Itinutukdo kan Bibliya na sa gabos na linalang sa daga, an mga tawo sana an puwedeng magpasiring sa langit asin igwa iyan nin limitadong bilang. (Kapahayagan 14:1, 3) Mamamahala sinda sa langit bilang mga hadi asin saserdote kaiba ni Jesus. (Lucas 22:28-30; Kapahayagan 5:9, 10) An mayoriya kan katawuhan bubuhayon liwat para mag-istar sa paraisong daga.—Salmo 37:11, 29.

 Mayong sinasabi an Bibliya na an mga ataman na hayop, arog kan ayam, mapasiring sa langit pag nagadan. Taano man? May mga kaipuhan kayang gibuhon para makuwalipikar sa “langitnon na pag-apod,” asin dai iyan magigibo kan mga hayop. (Hebreo 3:1) Kaiba digdi an pagkua nin kaaraman, pagkaigwa nin pagtubod, saka pagsunod sa mga pagbuot nin Diyos. (Mateo 19:17; Juan 3:16; 17:3) An mga tawo sana an igwa nin oportunidad na mabuhay sagkod pa man.—Genesis 2:16, 17; 3:22, 23.

 Kaipuhan na buhayon liwat an mga mapasiring sa langit. (1 Corinto 15:42) Nagkapirang pagkabuhay liwat an sinambit sa Bibliya. (1 Hadi 17:17-24; 2 Hadi 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Gibo 9:36-42; 20:7-12) Pero, mga tawo sana an binuhay liwat bako an mga hayop.

•  May kalag daw an mga hayop?

•  Nagagadan daw an kalag?

•  Nagkakasala daw an mga hayop?

•  Tinutugutan daw an pagigin maringis sa mga hayop?

 Mayo. Sinasabi kan Bibliya na an mga hayop saka tawo mga kalag. (Bilang 31:28) Kan lalangon an inot na tawong si Adan, dai siya tinawan nin kalag kundi siya “nagin sarong buhay na kalag.” (Genesis 2:7, nota sa ibaba) An kalag kompuwesto nin duwang bagay: an “alpog kan daga” asin “hinangos nin buhay.”

 Iyo, itinutukdo kan Bibliya na an kalag nagagadan. (Levitico 21:11, nota sa ibaba; Ezekiel 18:20) Pag nagadan an mga hayop saka tawo minabalik sinda sa pagigin alpog kan daga. (Eclesiastes 3:19, 20) Sa madaling sabi, dai na sinda nag-eeksister. a

 Dai. An saro na naggigibo nin kasalan nag-iisip, nakakamati, o naggigibo nin sarong bagay na nagbabalga sa mga pamantayan nin Diyos. Para magkasala, dapat na an sarong linalang may kakayahan na gumibo nin mga desisyon sa kun ano an tama asin sala. Mayo kan kakayahan na iyan an mga hayop. Sa parati, sa halipot na lawig nin buhay kan mga hayop, minahiro sinda paagi sa instinct. (2 Pedro 2:12) Pagkatapos kaiyan, nagagadan sinda, dawa ngani dai man sinda nagkakasala.

 Dai. Tinawan nin Diyos an mga tawo nin awtoridad na pamahalaan an mga hayop pero bako kan deretso na maltratuhon an mga ini. (Genesis 1:28; Salmo 8:6-8) May pagmakulog an Diyos sa lambang hayop—dawa ngani sa saradit na gamgam. (Jonas 4:11; Mateo 10:29) Pinagbutan niya an saiyang mga parasamba na atamanon an mga hayop.—Exodo 23:12; Deuteronomio 25:4; Talinhaga 12:10.