Finshi Baibolo Yalanda Pali Isita?
Icasuko ca mu Baibolo
Baibolo tayalandapo ukuti tufwile ukulasefya Isita. Nga mwafwailisha pa fyo batendeke ukusefya Isita, mukasanga ukuti abantu balesefya Isita kale pa kuti babe no bufyashi. Moneni ifyebo fyakonkapo.
Ishina: Icitabo ca Encyclopaedia Britannica calanda ukuti: “Ishina lya ciNgeleshi ilya kuti Easter talyaishibikwa bwino uko lyafuma; shimapepo umwina Anglo-Saxon, Venerable Bede, uwaliko muli ba 1700 alifumishe kwi shina lya kwa lesa mwanakashi, Eostre, uwa Anglo-Saxon.” Bambi batila lyafumine kuli lesa mwanakashi Astarte, lesa wa bufyashi ubwa bena Foinike uwapalana na lesa wa bena Babiloni, Ishtar.
Bakalulu: Icitabo ca Encyclopaedia Britannica calanda ukuti kalulu cishibilo ca bufyashi “ico balebomfya pa kusefya kwa bena kale kabili abena Europe na bena Middle East abasenshi balebomfya akalulu pa mitebeto yabo iyalebako mu April.”
Amani: Icitabo citila Funk & Wagnalls Standard Dictionary of Folklore, Mythology and Legend, calanda ukuti amani babomfya pa kusefya Isita, ayo batila ni bakalulu baletele, “tayaleba ya kwangasha fye, lelo yali cishibilo ca bufyashi.” Bamo basumine ukuti ilini lya pa Isita “kuti lyalenga abantu ukuba ne nsansa, ifyuma, ubumi ubusuma, kabili kuti lyabacingilila.”—Traditional Festivals.
Ukufwala ifipya pa Isita: Icitabo citila The Giant Book of Superstitions catila: “Abena Scandinavia balemona ukuti nga taufwele ifya kufwala ifipya e lyo waposha lesa wabo umwanakashi uwa mu April, nelyo Eastre, ninshi wamusaalula kabili ninshi waba ne shamo.”
Amapepo ya lucelo: Abalecita ifi, bena kale abalepepa akasuba. “Balecita ifi mu April pa kusengela akasuba ako baleti kalikwete amaka ya kulenga ifimenwa fyonse ukukula cipya cipya.”—E filanda icitabo ca Celebrations—The Complete Book of American Holidays.
Icitabo ca The American Book of Days calilondolola bwino bwino ukwafumine Isita, catila: “Ukwabula no kutwishika bashimapepo ba mu macalici ya kubalilapo e batampile ukusefya amaholide ya mu mipepele ya bufi e lyo balatila ya Bena Kristu.”
Baibolo ilasoka Abena Kristu ukuti tabafwile ukulakonka intambi isho Lesa apata pa kumupepa. (Marko 7:6-8) Pali 2 Abena Korinti 6:17 patila, ‘“ipaatuleniko,” e fyasosa Yehova, “kabili mwi-ikatako ku cishasanguluka.”’ Isita ni holide ya mu mipepele ya bufi kabili abafwaya ukusekesha Lesa tabafwile ukulasefya Isita.
Nalimo Kuti Mwatemwako ne fi
PA NTE SHA KWA YEHOVA
Icibukisho ca Mfwa ya kwa Yesu
Cila mwaka abantu abengi sana balalongana pamo ku kwibukisha imfwa ya kwa Yesu. Mukwai tulemwita ukwisalongana na ifwe pa kuti mukeshibe ifyo uku ukulongana ukwacindama kwamukuma.
ULUPUNGU LWA KWA KALINDA
Bushe ca Cine Yesu Alibuukile?
Cinshi twingalandila ukuti ifyo amabuuku ya Mbila Nsuma yalanda pa kubuuka kwa kwa Yesu fya cine?
ULUPUNGU LWA KWA KALINDA
Bushe Abena Kristu Balingile Ukulasefyako Isita
Finshi abasambilila sana aba kale balandapo pali Isita?
AMEPUSHO ABANTU BEPUSHA SANA
Cinshi Inte sha kwa Yehova Bashisefeshako Isita?
Abantu bamona Isita ukuti kusefya kwa Bena Kristu. Cinshi Inte sha kwa Yehova bashisefeshako Isita?
PA NTE SHA KWA YEHOVA
Lombeni Ukumutandalila
Lanshanyeni icipusho ca mu Baibolo, nelyo ishibilenipo na fimbi pa Nte sha kwa Yehova.