Amashiwi ya kuti ‘ukulandila mu ndimi shimbi’ yalosha ku cipesha amano icacitike icalengele Abena Kristu bamo mu nshita ya batumwa balelanda indimi isho bashabalile abasambililapo. (Imilimo 10:46) Bonse abalekutika ku balelandila mu ndimi baleumfwa ifyo balebeba mu lulimi lwabo. (Imilimo 2:4-8) Ukulandila mu ndimi kwali pa fya bupe fya mupashi ifyo Lesa apeele Abena Kristu bamo mu nshita ya batumwa.​—AbaHebere 2:4; 1 Abena Korinti 12:4, 30.

•  Ni lilali kabili ni kwi batendekele ukulandila mu ndimi?

•  Mulandu nshi Lesa abapeelele ica bupe ca kulandila mu ndimi?

•  Bushe ukulandila mu ndimi kwali no kutwalilila?

•  Ni lilali ukulandila mu ndimi kwapwile?

•  Bushe na muno nshiku Abena Kristu balalandila mu ndimi?

•  Bushe Abena Kristu ba cine beshibikilwa kuli finshi?

 Ici icipesha mano cabalilepo ukucitika mu Yerusalemu ulucelo pa bushiku kwali Umutebeto wa baYuda uwa Pentekoste mu 33 C.E. Abasambi ba kwa Yesu nalimo 120 balilongene ilyo “bonse baiswilemo umupashi wa mushilo no kutendeka ukulanda indimi shalekanalekana.” (Imilimo 1:15; 2:1-4) Ibumba ilikalamba ilya bantu “abafumine mu nko shonse isha mwi samba lya muulu” balilongene, kabili bonse “umo na umo aumfwile abasambi balelandila mu lulimi lwakwe.”​—Imilimo 2:5, 6.

1.   Pa kulanga ukuti Lesa aletungilila Abena Kristu. Kale, Lesa alebomfya ifipesha mano pa kulanga ukuti aletungilila abantu bakwe aba cishinka pamo nga Mose. (Ukufuma 4:1-9, 29-31; Impendwa 17:10) Ifi fine e fyo no kulandila mu ndimi kwali, kwalelanga ukuti Lesa aletungilila icilonganino ca Bena Kristu icali fye icipya. Umutumwa Paulo alembele ati: “Indimi cishibilo ku bashatetekela, te ku batetekela.”—1 Abena Korinti 14:22.

2.   Pa kuti Abena Kristu bashimikishe ubunte. Bamo abaumfwile abasambi ba kwa Yesu pa bushiku bwa Pentekoste batile: “Tulebomfwa balelandila mu ndimi shesu ifikalamba ifya kwa Lesa.” (Imilimo 2:11) Kanshi na cimbi ico Lesa apeelele Abena Kristu ba mu nshita ya batumwa ica bupe ca kulandila mu ndimi, ni pa kuti ‘bashimikishe ubunte’ no kulenga “aba nko shonse ukuba abasambi” nga fintu fye Yesu abebele. (Imilimo 10:42; Mateo 28:19) Pa bantu abamweneko cilya icipesha amano nalimo 3,000 balisangwike abasambi pali bulya bwine bushiku.—Imilimo 2:41.

 Awe. Ifya bupe fya mupashi wa mushilo apali no kulandila mu ndimi, tafyali no kutwalilila. Baibolo yasobele ukuti: “Ica bupe ca kusesema, nangu ica kulandila mu ndimi, fyonse ifi fikapwa.”—1 Abena Korinti 13:8.

 Abatumwa balepeelako Abena Kristu bambi ifya bupe fya mupashi wa mushilo, ilingi line abatumwa balebika iminwe pa basumina banabo. (Imilimo 8:18; 10:44-46) Cimoneka kwati abapokelele ifya bupe fya kulandila mu mupashi wa mushilo ukufuma ku batumwa tabapeeleko bambi. (Imilimo 8:5-7, 14-17) Katulangilile, umukalamba uwa buteko kuti apeela icitupa ca kwa namutekenya ku muntu umo, nomba uyo muntu takwata amaka ya kupeelako umuntu umbi. Kanshi ukulandila mu ndimi kwapwile ilyo abatumwa, nabo bapeeleko amaka ya kulandila mu ndimi bafwile.

 Ica bupe ica kulandila mu ndimi capwile ilyo abatumwa bapwile ukufwa. Muno nshiku takuli umuntu nangu umo uwingalanda ukuti umupashi wa kwa Lesa ulalenga alandila mu ndimi. *

 Yesu atile ukutemwa e kukeshibisha abasambi bakwe. (Yohane 13:34, 35) Umutumwa Paulo na o asambilishe ukuti ukutemwa kwali no kutwalilila ukwishibisha Abena Kristu ba cine. (1 Abena Korinti 13:1, 8) Alandile ukuti umupashi wa kwa Lesa wali no kulenga Abena Kristu baba ne mibele iyo Baibolo iita ukuti “ifisabo fya mupashi,” icisabo ca kubalilapo pali ifi fisabo kutemwa.—Abena Galatia 5:22, 23.