Bakong magayon na epekto: Puwedeng makaulang saimo an pagigin masusupgon na magkaigwa nin mga amigo saka magagayon na eksperyensiya.

 Magayon na epekto: Okey man lang magin masusupgon kun minsan. Matatabangan ka kaiyan na mag-isip nguna bago magtaram asin magin mapag-obserbar saka marahay na paradangog.

 An puwede mong gibuhon: Kun masusupgon ka ngunyan, dai buot sabihon na dai mo na iyan mababago. Puwede mo iyan kontrulon para malikayan an bakong magayon na epekto kaiyan saimo. Matatabangan ka kan artikulong ini kun paano mo iyan gigibuhon.

•  Aramon an mga ikinakatakot mo

•  An puwede mong gibuhon

•  An sinasabi kan ibang tin-edyer

 Dahil sa pagigin masusupgon, posibleng mapugulan ka kaiyan na makipag-ulay sa mga tawo nin personal. Kaya tibaad mamati mo na nagsosolo ka, na garo mayo kang kaiba sa sarong madiklom na kuwarto. Nakakatakot nanggad iyan. Pero kun aaramon mo an mga ikinakatakot mo, puwedeng mapag-isip-isip mo na mayo man talagang rason para matakot. Pag-isipan an tulong halimbawa.

•   Ikinakatakot #1: “Dai ko aram kun ano an sasabihon ko.”

   An totoo: Mas natatandaan kan mga tawo kun ano an naipamati mo sa sainda kisa sa mga sinabi mo. Makokontrol mo an ikinakatakot mo kun magigin marahay kang paradangog, na ipinapahiling na interesado kang marhay sa sinasabi kan iba.

   Pag-isipan: Anong klaseng amigo an gusto mo—saro na kadakul pirming sinasabi o sarong marahay na paradangog?

•   Ikinakatakot #2: “Puwedeng isipon kan iba na boring akong kaulay.”

   An totoo: Masusupgon ka man o bako, pirming may masasabi an iba manungod saimo. Kaya kun tutugutan mong mas mabisto ka ninda, makokontrol mo an ikinakatakot mo saka magkakaigwa sinda ninda mas magayon na impresyon saimo.

   Pag-isipan: Kun iniisip mong hinuhusgaran ka kan iba, bako daw na tibaad ika an nanghuhusgar sa sainda ta iniisip mong habo ninda saimo?

•   Ikinakatakot #3: “Mapapasupog lang ako pag sala an nasabi ko.”

   An totoo: Kun minsan, nangyayari talaga iyan sa gabos. Makokontrol mo an ikinakatakot mo kun iisipon mo na normal lang na masala saka naipapahiling mo sa iba na bakong perpekto an paghiling mo sa sadiri mo.

   Pag-isipan: Bako daw na mas magayon kaibanan an mga tawong inaako na bako sindang perpekto?

 Aram mo daw? Iniisip kan nagkapira na bako man sindang masusupgon ta mahilig ngani sindang makipag-text. Pero mas madaling magkaigwa nin tunay na mga amigo pag nakakaulay mo an mga tawo nin personal. An psychologist saka technology expert na si Sherry Turkle, nagsabi: “Mas nagigin harani kita sa iba pag nahihiling ta an ekspresyon kan saindang lalawgon saka nadadangog an boses ninda.” a

•   Likayan an pagkumparar. Dai mo kaipuhan na magin extrovert. An kaipuhan mo sanang gibuhon iyo na bawasan an pagigin masusupgon para dai mo mapalampas an pagkakataon na magkaigwa nin mga amigo saka magagayon na eksperyensiya.

   “Dai man kaipuhan na halawig an pag-uulay saka na yaon saimo an gabos na atensiyon. Puwedeng magpabisto ka sana o maghapot nin simpleng mga hapot.”—Alicia.

   Prinsipyo sa Bibliya: “Siyasaton kan lambang saro an sadiri niyang mga ginigibo, dangan magkakaigwa siya nin dahilan para mag-ugma basado sa sadiri niya sana, asin bako sa pagkumparar kan sadiri niya sa iba.”—Galacia 6:4.

•   Magin mapag-obserbar. Obserbaran an mga tawong mainamigo asin risahon kun paano sinda nakikipag-ulay sa iba. Paano ninda iyan nagigibo? Arin sa mga ginigibo ninda an bako gayong epektibo? Arin sa marahay na mga paagi ninda nin pakikipag-ulay an gusto mong arugon?

   “Obserbaran an mga tawong madaling makipag-amigo saka makanuod sainda. Hilingon kun ano an mga ginigibo saka sinasabi ninda pag nakikipag-ulay sa mga bagong kabisto ninda.”—Aaron.

   Prinsipyo sa Bibliya: “Kun paanong napapatarom nin lansang an lansang, napapatarom man nin sarong tawo an saiyang amigo.”—Talinhaga 27:17.

•   Maghapot. Sa parati, gusto kan mga tawo na magtao nin opinyon sa mga bagay-bagay, kaya an paghapot sarong magayon na paagi tanganing makapuon nin pakikipag-ulay. Makakatabang man iyan para bako sana saimo nakapokus an atensiyon.

   “Pag andam ka sa pakikipag-ulay dai ka gayong mahahadit. Bago an gathering, puwede kang mag-isip nin mga bagay na magpag-uulayan o mga hapot tanganing dai ka gayong ma-stress pag nakikipagbistuhan.”—Alana.

   Prinsipyo sa Bibliya: ‘Tawan nindo nin atensiyon bako sana an sadiri nindong kapakanan, kundi an kapakanan man kan iba.’—Filipos 2:4.