Nagtangad si Maria Magdalena sa langit mantang pinupunasan an mga luha sa saiyang mga mata. An saiyang namumutan na Kagurangnan nasa hariging pasakitan. Aldaw kaidto nin tigsuli asin mga udto na, “alagad ta nagdiklom sa bilog na daga”! (Lucas 23:44, 45) Pinakarhay niya an bado niya sa may abaga niya dangan nagrani sa sarong grupo nin mga babaying yaon man kaidto duman. An kadikluman na ini naglawig nin tulong oras kaya malinaw na bako ining solar eclipse ta minalawig sana iyan nin pirang minuto. Si Maria saka an iba pang nakatindog harani ki Jesus tibaad may mga nadadangog nang mga hayop na, sa normal na kamugtakan, sa banggi lang nagbubura. May mga tawong yaon kaidto na “nagkatarakot . . . nin grabe asin nagsabi: ‘Siguradong ini an Aki nin Diyos.’” (Mateo 27:54) Tibaad inisip kan mga parasunod ni Jesus asin kan iba pa na pagpahiling idto ni Jehova kan saiyang kamunduan asin kan kaanggutan sa brutal na pagmaltrato sa saiyang Aki.

 Masakit para ki Maria Magdalena na mahiling an kamugtakan ni Jesus, pero dai niya man ini kayang bayaan. (Juan 19:25, 26) Siguradong grabeng kulog an namamatian ni Jesus. Kaipuhan man kan ina ni Jesus nin pagranga asin tabang.

 Pagkatapos kan ginibo ni Jesus para ki Maria, gusto ni Maria na gibuhon an gabos na makakaya niya para ki Jesus. Minemenos asin kahirak-hirak an paghiling saiya kaidto kan mga tawo, pero binago iyan gabos ni Jesus. Tinawan ni Jesus nin dignidad asin katuyuhan an saiyang buhay. Nagin marahayon siyang halimbawa sa pagpahiling nin pagtubod. Paano? Asin ano an manunudan ta sa saiyang pagtubod?

 Sa Bibliya, nagpuon an istorya manungod ki Maria Magdalena paagi sa sarong milagro. Pinatalingkas siya ni Jesus sa sarong marauton na kamugtakan. Inaatake nin maraot na mga espiritu an mga tawo, asin sinasaniban pa ngani an mga tawo para kontrulon an mga ini. Dai ta aram an ginibo kan mga demonyo ki Maria Magdalena; an aram ta sana, sinaniban siya nin pitong mabangis saka daing hirak na mga demonyo. Marahay na sana ta pinalayas sinda gabos ni Jesu-Cristo!—Lucas 8:2.

 Ngunyan na talingkas na siya, sarong bagong buhay an naghahalat saiya. Paano niya ipapahiling an saiyang pasasalamat? Nagi siyang maimbod na parasunod ni Jesus. Pag may pangangaipo, nagtatabang siya. Nagtabang man siya sa mga pangangaipo ni Jesus asin kan mga apostol. Tinawan niya sinda nin kakanon, isusulot, saka nin madadagusan. Bako sindang mayaman saka dai sinda nagtatrabaho kan panahon na idto. Para makapokus sa paghuhulit saka pagtutukdo, kaipuhan ninda nin materyal na tabang.

 Nagtabang si Maria saka an nagkapirang iba pang babayi sa mga pangangaipong iyan. “Ginagamit [kan mga babaying ini] an saindang mga pagsadiri sa pagtabang sa sainda.” (Lucas 8:1, 3) Tibaad uruigwahon man an iba sa mga babaying iyan. Daing sinasabi sa Bibliya kun nagluluto sinda, naglalaba, o nag-aandam kan madadagusan ninda sa paglipat-lipat sa manlain-lain na lugar. Pero gikan sa buot nindang ginibo an ano man na maitatabang ninda sa nagbibiyaheng grupong ini na posibleng mga 20 katawo. An mga paghihinguwa kan mga babaying ini siguradong nakatabang ki Jesus asin sa saiyang mga apostol na lubos na makapagpokus sa gibuhon na paghuhulit. Siyempre, aram ni Maria na dai nanggad niya mababalusan an ginibo ni Jesus para saiya—pero maugma nanggad siya na gibuhon kun ano an magigibo niya!

