Bushe walishibako uwacaice uwalwala ubulwele ubukalamba? Bushe ulalwalilila nelyo walilemana ica kuti ulafilwa ukucitako ifyo abanobe bacita?

 Nga e fyo caba, kuti ulefuupulwa limo limo. Lelo Baibolo yalilanda pa fintu fibili ifingakusansamusha.

•   Kabumba obe, Yehova Lesa, alishiba ifyo ulepitamo. Ne cacindamisha ca kuti ‘alakusakamana.’​—1 Petro 5:7.

•   Yehova Lesa akondapa bonse abalwala! Aya mashiwi kuti wayasanga muli Baibolo pali Esaya 33:24 na pa Ukusokolola 21:​1-4.

 Abacaice abengi abalwalilila basanga ukuti ukutetekela Lesa ne fyo alaya kulabasansamusha. Tontonkanyeni pali aba bacaice bane.

•  YEIMY

•  MATTEO

•  BRUNA

•  ANDRÉ

 Ilyo nalefisha imyaka 11, ninshi nyendela pa ncinga ya balemana. Ndafilwa ukubomba imilimo iya-anguka, nangu fye kwimya ifya-anguka.

 Ilyo nali ne myaka 5, balinsangile no bulwele bwa muscular dystrophy, ubulwele ubulenga imicincili ukunakuka. Limo limo, ndafuupulwa pantu ndafilwa ukucitako ifintu ifyo abanandi bacita. Lelo abafyashi bandi, nabo tulongana nabo balansansamusha kabili balankoselesha ukulabombela Lesa. Ndapoosa inshita iikalamba mu kushimikila, kabili Abena Kristu banandi balanshindika nga naya mu kusambilisha abantu Baibolo.

 Yesu atile ubushiku bonse bulaba na masakamika ya buko. (Mateo 6:34) E ico nshisakamikwa pa bushiku bwa mailo, lelo ntontonkanya pa fyo nalacita lelo line no kubika ubuyo ubo ningakwanisha ukufikilisha. Ndalolela icalo cipya ica kwa Lesa umo nkaba no “mweo wine wine,” umo nshakalecula kuli ubu bulwele nalwala.​—1 Timothy 6:19.

 Ifyo ulingile ukutontonkanyapo: Ica-afwa sana Yeimy kubika ‘ubuyo ubo engakwanisha ukufikilisha.’ Bushe kuti wamupashanya shani?​—1 Abena Korinti 9:26.

 Ilyo nali ne myaka 6, mu numa mwatendeke ukukalipa kabili pa kubala badokota baleti ukukula e kwalelenga. Lelo ilyo papitile umwaka umo, basangile ukuti nalikwete tumor iyalemena ku mungololo.

 Balimombele lelo bafumisheko fye tumor iinono. Ilyo papitile fye imyeshi ibili, na kabili tumor yalikulile kwati fye ni filya fine yali pa kubala! Ukutula ilya nshita, ndamonana na badokota libili libili, balimombela imiku iingi, kabili ndafuupulwa sana.

 Limo limo, umubili ulakalipa kwati nalimo balendasaula umwele, nomba umukalipa sana ni mu numa na mu cifuba. Na lyo line, nshileka ubulwele bwansakamika sana. Nalishiba ukuti kwaliba na bambi abapita mu macushi ayakalamba, lelo tabaililila ubulanda. Icingafwa sana ukukanasakamikwa kucetekela ukuti bushiku bumo Yehova Lesa akafikilisha ifyo alaya kabili akafumyapo amacushi yonse.​—Ukusokolola 21:4.

Ifyo ulingile ukutontonkanyapo: Bushe ukutontonkanya pa bulayo bwa kwa Lesa ubwa kufumyapo amacushi kuti kwakwafwa shani ukushipikisha, nga filya kwa-afwa Matteo?​—Esaya 65:17.

 Apo abantu te kuti beshibe ukuti nalilwala, bamo bamona kwati ndi munang’ani. Ndashupikwa pa kucita ifili fyonse, ukubomba imilimo, ukubelenga, nelyo fye ukwima mu bedi nga nashibuka.

 Ilyo nali ne myaka 16, bansangile no bulwele bwa multiple sclerosis, ubulwele ubulenga amaka ukuya yalepwa ubwalenga ukuti cilengafya ukubomba imilimo yonse e lyo ne ya mu cilonganino. Nalitemwa ukubelenga pali 1 Petro 5:​7, apatila: “Mulepoosa amasakamika yenu yonse pali [Lesa], pantu asakamana imwe.” Amashiwi ya kuti Yehova alasakamana umuntu umo umo yalansansamusha. E yalenga ntwalilile ukushipikisha ukufika na lelo.

● Ifyo ulingile ukutontonkanyapo: Bushe busuma nshi bwingafumamo nga ulepoosa amasakamika yobe pali Yehova, nga filya Bruna acita?​—Amalumbo 55:22.

 Abengi bamona kwati ndi mwaice uuli ne myaka 10. Nshibapeela umulandu iyo; pantu ifi fine e fyo moneka.

 Ilyo nali ne myaka ibili, bansangile na kansa iyatendekele mu mungololo mpaka yasalanganina kuli bongobongo. Badokota baling’undepe, lelo ifyo napitilemo pa kung’undapa fyalenga ukuti nilakula. Nalepa fye amamita 1.37. Abengi balakaana nga nabeba ukuti ndi ne myaka 18!

 Ababwananyina mu cilonganino balincindika. Tabancita kwati kaice, nge fyalecita abanandi abo naleya nabo ku sukulu. Nshisakamikwa sana. Nalishiba Yehova, kabili ici e cintu icacindama sana ico umuntu engacita! Muli fyonse ifyo nkapitamo, nalicetekela ukuti Yehova akansakamana. Ukulatontonkanya pa calo cipya ico Yehova atulaya kwalilenga ukuti nilasakamikwa sana.​—Esaya 33:24.

Ifyo ulingile ukutontonkanyapo: Nge fisosele André, mulandu nshi ukwishiba Yehova kwabela “e cintu cacindama sana ico umuntu engacita”?​—Yohane 17:3.