Uyon sa sarong surbey, 80 porsiyento nin mga tin-edyer sa Amerika an namimibi, pero kabanga sana sa sainda an namimibi aroaldaw. Siguradong may mga nag-iisip: ‘An pamibi daw pampagian lang nin buot, o may iba pang maitatabang iyan sa sako?’

•  Ano an pamibi?

•  Nagdadangog daw talaga an Diyos?

•  Ano an puwede kong ipamibi?

•  An sinasabi kan ibang tin-edyer

 An pamibi sarong tunay na komunikasyon sa Kaglalang kan gabos na bagay. Isipa na sana! Si Jehova nakakalabing marhay sa mga tawo sa gabos na aspekto, pero ‘bako siyang harayo sa lambang saro sa sato.’ (Gibo 17:27) Sa katunayan, may magayon na imbitasyon an Bibliya: “Rumani kamo sa Diyos, asin marani siya sa saindo.”—Santiago 4:8.

 Paano ka mapaparani sa Diyos?

•   An sarong paagi iyo an pagpamibi. Diyan mo masasabi sa Diyos an gusto mong sabihon.

•   An saro pang paagi iyo an pag-adal kan Bibliya. Diyan ka man “kinakaulay” nin Diyos.

 An arog kaiyan na komunikasyon—pagpamibi saka pag-adal nin Bibliya—makakatabang sa saimo para magin amigo ka nin Diyos.

 “An makaulay si Jehova—an Kahuruhalangkawi sa Gabos—an saro sa pinakadakulang pribilehiyo kan mga tawo.”—Jeremy.

 “Pagmati ko mas napaparani ako ki Jehova pag sinasabi ko sa saiya sa pamibi an mga nasa puso ko.”—Miranda.

 Dawa nagtutubod ka sa Diyos—saka dawa namimibi ka sa saiya—tibaad masakitan ka pa man giraray na maniwala na dinadangog ka niya. Pero sinasabi kan Bibliya na si Jehova an ‘Paradangog nin pamibi.’ (Salmo 65:2, An Banal na Biblia) Inaagda ka pa ngani kaiyan na ‘ipasa sa saiya an gabos mong kahaditan.’ Taano? ‘Huli ta nagmamakulog siya sa saimo.’—1 Pedro 5:7.

 Pag-isipan: Nagtatao ka daw nin panahon para pirming makaulay an mga amigo mo? Paagi sa pamibi, puwede ka man regular na makipag-ulay sa Diyos, na inaapod siya sa saiyang pangaran na Jehova. (Salmo 86:5-7; 88:9) Iyo, inaagda ka kan Bibliya na pirming mamibi.—1 Tesalonica 5:17.

 “Sa pagpamibi, nakakaulay ko an sakuyang Ama sa langit, diyan ko saiya nasasabi an laog kan puso ko.”—Moises.

 “Nasasabi ko ki Jehova an gabos, arog kan nagigibo ko ki Mama saka sa mga close friend ko.”—Karen.

 Sinasabi kan Bibliya: “Sa gabos na bagay paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan.”—Filipos 4:6.

 Buot sabihon OK lang na ipamibi mo an mga problema mo? Iyo! An totoo, sinasabi kan Bibliya: ‘Bugtakan diyan ki Jehova an saimong pasan, asin aatamanon ka niya.’—Salmo 55:22.

 Siyempre, bako lang puro manungod sa problema an dapat mong ipamibi sa Diyos. “Bako ako ka’yan marahay na amigo kun puro paghagad lang nin tabang an ipinapamibi ko Jehova,” an sabi kan hoben na si Chantelle. “Para sako, dapat inot an pasasalamat. Saka kadakul ko talagang dapat ipagpasalamat saiya.”

 Pag-isipan: Anong mga bagay sa buhay mo an maipagpapasalamat mo? Mag-isip nin tulong bagay na maipagpapasalamat mo ki Jehova ngunyan.

 “Dawa ngani simpleng mga bagay puwede tang ipagpasalamat ki Jehova. Halimbawa, pag nakahiling ka nin magayon na burak.”—Anita.

 “Pag-isipan an sarong kahanga-hangang linalang ni Jehova o an sarong teksto sa Bibliya na nakataros sa puso mo, saka ipagpasalamat iyan ki Jehova.”—Brian.