 Minemenos kan dakul ngunyan an mga tawong naglilingkod para sa iba. Pero bako nanggad arog kaiyan an Diyos. Isipa na sana kun gurano siya kaugma na mahiling si Maria na ginigibo an pinakamakakaya na suportaran si Jesus asin an saiyang mga apostol! Dakul man ngunyan na maimbod na mga Kristiyano an maugmang naglilingkod sa iba. Kun minsan, dakula nang bagay an pagtao nin praktikal na tabang o nin mabuot na tataramon. Pinapahalagahan na marhay iyan ni Jehova.—Talinhaga 19:17; Hebreo 13:16.

 Kaiba si Maria Magdalena sa dakul na babayi na nag-iba ki Jesus pa-Jerusalem para sa Paskuwa kan 33 C.E. (Mateo 27:55, 56) Kan mabaretaan niya na inaresto si Jesus saka binista kan banggi, siguradong ikinauyam niya iyan na marhay. Pero may mas maraot pang bareta. Nagpadara si Gobernador Poncio Pilato sa panggigipit kan Judiong mga lider nin relihiyon asin kan mga tawong nasa impluwensiya ninda, kaya sinentensiyahan niya si Jesus nin maringis na kagadanan sa sarong harigi. Hiling-hiling ni Maria an saiyang Kagurangnan na duguan, pagal-pagal na, asin nasasakitan na marhay sa pagpasan sa halabang harigi na gagamiton sa paggadan saiya.—Juan 19:6, 12, 15-17.

 Sa lugar na paggagadanan ki Jesus, kan magdiklom na kan udto, si Maria Magdalena saka an iba pang mga babayi nakatindog “harani sa hariging pasakitan na namumugtakan ni Jesus.” (Juan 19:25) Dai naghali si Maria. Nahiling asin nadangog niya si Jesus mantang itinutugon kaini an saiyang ina sa namumutan niyang apostol na si Juan. Nadangog ni Maria an paghibi ni Jesus sa saiyang Ama kan naghihingagdan na siya. Asin nadangog niya an huring mga tataramon na sinabi ni Jesus bago ini magadan, “nautob na!” Grabe an pagmundo ni Maria. Dawa kan magadan na si Jesus, minalataw na dai siya naghali duman. Pagkatapos kaiyan, nagdanay siya sa bagong lulubngan kun sain ilinaag kan mayaman na lalaking si Jose na taga Arimatea an bangkay ni Jesus.—Juan 19:30; Mateo 27:45, 46, 57-61.

 Ipinapagirumdom sato kan halimbawa ni Maria kun ano an puwede tang gibuhon para sa satong mga kapagtubod pag napapaatubang sinda sa masakit na mga problema. Tibaad dai ta man mapugulan an trahedya o mahali an kulog na namamatian kan mga biktima. Pero puwede kitang makapahiling sainda nin pagmalasakit asin kusog nin buot. Pag an saro may problema, puwedeng magin dakulang tabang an pag-alalay nin sarong amigo. Kun dadamayan ta an satong amigo sa panahon nin problema, maipapahiling ta na maimbod kita saiya asin talagang mapapakusog siya kaiyan.—Talinhaga 17:17.

 Pagkalaag sa lulubngan kan hawak ni Jesus, saro si Maria sa mga babayi na nagkua nin dagdag na mahamot na mga sangkap para ilahid sa hawak ni Jesus. (Marcos 16:1, 2; Lucas 23:54-56) Pagkatapos kan Sabbath, amay siyang nagmata kinaagahan. Imahinara na naglalakaw siya sa madiklom na mga tinampo kaiba kan ibang mga babayi pasiring sa lulubngan ni Jesus. Mantang nasa dalan, iniisip ninda kun paano ninda mapapaligid an magabat na gapo na nakabágat sa entrada kan lulubngan. (Mateo 28:1; Marcos 16:1-3) Pero, nagpadagos man giraray sinda. Malinaw na pinahiro sinda kan pagtubod ninda na gibuhon an makakaya ninda asin ipagkatiwala ki Jehova an iba pang mga bagay.

