Icilonganino ca mapepo ica Nte sha kwa Yehova cilacindika sana insambu sha bantu kabili tacisabankanya ifyebo fya kubeshibilako. Icilonganino calishiba ico cacindamina ukulanshanya bwino no kusunga ifyebo fya kwishibilako muntu e lyo ne fyebo fya nkama pa kuti cibombe imilimo ya kwafwilisha aba mu cilonganino ca Nte sha kwa Yehova no mulimo wa kubila imbila nsuma no wa kwafwa abantu. Na kabili cilasunga inkama no kushininkisha ukuti ifyebo naficingililwa bwino. (Amapinda 15:22; 25:9) Twalibika sana amano ku kusunga inkama.—Amapinda 20:19.

Ifyalo ifingi fyalibikako amafunde pa kuti ifyebo fya kwishibilako abantu ifyo babika pa Intaneti filasabankanishiwa ku bantu bambi. Icilonganino ca Nte sha kwa Yehova catendeke ukucindika insambu sha bantu no kusunga inkama ninshi takulaba na mafunde ayalanda pa kucingilila ifyebo fya kwishibilako abantu. Na kuba, tacakaleke ukusunga bwino ifyebo mwingatuma.

Ifyo Icilonganino Cikonka pa Kusunga Ifyebo. Ifyo icilonganino ca Nte sha kwa Yehova cikonka pa kubomfya ifyebo abantu batuma ni fi:

1. Icilonganino ca kulabomfya ifyebo fya kwishibilako abantu ukulingana na mafunde.

2. Icilonganino nga capoka ifyebo pa muntu, ca kulafibomfya fye ku mulimo wa kwafwa abantu na ku milimo imbi iyo Inte sha kwa Yehova shibomba.

3. Icilonganino ca kulasunga ifyebo fya kumwishibilako ifyalungama kabili ca kulayalulako fimo nga calinga. Na kabili ca kulalungika ifyebo ilyo line fye caishiba ukutila tafilungeme.

4. Icilonganino tacakulatwalilila ukusunga ifyebo nga ca kuti imilimo balefifwaila yapwa.

5. Icilonganino ca kulacindika insambu sha bantu abacitumina ifyebo.

6. Icilonganino tacakapeele ifyebo fya kwishibilako umuntu kuli bambi abashakwata insambu sha kufishiba ne lyo ukufimona. Amakompyuta yonse apo icilonganino cisungila ifyebo yalakomwa, kabili bantu fye abo icilonganino casuminisha e besula aya amakompyuta. Amaofeshi umwaba aya makompyuta yalakomwa nga ca kuti inshita ya kwinuka yafika, kabili abengilamo fye bantu abasuminishiwa.

7. Icilonganino tacakulatuma ifyebo fya kwishibilako umuntu ku maofeshi yambi aya Nte sha kwa Yehova, kano fye nga ca kuti cilingile ukutuma ifyo fyebo pa kuti cibombe imilimo cakwata. Umuntu onse nga aaba Inte ya kwa Yehova ninshi asumina ukutila kuti twabomfya ifyebo fya kumwishibilako mu nshila tulondolwele pali lino ibula.

Aya e amafunde icilonganino cikonka ilyo tulebomfya ifyebo fya kwishibilako umuntu ifyo balondolola mu citabo ca Abateyanishiwa ku Kucita Ukufwaya kwa kwa Yehova, kabili umuntu nga atendeka ukulashimikila ne cilonganino, balamupeela ici icitabo. Nga mulefwaya ukwishibilapo na fimbi, belengeni icitabo ca Abateyanishiwa ku Kucita Ukufwaya kwa kwa Yehova.

Icilonganino cilacindika insambu sha bantu, cilacingilila ifyebo fya kwishibilako abantu, cilacingilila ifyebo fya nkama, kabili cilalungika nelyo ukufuuta ifyebo nga calinga. Ifyo icilonganino cicita balifilondolola pa mutwe uutila Insambu Shenu mu cipande citila Ifyo Inte sha kwa Yehova Shisunga Ifyebo.

Ifi twalandapo pa Ifyo Icilonganino ca Nte sha kwa Yehova Cisunga Ifyebo mwi Sonde Lyonse, e fyo ba Nte mwi sonde lyonse bakonka pa kubomfya ifyebo fya kwishibilako umuntu.