramon” kan nag-iistorya ini manungod sa nagin buhay ni Jesus bago siya nagin tawo. (Juan 1:1) Malinaw na ginamit nin Diyos an saiyang Aki para magpaabot nin impormasyon saka mga instruksiyon sa iba pang espiritung linalang.

 Minalataw na nagin Tagapagtaram man nin Diyos si Jesus sa mga tawo digdi sa daga. Posibleng marhay na bilang an Tataramon si Jesus an ginamit nin Diyos kan nagtao siya nin instruksiyon ki Adan asin Eva sa hardin nin Eden. (Genesis 2:16, 17) Puwedeng si Jesus an anghel na naggiya sa mga Israelita kaidto kan nasa kaawagan sinda, na an boses dapat na sunudon na marhay kan mga Israelita.—Exodo 23:20-23. a