Abacaice abengi tabasakamana pa fya kusunga abafyashi babo. Na kuba kuti papita imyaka iingi pa kuti abafyashi babo bakatendeke ukulalwalilila.

 Nomba kuti wacita shani nga ca kuti abafyashi bobe balwala ilyo ucili umwaice? Lekeni tumone ifya kumwenako fibili ifya bacaice.

•  Ifyacitikile Emmaline

•  Ifyacitikile Emily

 Bamayo balilwala ubulwele beta ukuti Ehlers-Danlos syndrome (EDS), ubu ubulwele tabupola kabili bulakalifya sana umubili, bwikata sana umwasuntinkanina amafupa, inkanda na imishipashipa.

 Ubu ubulwele tabwakata umuti, kabili ubumi bwa bamayo bwalibipilako mu myaka 10 iyapita. Inshita shimo umulopa wabo ulacepa ica kuti nalamona fye kwati balafwa, limo nalyo balakalipwa sana ica kuti bafwayafye ukufwa.

 Ifwe bonse mu lupwa tuli Nte sha kwa Yehova, kabili aba mu cilonganino balatukoselesha sana! Ku ca kumwenako, tapakokwele, umukashana uo iningene nankwe alitumiine ulupwa lwesu kardi, no kutweba ukuti alitutemwa sana no kuti akulatutungilila. Cilawama ukukwata umuntu wa musango uyu nga cibusa!

 Ifyebo fyaba muli Baibolo filangafwa sana. Ku camwenako, nalitemwa sana ilembo lya Amalumbo 34:18 ilitila: “Yehova ali mupepi ku baba ne mitima ya bulanda.” Ilembo na limbi lya AbaHebere 13:6 ilitila: “Yehova e kaafwa wandi; nshakatiine.”

 Amashiwi yaba pali ili ilembo lya baHebere yalankoselesha sana. Ico ntiina sana ca kuti bamayo kuti bafwa. Nalibatemwa sana, kabili ndomfwa bwino ukuba nabo cila bushiku. Ili ilembo lilenga ni nilaumfwa umwenso no kuti nangu ifintu fikafye shani ku ntanshi, nkaba na maka.

 Na kabili kwaliba na cimbi icintiinya. Ubu ubulwele bwa mu lupwa. Bamama balilwele ubu bulwele kanshi bamayo bafyelwe nabo, na ine nalilwala ubu ubulwele. Lelo amashiwi yaba pa AbaHebere 13:6 yalangafwa ukwishiba ukuti Yehova ni “kaafwa wandi” na muli ubu bwine bwafya.

 Pali ino nshita, nabika sana amano ku fyo nakwata, nshikalilafye ukulatontonkanya pa fyo ifintu fyali nelyo ifyo fikaba ku ntanshi. Kuti ndeba sana no bulanda nga nalatontonkanya pa fyo bamayo bali ilyo tabalatendeka ukulwalilila na pa fyo bali pali ino nshita. Baibolo ilanda ukuti amafya tukwata ya ‘pa kashita fye kabili yalyanguka’ nga kuyalinganya ku bumi bwa muyayaya ubo tukakwata ilyo tushakalelwala.—2 Abena Korinti 4:17; Ukusokolola 21:1-4.

 Ifya kutontonkanyapo: Finshi fyafwa Emmaline ukuba ne nsansa? Kuti mwaba shani ne nsansa nangu ca kuti muli na mafya?

 Ilyo nali ku sukulu lya ku sekondari, batata balitendeke ukuba no bulanda sana. Batata balyalwike. Ukutula ilya nshita, batata balaba sana no bulanda no mwenso. Ifi e fyo bomfwa pa myaka 15 nomba. Bafwile baleumfwa sana ububi apo limo baleba no bulanda ukwabula ukwishiba icilengele ukuti baleumfwa ifyo!

 Tuli Nte sha kwa Yehova, kabili aba mu cilonganino twabamo balatwafwa sana. Aba mu cilonganino baliba sana ne cikuuku kabili balatumfwikisha, e lyo tabalenga batata balamona kwati tapali ifyo bengacita mu cilonganino. Nga namona ifyo batata bashipikisha ubu bwafwa cilalenga ndebatemenwako sana.

 Ndafuluka ifyo batata baali ilyo tabalalwala, bali ne nsansa. Ndomfwa sana ububi pantu balalwishanya no bulwele ubo bashingacitapo icili conse.

 Na lyo line, batata balabombesha pa kuti balebika sana amano ku bulwele balwala. Ilyo balwele sana nomba line, baleibikilishako ukubelenga ifikomo ifinono fye muli Baibolo cila bushiku. Ifyo balecita fyalibafwile sana pantu fyalilengele baleumfwako bwino. Ilyo namwene ifyo balecita, nalibatemenweko.

 Nalitemwa amashiwi yaba pali Nehemia 8:10 ayatila: “Ukusekelela muli Yehova e bucingo bwenu.” Aya amashiwi ya cine, pantu nsansa ing’umfwa ilyo ndi na ba mu cilonganino, ilyo ndeyasukapo e lyo na lintu ndecitako fimo mu cilonganino, filalenga nilaba sana no bulanda. Kuli batata nalisambililako ukuti, nangu ningaba no bulanda shani, Yehova akulangafwa.

 Ifya kutontonkanyapo: Bushe Emily afwilisha shani bawishi apo balilwalilila? Kuti mwayafwilisha shani umuntu uwaba no bulanda?