May sinabi o ginibo an saimong agom na nakapaanggot sa saimo, asin pinurbaran mong pugulan an kaanggutan mo. Pero narisa kan saimong agom na garo bako kang okey kaya pigparahapot ka niya. Kaya lalo ka pang nauyam. Paano mo makokontrol an saimong kaanggutan sa arog kaiyan na mga sitwasyon?

•  Kun ano an dapat mong maaraman

•  Kun ano an puwede mong gibuhon

• An pagpaluwas nin kaanggutan makakaraot sa salud mo. Ipinapahiling sa mga pagsiyasat na kun dai mo kokontrulon an saimong kaanggutan, mas madali kang magkakaigwa nin alta presyon, hilang sa puso, depresyon, asin problema sa panunaw. Pigtutubudan man na an kaanggutan nagkakawsa nin insomnia, pagkahandal, problema sa kublit, asin istrok. Kaya tama sana an sinasabi kan Bibliya: ‘[Halia] an kaanggutan, mararaot ka sana kaiyan.’—Salmo 37:8, An Banal na Biblia.

• An pagtago nin kaanggutan makakaraot man. An kaanggutan kun itatago garo hilang na nakakadanyar sa laog kan hawak mo. Halimbawa, puwede kang magin mapagduda o magin mapagkritika. An arog kaiyan na ugali magigin dahilan na magin masakit kang pakiibanan asin makakadanyar nanggad sa relasyon nindong mag-agom.

• Hilingon an magayon na mga kuwalidad kan saimong agom. Ilista an tulong bagay na hinahangaan mo sa saimong agom. Sa sunod na maanggot ka sa sinabi o ginibo niya, isipon an mga kuwalidad na iyan. Puwedeng makatabang ini na makontrol mo an saimong kaanggutan.

  Prinsipyo sa Bibliya: “Ipahiling nindo na mapagpasalamat kamo.”—Colosas 3:15.

•   Kultibaron an pagigin mapagpatawad. Inot, mansayon an mga bagay-bagay uyon sa pagmansay kan saimong agom. Makakatabang ini na magkaigwa ka nin empatiya, an inaapod kan Bibliya na “pakikidamay.” (1 Pedro 3:8) Sunod, haputon an sadiri, ‘An nagibo daw niya seryosong marhay na dai ko na kayang patawadon?’

  Prinsipyo sa Bibliya: “Kagayunan [para sa saro] an pagpalampas sa mga sala.”—Talinhaga 19:11, NW.

•   Magin mabuot asin makonsiderasyon pag sinasabi an namamatian mo. Imbes na sabihon na “ka” o “mo,” gamiton an “ako.” Halimbawa, imbes na sabihon na, “Dai mo lamang iniisip an namamatian ko pag dai ka nag-aapod kun hain ka na,” sabihon an, “Nahahadit ako pag matanga na tapos dai ko aram kun okey ka lang.” Pag kalmado mong sinasabi an namamatian mo, mas makokontrol mo an saimong kaanggutan.

  Prinsipyo sa Bibliya: “Pirmi lugod na magin mabuot an saindong pagtaram, na tinimplahan nin asin.”—Colosas 4:6.

•   Magalang na magdangog. Pag nasabi mo na an namamatian mo, magdangog man sa sasabihon kan saimong agom asin dai magsaliot. Pag tapos na siya, utruhon an sinabi niya sa sadiri mong pananaram para maaraman kun tama an pagkaintindi mo. An simpleng pagdangog makakatabang na marhay na makontrol mo an saimong kaanggutan.

  Prinsipyo sa Bibliya: “Magin alisto sa pagdangog, maluway sa pagtaram.”—Santiago 1:19.