Siyempre, nagpapabulong an mga Kristiyano. Maririsa iyan sa mga tataramon ni Jesus kan sabihon niya sa saiyang mga parasunod na “an mga tawong marahay an salud dai nangangaipo nin doktor, pero an mga may hilang iyo.” (Mateo 9:12) Dawa ngani bako man libro manungod sa pagbulong an Bibliya, nagtatao iyan nin mga prinsipyo na makakatabang sa saro na gustong mapaugma an Diyos.

Ihapot sa sadiri

 1. Naiintindihan ko daw an paagi nin pagbulong na isinusuherir sa sako? Pinapatanidan kita kan Bibliya na dai basta ‘paniwalaan an lambang mga tataramon,’ imbes magsiyasat nin masasarigan na mga impormasyon.—Talinhaga 14:15.

 2. Dapat daw akong magpakonsulta giraray sa iba pang mga doktor? Dakula an maitatabang kan “dakul na parakonseho,” lalo na kun malala na an kamugtakan kan salud mo.—Talinhaga 15:22.

 3. Mababalga daw kan paaging iyan nin pagbulong an pagbuot kan Bibliya na “maglikay . . . sa dugo”?—Gibo 15:20.

 4. An diagnosis o pagbulong daw may kalabot na espiritismo? Sinasabi kan Bibliya na isikwal an “espiritismo.” (Galacia 5:19-21) Tanganing maaraman kun may kalabot iyan na espiritismo, pag-isipan an mga hapot na ini:

•   Naggagamit daw nin espiritismo an nagbubulong?

•   An paagi daw nin pagbulong nakabase sa pagtubod na an hilang daa kawsa nin mga engkanto o pangkukulam?

•   May ginibo daw na pagdulot, orasyon, o iba pang espiritistikong mga ritwal o mga bagay na ginamit sa pagpreparar o paglaag kan bulong?

 5. Nakapokus na lang daw ako sa pagparaisip kan salud ko? Sinasabi kan Bibliya: “Mahayag lugod sa gabos na tawo an saindong pagigin rasonable.” (Filipos 4:5) Makakatabang saimo an pagigin rasonable na magpokus sa “mas importanteng mga bagay,” arog kan pagsamba sa Diyos.—Filipos 1:10; Mateo 5:3.