An siisay man na nakapurbar nang manggadan nin langaw makakapagsabi kun gurano nanggad iyan kadipisil. Marikason an reaksiyon kan mga insektong ini, kaya nadudulagan kaiyan an haros gabos na pagpurbar na matamaan iyan.

 Nadiskubre kan mga siyentista na may sarong klase nin langaw, an fruit fly, na may kakayahan na magmaniobra kaagid kan mga fighter jet. Pero nagigibo ini kan mga fruit fly sa laog sana nin pirang millisecond. Pag nagkapakpak na an mga fruit fly, “nakakalayog sinda na garo eksperto,” an sabi ni Professor Michael Dickinson. “Garo man sana iyan bagong mundag na umboy na ginibong piloto sa sarong eroplanong panggiyera tapos aram na niya an gigibuhon.”

 Pig-video nin mga parasiyasat an paglayog kan mga fruit fly asin nadiskubre ninda na ikinakampay kan mga insektong ini an pakpak ninda nin 200 na beses kada segundo. Pero, tama na an sarong kampay tanganing mabago an posisyon kan saindang hawak para makadulag.

 Gurano karikas an reaksiyon kan mga fruit fly? Nadiskubre kan mga parasiyasat na an reaksiyon kan mga ini sa peligro 50 beses na mas marikas kisa sa pagpirok kan mata nin tawo. “Naggigibo nin komplikadong marhay na pagtantiya an langaw, sa haliputon na panahon, tanganing maaraman kun sain an peligro asin an eksaktong direksiyon na lalayugan kaini para makadulag,” an paliwanag ni Dickinson.

 Saditon an hutok kan mga fruit fly kaya paano ninda iyan nagigibo? Sarong misteryo ini sa engineering na gustong maaraman kan mga parasiyasat.

 Ano sa hiling mo? Resulta daw nin ebolusyon an kakayahan kan fruit fly sa pagmaniobra? O may nagdisenyo kaiyan?