 Posible na si Maria an nainot na mag-abot sa lulubngan. Dangan namungnan siya. Mayo na an gapo sa entrada—saka mayo nang laog an lulubngan! Alistong babayi siya, kaya nagdalagan siya pabalik para sabihon ki Pedro saka ki Juan an nahiling niya. Imahinara siyang halhalon na nagkukurahaw: “Kinua ninda sa lulubngan an Kagurangnan, asin dai mi aram kun sain ninda siya ibinugtak”! Dali-dali na nagpasiring sa lulubngan si Pedro asin Juan, asin nahiling ninda na mayo na talagang laog iyan, tapos nagbalik na sinda sa harong ninda. a—Juan 20:1-10.

 Pagbalik ni Maria sa lulubngan, nagdanay siya duman nin solo. Amayon pa kaidto, tapos tuninungon sa lulubngan na mayo nang laog, asin nagparahibi duman si Maria. Sinirip niya an laog kan lulubngan asin dai pa man giraray makatubod na mayo na an Kagurangnan, tapos nabigla siyang marhay. Sa laog, may nakatukaw na duwang anghel na nakaputi! “Taano ta naghihibi ka?” an hapot ninda. Huli sa pagkaribaraw, an isinimbag niya, iyo man sana an sinabi niya sa mga apostol: “Kinua ninda an sakuyang Kagurangnan, asin dai ko aram kun sain ninda siya ibinugtak.”—Juan 20:11-13.

 Kan magsalingoy siya, may lalaking nakatindog sa likod niya. Dai niya ini nabisto, kaya hinuna niya na hardinero ini kan lugar. Mabuot na naghapot an lalaki: “Babayi, taano ta naghihibi ka? Siisay an pighahanap mo?” Nagsimbag si Maria, “Ginoo, kun kinua mo siya, sabihon mo sa sako kun sain mo siya ibinugtak, asin kukuanon ko siya.” (Juan 20:14, 15) Isipa an sinabi ni Maria. Kaya niya daw na solong alsahon an dakula asin magabat na hawak ni Jesu-Cristo? Dai na iyan inisip ni Maria. Basta an aram niya, kaipuhan niyang gibuhon an magigibo niya.

 Pag nakakamati kita nin grabeng kamunduan asin napapaatubang sa mga problemang garo dai ta kaya, puwede tang arugon si Maria Magdalena. Kun mapokus sana kita sa satong mga kaluyahan asin mga limitasyon, tibaad matakot kitang marhay asin pangluyahan nin buot na huli kaiyan, dai ta na aram an gigibuhon ta. Pero kun gigibuhon ta an gabos tang makakaya asin ipagkakatiwala ki Jehova an iba pang bagay, tibaad mabigla kita sa puwedeng magin resulta. (2 Corinto 12:10; Filipos 4:13) An pinakamahalaga, mapapaugma ta si Jehova. Nagibo nanggad iyan ni Maria, kaya binalusan siya ni Jehova sa paaging dai niya inaasahan.

 An lalaking nasa atubangan ni Maria, bakong sarong hardinero. Dati siyang karpintero, na nagin paratukdo, tapos nagin namumutan na Kagurangnan ni Maria. Pero dai niya ini nabisto, kaya nagrayo si Maria. Dai lamang nagsabong sa isip ni Maria na binuhay na liwat si Jesus bilang makapangyarihan na espiritu. Pero kan magpahiling siya ki Maria, ibang hawak an ginamit niya. Sa nakakaugmang mga aldaw pagkatapos kan pagkabuhay liwat saiya, parati siyang dai nabibisto dawa kan mga pamilyar saiyang marhay.—Lucas 24:13-16; Juan 21:4.

 Paano nagpabisto si Jesus ki Maria? Paagi sa pagsambit nin saro sanang tataramon: “Maria!” Nagsalingoy siya asin nagkurahaw, na sinasabi an pamilyar na Hebreong tataramon na siguradong dakulon na beses niyang inapod saiya—“Rabboni!” Siya an saiyang namumutan na Paratukdo! Grabe an kaugmahan niya. Kinaputan niya ini, asin habo niya nang butasan.—Juan 20:16.

