Napapita inshita ukutula apo watendekela ukwishishanya, nomba kuli fimo ifyo utendeke ukutwishika. Bushe ulingile ukutwalilila ukwishishanya nelyo ufwile ukuleka? Cino cipande kuti cakwafwa ukwishiba ifyo wingacita.

Ifili muli cino cipande

•  Ifyo wingacita nga uletwishika

•  Ifyo wingapingulapo

•  Nga wasalapo ukuti muleke ukwishishanya

 Pa numa ya kwishishanya pa nshita iinono, umulumendo no mukashana nalimo kuti baisailuka ukuti tabapalana nga fintu baletontonkanya pa kubala. Ku ca kumwenako:

•   Umo kuti atemwa ukuya mu kwangala ku lulamba lwa bemba; e lyo umunankwe ena atemwa ukuya mu kuninika impili.

•   Umo kuti aba uwasalapukisha kabili uulandalanda; e lyo umunankwe ena aba uwatekanya kabili uushilandalanda.

•   Umo kuti aba uwa bufi; e lyo umunankwe ena alalanda icishinka lyonse.

 Mufwile ukwishiba ukuti ifi fyonse twalandapo fintu fyapusana. Ica kubalilapo fintu bapusana mu fyo batemwa; icalenga bubili fintu bapusana mu mibele; e lyo icalenga butatu fintu bapusana mu fyo baba.

 Ifyo ufwile ukutontonkanyapo: Ni cisa pali ifi fitatu ico ulemona ukuti kuti cayafya sana ukushipikisha nga ca kuti mwalyupene? Ni cisa pali ifi ico ulemona ukuti bonse babili kuti mwakumanisha ukwaluka?

 Abalume na bakashi kuti baba abapusana ifyo batemwa na mu mibele, lelo kuti baba ne nsansa mu cupo. Na kuba, ukuba abapalana tacipilibula ukuti mufwile ukuba fimo fine. Inshita shimo abalume na bakashi balasambilila ukulacita ifyo abena mwabo batemwa nelyo ukunonkelamo mu mibele ya bena mwabo. a

 Nalyo line calicindama ukuti umuntu ulefwaya ukuupana nankwe aliba ne mibele iyo na iwe wakwatako, e kuti mukalamba mu fya kwa Lesa, aliba ne mibele iisuma kabili alishiba icalungama ne cishalungama. Lelo ifi nga te fyo cili, ninshi kuti cawama mwaleka ukwishishanya.

 Ku ca kumwenako, tontonkanyeni pa fyo cingaba nga ca kuti mwalipusana uko mupepa. Icitabo citila Fighting for Your Marriage calandile ukuti: “Abafwailisha basanga ukuti abaupana abapepa ukwapusana ilingi line ifyupo fyabo filapwa.”

 Ishinte lya mu Baibo: “Tamufwile ukwesha ukubombela pamo na bashasumina, pantu te kuti ficitike.”—2 Abena Korinti 6:14, Good News Translation.

 Baibo ilanda ukuti abopa “bakaba na macushi mu bumi bwabo.” (1 Abena Korinti 7:28 Baibolo—Amalembo ya Calo Cipya) Kanshi tamufwile ukupapa nga mwakwata amafya pali ino nshita ilyo muleishishanya.

 Nga mulefilwa ukusuminishanya pa tuntu tumo utunoono tacipilibula ukuti ninshi mulingile ukuleka ukwishishanya. Nomba icipusho ca kuti, bushe mulakumanisha ukulanshanya no kupwisha aya mafya mu mutende? Nga mulakumanisha, ninshi cikalamwangukila ukulanshanya no kupwisha amafya nga mwaupana.

 Ishinte lya mu Baibo: “Lelo muleba ne cikuuku ku banenu, mulelangulukilako abanenu, muleitemenwa ukubelelana uluse.”—Abena Efese 4:32.

 Na kabili, nga ca kuti lyonse mulapusana kabili tamumfwana pa fintu ifingi, nalimo ninshi cilelanga ukuti tamufwile ukuupana. Ifi nga e fyo caba, kuti cawama mwaishibila limo ifi ilyo tamulaupana!

 Icishinka ca kuti: Nga ca kuti uletwishika sana umuntu wishishanya nankwe nangu nga ca kuti taulaipekanya ukupa nelyo ukupwa, taufwile ukusuulako fye ku fyo uleumfwa!

 Ishinte lya mu Baibo: “Uwa mano nga amona ububi alafisama, lelo uushaba na mano atwalilila fye ukuya kabili alakumana no bucushi.”—Amapinda 22:3.

 Nga mwaleka ukwishishanya kulaba ukumfwa ububi. Lelo umo pali imwe nelyo bonse babili nga mwatwalilila ukutwishika ukwishishanya kwenu, kuti cawama mwaleka ukwishishanya.

 Ni nshila nshi mwingabomfya pa kuleka ukwishishanya? Te kuti ciwame ukweba uo mwishishanya nankwe ukuti muleke ukwishishanya ukubomfya foni nelyo meseji, kano fye nga pali umulandu uukalamba uwa kucitila ifyo. Lelo mufwile ukusala inshita iisuma ne cifulo uko mulingile ukulanshanishisha pali ili lyashi ilyacindama.

 Ishinte lya mu Baibo: “Ilyo mulelanshanya lyonse mulelanda icishinka.”—Sekaria 8:16.

 Bushe ukuleka ukwishishanya ninshi cilepilibula ukuti tekuti mutunguluke? Awe nakalya. Uleibukisha ukuti ukwishishanya kufwile ukukwafwa ukwishiba nga mulingile ukuupana no yo muntu nelyo iyo. Nangu ca kuti mwaleka ukwishishanya, kuti wasambililako amasambililo ayacindama ku fyacitike ifyalengele muleke ukwishishanya.

 Ipushe auti: ‘Finshi nsambilileko pa fyo naba muli uku kwishishanya? Bushe ifyacitike na filenga naishiba ifyo mfwile ukuwamyako ilyo nshilaupa nelyo ukupwa? Finshi mfwile ukuwamyako nga natendeka ukwishishanya na kabili?’