Pa 1 April, mu 2015, Inte sha kwa Yehova shatendeke kampeni ya kuya ku madipartimenti ya bakapokola, bameya, na ba mu maofeshi ya bashicilye aba mu calo ca Georgia. Ico kwabelele iyi kampeni ni co balefwaya abantu beshibe pa fyo icilye ca ku bulaya icilandilako insambu sha bantu, ica European Court of Human Rights (ECHR) capingwile umulandu wa ba Begheluri na Bambi uo balelubulula ne calo ca Georgia, umo ubuteko bwaikele pa nsambu sha Nte sha kwa Yehova abekala mu calo ca Georgia. Iyi kampeni yalengele abalashi ba buteko baishiba ifishinka pali uyu mulandu, ifyo bapingwile, ne milimo iyo Inte sha kwa Yehova babomba.

Ukutula mu 1999 ukufika mu 2003, abo bakeenye ukuba bashimapepo mwi calici lya Orthodox balipangile amabumba aya kuyauma Inte sha kwa Yehova. Nangu ca kuti Inte sha kwa Yehova balitwele imilandu 784 kuli bakapokola pa fyo babasanshile na pa fyo balebacusha, abalashi ba buteko limo tabalebikako amano e lyo limo e balecusha Inte sha kwa Yehova. Takwali umulandu uo ba Nte batwele ku balashi, uo abalashi babombelepo. Pa mulandu wa kuti abalashi ba mu calo ca Georgia balifililwe ukucitapo fimo, abalecusha ba Nte e lyo bacililemo ukubacusha, ica kuti batendeke no kubapumina mu cilye mwine, ukubapuma nga balelongana ukulongana ukukalamba e lyo na lintu bali fye mu misebo.

Inte sha kwa Yehova mu Georgia balitwele imilandu ibili ku kabungwe ka ECHR pa kuti babafwe pali ubu bwafya. Icilye capingwile umulandu wa kubalilapo mu May mu 2007, * e lyo umulandu wa bubili uwa ba Begheluri na Bambi uo balelubulula ne calo ca Georgia wena capingwile mu October mu 2014. Mu milandu yonse ibili, icilye ca ECHR calikalipe pa fyo abalashi ba buteko bwa Georgia baletungilila abantu abalecusha ba Nte, kabili calandile ukuti ifi ubuteko bushabikileko amano ku fyalecitika fyalengele abantu balecusha sana ba Nte. Nga fintu Icilye ca ECHR calandile ilyo calepingula umulandu wa ba Begheluri, “filya abalashi ba buteko bwa Georgia bashalekanda abalecita imilandu, calengele balamona kwati cali fye bwino ukulasansa ba Nte muli cilya calo.” *

Ubuteko bwa Georgia bwalicitile bwino pantu ubushiku bwakonkelepo bwalibilishe ifyo Icilye capingwile mu mulandu wa ba Begheluri, kabili bwalaile ukuti tabwakasuminishe ifyalecitika ukucitika na kabili, bwatile:

“Ubuteko bwa Georgia bulefwaya sana ukucingilila ubuntungwa bwa kutontonkanya, ubwa kampingu no bwa kupepa, ukubikako fye ne nsambu shonse isha bantu. Icalo cilefwaya ukulakonka sana amafunde no kulabombelapo nga kwaba ukwikala pa nsambu sha bantu. Na kabili bukalakanda abekala pa nsambu sha bantu kabili tabwakasuminishe umuntu nangu umo ukucita ica musango uyo.”

Ifyo ifintu fili ku Nte sha kwa Yehova mu Georgia pali ino nshita, nafipusana sana ne fyo fyali mu myaka ya ku numa. Ba Nte nomba balepepa mu mutende kabili baletasha abalashi ba buteko pa fyo balecingilila insambu shabo. Inte sha kwa Yehova nomba balekuula amayanda ya kupepelamo kabili nabakushako na maofeshi ayakalamba ayaba muli ici citungu.

Na lyo line, abalashi bamo tabaishiba ifingi pa Nte sha kwa Yehova nelyo ifyo basuminamo kabili tabaishiba nangu cimo pa fyo bapingwile umulandu wa ba Begheluri nelyo ifyo abalashi ba buteko balandilepo. Na kabili abantu balitwalilila ukusansa abantu bambi pa mulandu na uko bapepa kabili tabakanda abacita ifya musango uyu. Ku ca kumwenako, mu 2014 ba Nte balitwele umulandu kuli bakapokola uwa ba Nte 30 abo bapumine. Inte sha kwa Yehova balitwala imilandu ku kabungwe ka ECHR pa kuti kabombelepo pali ubu bwafya. *

Kampeni iya mu April iyo balelondolwela abalashi, yalilenga balacindika insambu sha bantu mu calo ca Georgia. Inte sha kwa Yehova baletasha pa fyo ubuteko bwa Georgia bulekanda abantu abacusha bambi, kabili baleenekela ukuti ubuteko bwalatwalilila ukwikata abalecita ubunkalwe ku banabo pa mulandu na uko bapepa.