TABANG PARA SA PAMILYA
Paano Kun Magkaiba Kami nin Opinyon?
An pagkakaiba nin interes, kinatudan, asin personalidad puwedeng magin dahilan nin problema nin sarong mag-agom. Pero may mga isyu na puwedeng magin mas masakit, arog kan:
Panahon para sa mga kapamilya asin kaparyente
Pagbadyet nin kuwarta
Kun baga magkakaigwa nin aki o dai
Ano an puwede mong gibuhon kun magkaiba kamo nin opinyon kan saimong agom?
An dapat mong maaraman
Dawa magkasundo kamo, puwedeng bakong pareho an opinyon nindo. Dawa magkasundong marhay an sarong mag-agom, dai pirming magigin pareho an opinyon ninda, maski manungod sa seryosong mga bagay.
“Close kaming marhay kan mga kapamilya ko. Pag weekend, nagtitiripon-tipon kami kaiba sa lolo saka lola, mga tiyo saka tiya, asin mga pinsan. Bakong arog kaiyan an pamilya ni agom. Kaya magkaiba kami nin opinyon manungod sa kun gurano kadakul na panahon an itatao mi sa mga kapamilya o sa pakikikomunikar sa mga kaparyenteng nasa harayo.”—Tamara.
“Nagdakula kami ni agom sa pamilya na magkaiba nin mga priyoridad sa paggastos nin kuwarta. Kan inot na mga bulan mi bilang mag-agom, pirang beses man kaming nag-argumento dahil diyan. Kinaipuhan ming pag-ulayan iyan nin nagkapirang beses bago iyan naresolberan.”—Tyler.
An duwang tawo tibaad nakahiling sa parehong bagay alagad puwedeng magkaiba an opinyon ninda diyan. Totoo man iyan sa sarong isyu na dai nagkakauyon an mag-agom
May mga problema na dai mareresolberan nin basta pagpahunod lang. Halimbawa, paano kun magkahilang an panugangan mo tapos kaipuhan nang atamanon? O paano kun gusto nin saro sa mag-agom na magkaaki tapos su saro habo? a
“Mga pirang beses mi nang pinag-uulayan ni agom an manungod sa pagkaigwa nin aki. Lalo niyang pinag-iisipan iyan, asin lalo man na nagigin magkaiba an opinyon mi dapit diyan. Dai ko aram kun pa’no kami magkakauyon.”—Alex.
Dai kaipuhan na maraot an saindong relasyon huli sana sa magkaibang opinyon. Sinasabi nin nagkapirang eksperto na kun dai kamo magkauyon kan saimong agom manungod sa sarong seryosong isyu, dapat na gibuhon mo an gabos para ika an masunod—dawa pa kun kaipuhan mong makipagsuwayan. Pero an “solusyon” na iyan nagtatao nin sobra-sobrang importansiya sa saimong emosyon asin binabaliwala an sumpang ginibo mo sa atubangan nin Diyos na ano man an mangyari, magdadanay kang kaibanan kan saimong agom.
An puwede mong gibuhon
Magin determinadong utubon an sumpaan sa kasal. Kun arog kaiyan an saindong kaisipan, maaatubang nindo an problema bilang sarong team imbes na bilang magkalaban.
Prinsipyo sa Bibliya: “An pinagsaro nin Diyos dai pagsuwayon nin siisay man na tawo.”—Mateo 19:6.
Kuwentahon an gastos. Halimbawa, paano kun gusto kan saro sa mag-agom na magkaaki pero habo kan saro? Igwa nin nagkapirang bagay na dapat ikonsiderar:
Kun gurano kakusog kan saindong relasyon.
Makakaya daw kan saindong relasyon an stress sa pagkaigwa nin aki?
Kun ano an mga responsabilidad bilang magurang.
Bako sana pagtao nin kakanon, bado, saka istaran an kalabot diyan.
Kun ano an saindong kamugtakan sa pinansiyal.
Kaya mo daw balansehon an trabaho, pamilya, asin iba pang obligasyon?
Prinsipyo sa Bibliya: “Siisay sa saindo na gustong magpatindog nin tore an dai nguna matukaw asin makuwenta kan gastos?”—Lucas 14:28.
Pag-isipan an gabos na bagay na kalabot. Puwede nindong resolberan an nagkapirang bagay na dai nindo napagkakauyunan manungod sa isyu. Halimbawa, kun an isyu manungod sa pagkaigwa nin aki, an agom na habong magkaaki puwedeng ihapot sa sadiri:
‘Pag sinasabi ko na habo kong magkaaki, an buot ko daw sabihon dai na talaga o dai na nguna?’
‘Nagduduwa-duwa daw ako ta iniisip ko na dai ako magigin marahay na magurang?’
‘Natatakot daw ako na babaliwalaon na ako kan sakong agom?’
Sa ibong na lado, an agom na gustong magkaaki puwedeng ihapot sa sadiri:
‘Andam na daw kami sa mga responsabilidad nin pagigin magurang?’
‘Kaya mi daw an gastos sa pagpadakula nin aki?’
Prinsipyo sa Bibliya: “An saro na igwa nin kadunungan na gikan sa itaas . . . rasonable.”—Santiago 3:17.
Hilingon an mga pakinabang kan opinyon kan saimong agom. An duwang tawo tibaad nakahiling sa parehong bagay alagad puwedeng magkaiba an opinyon ninda diyan. Sa kaparehong paagi, puwedeng magkaiba an opinyon nin mag-agom manungod sa sarong isyu—halimbawa, kun paano babadyeton an kuwarta. Sa pag-uulay manungod sa sarong bagay na magkaiba kamo nin opinyon, magpuon sa bagay na nagkakauyon kamo.
Anong pasuhan an magkauyon kamo?
Ano an mga pakinabang kan lambang opinyon?
Tanganing magdanay na makusog an relasyon nindo, puwede daw na an saro saindo, o pareho kamo, mag-adjust nin opinyon bilang konsiderasyon sa saimong agom?
Prinsipyo sa Bibliya: “Padagos na hanapon kan lambang saro, bako an para sa sadiri niyang kapakinabangan, kundi an para sa ibang tawo.”—1 Corinto 10:24.
a An seryosong mga isyu dapat na pag-ulayan bago an kasal. Pero, puwedeng may mangyaring mga dai inaasahan, o an opinyon nin saro sa mag-agom puwedeng magbago sa paglihis nin panahon.—Parahulit 9:11.