Baibolo tayalandapo mu kulungatika pa madainoso. Na lyo line Baibolo yalilanda ukuti Lesa e ‘wabumbile ifintu fyonse,’ kanshi ishi nama shifwile shali pa fintu ifyo abumbule. * (Ukusokolola 4:11) Nangu ca kuti Baibolo tayalumbula ishi nama pe shina, yalilanda pa mabumba ya nama nalimo apo na ishi nama shali:

•   “Fishimweshimwe fya muli bemba.”—Ukutendeka 1:21.

•   “Ifikulika mu misango ya fiko.”—Ukutendeka 1:25.

•   “Inama sha mu mpanga isha pano isonde.”—Ukutendeka 1:25.

Bushe amadainoso yasangwike fye ukufuma ku nama shimbi?

 Amafupa ayo basanga yalanga ukuti ishi nama tashalesanguka panono panono lelo shaishilebako fye. Ifi fine e fyo na Baibolo ilanda ukuti Lesa e wabumbile inama shonse. Ku ca kumwenako pa Amalumbo 146:6 palanda pali Lesa ukuti e “wapangile umuulu ne sonde, bemba, na fyonse ifyabamo.”

Ni lilali amadainoso yali pano calo?

 Baibolo ilondolola ukuti inama sha muli bemba ne sha ku mulundu shabumbilwe mu bushiku bwalenga 5 na 6, nelyo mu ciputulwa icikalamba ica nshita ilyo ifintu fyalebumbwa. * (Ukutendeka 1:20-25, 31) Kanshi ukulingana na Baibolo kwali inshita iikalamba iyo amadainoso yali pano isonde.

Bushe imfubu ne ng’wena na fyo madainoso?

 Awe. Ishiwi lya ciHebere behe·mohthʹ lilosha ku nama iikalamba sana ne lya kuti liw·ya·thanʹ lilosha ku nama ishakalabana. Nangu ca kuti ishi nama isho balandapo mwi buuku lya kwa Yobo tatwashishiba bwino bwino, shaishibikwa ukuti imo ni mfubu e lyo imo ni ing’wena. Ifi fyalilingana ne fyo Amalembo yalondolola ishi nama. (Yobo 40:15-23; 41:1, 14-17, 31) Na lyo line ishiwi lya kuti behe·mohthʹ ne lya kuti liw·ya·thanʹ talilosha ku madainoso. Lesa aebele Yobo ukulolekesha ishi nama, kabili Yobo alikele imyaka iingi ninshi amadainoso yalipwa pano isonde.—Yobo 40:16; 41:8.

Bushe amadainoso yayakwi?

 Baibolo tayalandapo pa fyalengele ishi inama shilobe. Lelo yalilanda ukuti ifintu fyonse fyabumbilwe “pa mulandu wa kufwaya [kwa kwa Lesa],” kanshi Lesa alishibe ico abumbiile amadainaso. (Ukusokolola 4:11) Ilyo umulimo ashibumbile wapwile, Lesa alilekele shaloba.