Pa 6 July, 2018, icilye ca Barda District Court mu calo ca Azerbaijan calipingula munyinefwe Emil Mehdiyev ukuti mu cifulo ca ku mubika mu cifungo balamukanda mu nshila imbi pa mwaka umo. Icilye calisanga Emil uuli ne myaka 18 no mulandu wa kukaana ukwingila ubushilika, lelo tacamupingwile ukukakwa. Na lyo line, bamwebele ukuti talingile ukukuka apo aleikala ukwabula ukwishibisha abalashi, kabili nabamukaanya no kufuma mu calo ca Azerbaijan.

Mu December 2017, munyinefwe Mehdiyev alile ku Barda District Department iilolekesha pa kwingila ubushilika. Alikeene ukumulemba ubushilika pantu kampingu yakwe tayamusuminishe ukwingila ubushilika. Ilyo bamwitile na kabili aliile ku kulondolola ifyo asuminamo no kulomba ukuti bamupeeleko imilimo imbi iya buteko iishili ya bushilika. Bamwebele ukuti takwaba imilimo engabomba ukucila ukwingila ubushilika no kuti bali no kutwala umulandu wakwe kuli shicilye mu Barda District.

Pa numa ya kulubulula pa nshita ntali, icilye ca Barda District Court calimusanga no mulandu kabili cali mweba ifyo alingile ukucita. Nangu ca kuti icilye tacakakile Emil, bakalamumona ukuti kapondo pantu ubuteko bwa Azerbaijan tabwabikako imilimo imbi iya buteko iishili ya bushilika, nga fintu bwalaya ukuti bukabikako.

Natutemwa ukuti munyinefwe Mehdiyev taitumpile mu fya calo na lintu ali no bu bwafya ubukalamba.—1 Petro 2:19.