Mulandu Nshi Yesu Etilwa Ukuti Mwana wa kwa Lesa?

TINIKENI

Icasuko ca mu Baibolo

Muli Baibolo Yesu etwa ukuti “Umwana wa kwa Lesa.” (Yohane 1:49) Amashiwi ya kuti “Umwana wa kwa Lesa” yalenga twaishiba ukuti Lesa e Kabumba, nelyo e Ntulo ya bumi bonse kabili e wabumbile na Yesu. (Amalumbo 36:9; Ukusokolola 4:11) Baibolo taitweba ukuti Lesa afyele Yesu nga fintu abafyashi abantunse bafyala abana.

Baibolo ita bamalaika ukuti “abana baume ba kwa Lesa wa cine.” (Yobo 1:6) Na kabili itweba ukuti umuntu wa kubalilapo Adamu na o ali ni “mwana Lesa.” (Luka 3:38) Na lyo line, apo Yesu e o Lesa abalilepo ukubumba kabili e o aibumbiile umwine, Baibolo ilanda pali ena ukuti e Mwana wa kwa Lesa uwacindamisha.

Bushe Yesu ali ku muulu ilyo ashilaisa pano isonde?

Ee. Yesu ali cibumbwa ca mupashi ku muulu ilyo ashilaisa pano isonde no kufyalwa ngo muntunse. Yesu alandile ukuti: ‘Nafuma ku muulu.’—Yohane 6:38; 8:23.

Lesa abalilepo ukubumba Yesu ilyo ashilabumba ifintu fyonse. Baibolo ilanda pali Yesu ukuti:

“Ena . . . e beli pa fibumbwa fyonse.”—Abena Kolose 1:15.
E o “Lesa abalilepo ukupanga.”—Ukusokolola 3:14.

Yesu alifikilishe ubusesemo ubulanda pa muntu “uo intulo yakwe ya ku kale, ku nshita sha muyayaya.”—Mika 5:2; Mateo 2:4-6.

Finshi Yesu alecita ilyo talaisa pano isonde?

Alikwete icifulo icacindama sana ilyo ali ku muulu. Yesu alilandile pali ici cifulo ilyo apepele ukuti: “Tata, ncindamikeni . . . pa kuti nkwate ubukata ubo nakwete lintu nali pamo na imwe ilyo icalo cishilabako.”—Yohane 17:5.

Alyafwile Wishi ukupanga ifintu fyonse. Yesu alebombela pamo na Lesa “ngo waishibisha imilimo.” (Amapinda 8:30) Baibolo ilanda pali Yesu ukuti: “Muli ena e mo ifintu fyonse fyapangiilwe mu muulu na pano isonde.”—Abena Kolose 1:16.

Lesa abomfeshe Yesu pa kupanga ifintu fyonse. Pa fyo Lesa apangile ukubomfya Yesu paba bamalaika e lyo no muulu. (Ukusokolola 5:11) Pa kupanga ifintu fimo, Lesa alebombela pamo na Yesu nga filya uulenga amapulani ya fikuulwa abombela pamo na kakuula. Uulenga amapulani alalenga pulani ya fyo icikuulwa cifwile ukuba, lyena kakuula alakuula ukulingana ne yo pulani.

Ali ni Cebo. Baibolo ilanda ukuti ilyo Yesu ashilaisa pano isonde ngo muntunse, ali ni “Cebo.” (Yohane 1:1) Kanshi Lesa alebomfya Yesu pa kulanda ne fibumbwa fimbi ifya ku mupashi.

Cimoneka kwati Yesu e o Lesa alebomfya na pa kulanda na bantunse pe sonde. Lesa nalimo alebomfya Yesu nga Cebo pa kulanda na Adamu na Efa ilyo bali mwi bala lya Edeni. (Ukutendeka 2:16, 17) Nalimo malaika uwaletungulula abena Israele mu matololo kabili uo balingile ukulaumfwila, ali ni Yesu.—Ukufuma 23:20-23. *

^ Te lyonse Lesa alebomfya Cebo pa kulanda na bantu. Ku ca kumwenako, alibomfeshe bamalaika bambi pa kupeela abena Israele amafunde yakwe.—Imilimo 7:53; Abena Galatia 3:19; AbaHebere 2:2, 3.