Nasa harong lang an aki mo asin mayong magibo. “Maka-boring!” an sabi niya. Bago mo buksan an TV o sabihon na magkawat na lang kan paborito niyang video game, pag-isipan nguna an pirang bagay na ini.

•   Puwedeng makadagdag sa problema an klase nin libangan saka an lawig nin panahon na itinatao diyan. Sinabi kan amang si Robert: “Para sa nagkapirang aki, boring an pang-aroaldaw na buhay kun ikukumparar sa pag-TV o pag-video game. Bakong gayong exciting sainda an normal na mga aktibidad.”

   Uyon diyan an agom niyang si Barbara. Sinabi niya: “Sa totoong buhay, kaipuhan tang mag-isip saka maghinguwa, asin sa parati haloy makua an resulta. Nakaka-boring iyan sa mga aki na dakulon na oras na nagti-TV o nagbi-video game.”

•   An pagparahiling sa social media puwedeng magresulta sa nakakaraot na pagkumparar. Kun maparahiling an sarong hoben sa mga post kan mga amigo niya, puwede niyang maisip na boring an buhay niya. “Madali lang isipon, ‘Gabos sinda nag-i-enjoy, tapos ako nasa harong lang,’” an sabi kan hoben na si Beth.

   Saro pa, pag haluyon kang nagpaparahiling sa social media, puwede mong mamatian na nasayang sana an oras mo—asin nabo-boring ka pa man giraray. “Iyo, dahil diyan may ginigibo ka, pero pagkatapos, mayo ka man nahaman,” an sabi kan hoben na si Chris.

•   An pagka-boring puwedeng magin oportunidad. Sinabi kan inang si Katherine na pag nabo-boring an mga aki, oportunidad iyan na magin creative sinda. Halimbawa, sinabi niya: “An simpleng box nagigin time capsule, kotse, bangka, o spaceship. An tamong na pigkabit sa ibabaw nin mga furniture nagigin tent.”

   Dahil diyan sinabi kan psychologist na si Sherry Turkle na “an pagka-boring an mapukaw sa pagigin creative mo.” a Kaya okey lang na ma-boring. Sa katunayan, sinasabi kan librong Disconnected: “Pag nagwe-weights ka, nagkukusog an muscle mo. Arog man kaiyan pag nabo-boring ka—nagagamit mo an imahinasyon mo kaya nagigin mas creative ka.”

 Tandaan: Dai isipon na problema an pagka-boring kan mga aki mo, kundi sarong oportunidad na tabangan sindang magin creative.

•   Kun itinutugot kan kamugtakan, pakawaton sa luwas an mga aki mo. Si Barbara, na sinambit kasubago, nagsabi: “Nakakahanga talaga kun paano nahahali kan sinag kan saldang saka nin preskong duros an pagka-boring. Pag nagkakawat na sa luwas an mga aki mi, mas nagagamit nindang marhay an imahinasyon ninda!”

   Prinsipyo sa Bibliya: “May itinalaan na panahon para sa gabos na bagay, . . . panahon na magngisi [asin] panahon na magbayle.”—Parahulit 3:1, 4, NWT.

   Pag-isipan: Ano an mga magigibo ko para mas makakawat sa luwas an mga aki ko? Kun dai puwedeng magkawat sa luwas, anong exciting na mga aktibidad an puwede nindang gibuhon sa laog kan harong?

•   Tabangan an mga aki mo na isipon an kapakanan kan iba. Ini an suhestiyon kan inang si Lilian: “Hawanan an natad nin sarong may edad na amigo o kagkagon an mga dahon sa natad niya o lutuan siya nin kakanon saka kumustahon. Nagtatao nin tunay na kaugmahan an paggibo nin mga bagay para sa iba.”

   Prinsipyo sa Bibliya: “An tawong bukas-palad mag-uuswag, asin an siisay man na nagpapaginhawa sa iba papaginhawahon man.”—Talinhaga 11:25, NWT.

   Pag-isipan: Paano mo matatabangan an aki mo na magin maugma sa paggibo nin mga bagay para sa iba?

•   Magin marahay na halimbawa. May epekto sa mga aki mo an mga sinasabi mo manungod sa mga ginigibo mo sa aroaldaw. Si Sara, na sarong ina, nagsabi: “Kun iniistorya ta na garo baga boring an buhay ta, tinutukduan tang ma-boring an mga aki ta. Pero pag iniisitorya ta na nag-i-enjoy kita sa mga ginigibo ta, tinatabangan ta an satong mga aki na magin arog man kaiyan.”

   Prinsipyo sa Bibliya: “An saro na may maugmang puso igwang dagos-dagos na kapiyestahan.”—Talinhaga 15:15, NWT.

   Pag-isipan: Paano ko iniistorya sa mga aki ko an mga ginigibo ko sa aroaldaw? Ano an nahihiling ninda sako pag nabo-boring ako?

 Tip: Tabangan an mga aki mo na gumibo nin lista nin exciting na mga aktibidad. “May suggestion box kami na diyan ihinuhulog kan gabos sa pamilya mi an mga ideya ninda,” an sabi kan inang si Allison.