Bushe Inama Shilaya ku Muulu nga Shafwa?
Icasuko ca mu Baibolo
Baibolo isambilisha ukuti, pa fibumbwa fyonse ifya pe sonde, abantu fye abanono e bakaya ku muulu. (Ukusokolola 14:1, 3) Ico aba bantu baila ku muulu, ni mukuba ishamfumu kabili bashimapepo abakuteka na Yesu. (Luka 22:28-30; Ukusokolola 5:9, 10) Lelo abantu bambi abengi bakabuushiwa ilyo isonde likaba paradaise.—Amalumbo 37:11, 29.
Baibolo tayalandapo ukuti inama shilaya ku muulu. Ico tayalandilapo ni co, inama te kuti icite ifyo umuntu afwile ukucita pa kuti afikepo ukuba pa “baitwa mu muulu.” (AbaHebere 3:1) Ifilenga umuntu afikapo, kwishiba icine, ukulacita ifyo tulesambilila no kulakonka amafunde ya kwa Lesa. (Mateo 19:17; Yohane 3:16; 17:3) Abantu e bo fye Lesa apangile ukuti belafwa.—Ukutendeka 2:16, 17; 3:22, 23.
Pa kuti umuntu aye ku muulu alingile ukubuushiwa. (1 Abena Korinti 15:42) Baibolo yalilanda pa bantu ababuushiwe. (1 Ishamfumu 17:17-24; 2 Ishamfumu 4:32-37; 13:20, 21; Luka 7:11-15; 8:41, 42, 49-56; Yohane 11:38-44; Imilimo 9:36-42; 20:7-12) Baibolo ilanda fye pa bantu ukuti e babushiwe, tayalandapo ukuti inama na sho shalibushiwe.
Bushe inama nga shafwa shiba shani?
Baibolo ilanda ukuti inama na bantu fya myeo. Fyonse fyapangwa ne fintu fibili: “ulukungu lwa mu mushili” na “umupu wa bumi.—Ukutendeka 1:24; 2:7; Impendwa 31:28.
Baibolo na kabili itweba ukuti umuntu ne nama fyonse filafwa. (Ukufuma 19:13) Umuntu nga afwa abwelela kwiloba, e fyo ciba na ku nama nayo nga yafwa, ibwelela kwiloba. (Lukala Milandu 3:19, 20) Mu mashiwi yambi kuti twatila fyonse filaleka ukubako. *
Bushe inama shilabembuka?
Awe. Ukubembuka kutontonkanya, ukumfwa nelyo ukucita fimo ifilenga twatoba amafunde ya kwa Lesa. Ifilenga umuntu ukubembuka fintu asalapo ukucita, na lyo line, inama tashakwata amaka ya kuisalilapo ifyo shingacita pantu shibomfya umununsha. (2 Petro 2:12) Na kabili, shilafwa nga shakula nangu ca kuti tashibembwike.
Bushe ukucusha inama kwalisuminishiwa?
Awe. Lesa apeele abantu amaka ya kulasunga inama, te kulashicusha iyo. (Ukutendeka 1:28; Amalumbo 8:6-8) Lesa alibika amano ku nama, ukubikako fye ne fyuni. (Yona 4:11; Mateo 10:29) Lesa aebele abantu bakwe ukuti balesunga bwino inama.—Ukufuma 23:12; Amalango 25:4; Amapinda 12:10.
^ Nga mulefwaya ukwishibilapo na fimbi, moneni icipandwa 6 mu citabo citila Bushe Cinshi Baibolo Isambilisha?
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Umweo Cinshi?
Bushe umweo cintu icaba mu kati ka muntu? Bushe ulatwalilila ukubako na panuma umuntu afwa?
AMASUKO KU MEPUSHO YA MU BAIBOLO
Ni Bani Baya ku Muulu?
Abengi baishiba ukuti abantu abasuma bakaya ku muulu. Cinshi Baibolo isambilisha?
ULUPUNGU LWA KWA KALINDA
BAIBOLO ILAALULA ABANTU
PA NTE SHA KWA YEHOVA
Lombeni Ukumutandalila
Lanshanyeni icipusho ca mu Baibolo, nelyo ishibilenipo na fimbi pa Nte sha kwa Yehova.