 Aram ni Jesus an iniisip niya. Kaya sinabi niya: “Dai mo ako pagpugulon.” Maiimahinar ta na sinasabi niya ini sa mabuot na paagi, na tibaad nakahuyom, mantang luway-luway niyang hinahali an pagkakapot kaini saiya, na inaasigurar ini na sinasabi: “Dai pa ako nakakasakat sa Ama.” Bako pa idto an panahon para magsakat siya sa langit. May mga kaipuhan pa siyang gibuhon digdi sa daga, asin gusto niya na tabangan siya ni Maria. Siyempre, nagdangog saiyang marhay si Maria. Sinabi ni Jesus saiya: “Magduman ka sa sakuyang mga tugang asin sabihon mo sa sainda, ‘Masakat ako sa sakuyang Ama asin saindong Ama, sa sakuyang Diyos asin saindong Diyos.’”—Juan 20:17.

 Pambihirang asignasyon nanggad ini hali sa saiyang Kagurangnan! Saro si Maria sa inot na mga disipulong nagkapribilehiyo na mahiling an binuhay liwat na si Jesus. Asin ngunyan, ipinagkatiwala saiya an pribilehiyo na ipaabot an maugmang baretang iyan. Imahinara an kaugmahan saka pagkadesidido niya na hanapon an mga disipulo. Halhalon na sinabi ni Maria an mga tataramon na dai niya nanggad malilingawan asin kan iba pa na mga makakadangog kaiyan: “Nahiling ko an Kagurangnan!” Sa grabeng kaugmahan niya, marikason niyang sinabi sainda an gabos na sinabi ni Jesus. (Juan 20:18) Arog man kaiyan an sinabi kan iba pang mga babayi na nagduman sa lulubngan ni Jesus.—Lucas 24:1-3, 10.

 Ano an reaksiyon kan mga lalaki? Bako gayong marahay kan inot. Mababasa ta: “Para sainda garo baga kalokohan an mga sinasabi kan mga babayi, asin habo nindang maniwala sa mga ini.” (Lucas 24:11) Nagdakula an mga lalaking iyan sa sosyedad na dai nagtitiwala sa mga babayi; sigun sa rabinikong tradisyon, dai puwedeng magtao nin testimonya sa korte an sarong babayi. Tibaad dai naririsa kan mga apostol na naiimpluwensiyahan na sinda kan kultura ninda. Pero si Jesus asin an saiyang Ama, mayo kan arog kaiyan na pagpalain-lain. Dakulang pribilehiyo nanggad an itinao ninda sa maimbod na babaying iyan!

 Dai nagraot an buot ni Maria sa reaksiyon kan mga lalaki. Aram niya na may tiwala saiya an saiyang Kagurangnan, asin kontento na siya diyan. An gabos na nagsusunod ki Jesus pinagkatiwalaan man nin sarong mensahe na ipapaabot ninda. Inaapod kan Bibliya an mensaheng iyan na “maugmang bareta kan Kahadian nin Diyos.” (Lucas 8:1) Dai nanuga si Jesus sa mga parasunod niya na an gabos maniniwala sainda o papahalagahan an gibuhon ninda. Kabaliktaran ngani kaiyan an mangyayari. (Juan 15:20, 21) Kaya marahay na girumdumon kan mga Kristiyano si Maria Magdalena. Dawa dai naniwala saiya an pirang tugang niya sa espirituwal, dai niya tinugutan na makabawas iyan sa kaugmahan niya na sabihon sa iba an maugmang bareta manungod sa binuhay liwat na si Jesus!

 Kan huri, nagpahiling si Jesus sa mga apostol niya dangan sa dakul pang ibang mga parasunod niya. Nagpahiling pa ngani siya sa labing 500 katawo sa sarong pagkakataon! (1 Corinto 15:3-8) Siguradong nagkusog an pagtubod ni Maria sa kada pagpahiling ni Jesus, nahiling niya man mismo iyan o nabaretaan sana. Tibaad saro si Maria Magdalena sa mga babayi na sinambit na yaon kaidto sa pagtiripon sa Jerusalem kan aldaw kan Pentecostes kan ibubo an banal na espiritu sa mga parasunod ni Jesus na nagkakatiripon.—Gibo 1:14, 15; 2:1-4.

 Ano man an nangyari, sarong bagay an sigurado: Nagdanay na maimbod si Maria Magdalena sagkod sa kagadanan. Iyan man lugod an determinado tang gibuhon! Maaarog ta an pagtubod ni Maria Magdalena kun mapahiling kita nin pasasalamat sa gabos na ginibo ni Jesus para sato, asin kun mapakumbaba kitang maglilingkod sa iba mantang nagtitiwala sa tabang nin Diyos.