Uletipo shani?

•   Bushe calilubana ukwipusha abasobela ifya ku ntanshi, abatila balalanshanya ne mipashi ya bafwa, nelyo abatila baleshiba ifyo bambi baletontonkanya?

•   Bushe amalyashi ya buloshi ya kutwafwa fye ukwishiba ifibi ne fisuma nelyo malyashi ya cine ayengatuletelela?

 Cino cipande cilelanda pa cingalenga abantu balamona kwati ifya mipashi fyaliba fye bwino kabili cilelanda na pa co tulingile ukufisengaukila.

•  Cinshi abantu bamwena kwati fyaliba fye bwino?

•  Mulandu nshi tulingile ukufisengaukila?

•  Finshi wingacita?

•  Ifyo abacaice banobe balandapo

 Abapanga ifya kuleseshamo icitendwe balipanga indalama ishingi ukubomfya ifya kuleseshamo icitendwe ifyo bapanga umwaba ubuloshi, pamo nga amafilimu, amaprogramu ya pa TV, ifyangalo fya pa kompyuta, e lyo ne fitabo. Ici calilenga abacaice abengi ukutemwa ukutamba amafilimu ne fyangalo umwaba ifyo ababukila ku ntanda bacita, ifibanda, ifiwa ifyonka umulopa wa bantu, e lyo no buloshi. Cinshi cilenga balefwaisha ukutamba ifya musango uyu? Nico:

•   Balafwaisha ukwishiba: Nga cine cine kwaliba bamalaika ne fibanda

•   Balasakamana: Pantu balafwaya ukwishiba ifikacitika ku ntashi

•   Balafwaya ukumona: Nga kuti balanshanya na balupwa e lyo ne fibusa fyabo abafwa

 Ukumfwa ifi twalandapo takwabipa. Ku ca kumwenako, mu cifyalilwa fye tulafwaya ukwishiba ifyo ifintu fikaba ku ntashi, kabili tulafuluka balupwa e lyo ne fibusa fyesu abafwa. Nalyo line ukubika sana amano kuli ifi kuti kwalenga twatendeka ukumfwana ne mipashi.

 Baibolo ilatusoka mu kukosa ukuti tatulingile ukucita icili conse icakuma ukupupa imipashi. Ku ca kumwenako Baibolo itila:

 “Ekasangwa muli imwe . . . onse uubuka imbuko, uucita ifinjelengwe nelyo onse uusobela ifya ku ntanshi nelyo ing’anga, nelyo uulowa nelyo uwipusha ku umfwana ne mipashi nelyo ku waishibisha ifya kusobela nelyo onse uwipusha ku bafwa. Pantu onse uucita ifi fintu wa bunani kuli Yehova.”—Amalango 18:10-12.

 Mulandu nshi Baibolo yalesesha ukupupa imipashi?

•   Nga tuleumfwana ne fibanda ninshi tulefitungilila. Baibolo itusambilisha ukuti bamalaika bamo balipondokele Lesa no kuba abalwani bakwe. (Ukutendeka 6:2; Yuda 6) Aba bamalaika abapondweke, abetwa ifibanda balalufya abantu ukubomfya abomfwana ne mipashi, abasobela ifya ku ntanshi, e lyo na babuka imbuko ukubikako fye na babukila ku ntanda. Nga tulecita ifi kuti twaba ifibusa na balwani ba kwa Lesa.

•   Ukupupa imipashi kulenga abantu balasumina ukuti abantu bamo kuti basobela ifikacitika ku ntanshi. Nomba ni Lesa fye e wingalanda ukuti: “Ne usobela pa kutendeka ifikacitika ku mpela, no kufuma kale ifintu ifishilacitwa.”—Esaya 46:10; Yakobo 4:13, 14.

•   Ukupupa imipashi kulenga abantu basumina icisambilisho ca bufi ica kuti abafwa kuti balanshanya na ba mweo. Lelo Baibolo itila: “Abafwa, tabaishiba akantu nangu kamo . . . pantu ku Nshiishi, uko uleya takwaba umulimo wa kubomba nangu kwelenganya nangu kwishiba nangu mano.”—Lukala Milandu 9:5, 10.

 Ifi e fyalenga Inte sha kwa Yehova belacitako ifili fyonse ifyakuma ukupupa imipashi. Kabili tabalesesha icitendwe mu fintu umwaba ifipuuku, ifiwa ifyonka umulopa wa bantu, e lyo ne fya kwelenganya. Maria umukashana uuli ne myaka 21 alandile ukuti, “Mu fya kuleseshamo icitendwe nga muli fye ifya mipashi, ninshi te kuti ntambe.” a

•   Uleesha na maka ukuba “na kampingu uwa kaele” kuli Yehova lyonse. Kuti wacita ifi nga taulepupa imipashi kabili nga tauletamba nelyo ukubelenga ifya kuleseshamo icitendwe umwaba ukupupa imipashi.—Imilimo 24:16.

•   Ufwile ukupoosa fyonse ifyo wakwata ifyakuma ubuloshi. Belenga Imilimo 19:19, 20, pa kuti umone ifyo Abena Kristu abaliko mu nshita ya batumwa bacitile ifyo na iwe ulingile ukucita.

 Uleibukisha ukuti: Nga ulekaana ukucita ifintu ifili fyonse ifyakuma ubuloshi kabili nga tauletamba, taulekutika nelyo ukubelenga ifili fyonse umwaba ubuloshi, ninshi uli kulubali lwa kwa Yehova. Nga waba ku lubali lwa kwa Yehova, ukalalenga alesekelela!—Amapinda 27:11.