Mu January 2018, ba Arslan Begenjov na ba Kerven Kakabayev babapingwile ukukakwa umwaka umo pa mulandu wa kukaana ukwingila ubushilika. Aba abaume babili ni Nte sha kwa Yehova kabili balikaana ukwingila ubushilika pa mulandu wa fyo basuminamo. Nangu ca kuti balisumiine ukubomba imilimo imbi iya buteko, ubuteko bwa Turkmenistan bwalikaana ukubapa insambu sha kucita ifyo kampingu ilebeba kabili taisuminisha umuntu ukubomba imilimo imbi iya buteko iishili ya bushilika.

Abalashi baikete ba Begenjov pa 2 January kabili bali mu cifungo ukufikila ilyo baile ku cilye ku kulubulula. Pa 17 January, icilye calibasangile no mulandu wa kukaana ukwingila ubushilika kabili babapingwile ukukakwa pa mwaka umo. Ba Begenjov balitwala umulandu wabo ku cilye cimbi.

Ba Kakabayev nabo babekete mu January kabili pa 29 January babapingwilile ukukakwa pa mwaka umo. Ilyo balelubulula mu cilye, icilye calikeene ukukutika ku bupingushi bwafumine kuli komiti yaba mu kabungwe ka UN Human Rights Committee akapeele ba Kakabayev insambu. Ku ca bulanda, icilye tacakakutike ku mulandu wa ba Kakabayev. Abalashi ba cifungo balifishile kalata ifyo baloya wabo babapekanishishe ukuti bakatwale ku cilye pa kuti batwale umulandu wabo ku cilye cimbi. Ifi bacitile fyalengele besaina pa fipepala mu nshiku 10 isho balingile ukusaininamo ukulingana ne fyo ifunde lilanda.

Uyu e muku wa bubili uo ba Kakabayev babakakila pa mulandu wa kukaana ingila ubushilika pa mulandu wa kampingu yabo. Mu December 2014, abalashi balibapingwila ukukakwa imyaka ibili, kabili ubuteko bwakulabaputulako indalama ku ndalama bafola cila mweshi pa nshita yonse bakaba mu cifungo.

Ubuteko bwa Turkmenistan butila bwalicindika ubuntungwa bwa bantu buteka. Lelo bulekala pa nsambu sha bantu bakaana ukwingila ubushilika nangu ca kuti amafunde ya fyalo fyonse yalilandapo ukuti bulepeela abantu insambu.

Mu 2015 na mu 2016, komiti ya kabungwe ka UN Human Rights Committee yalyebele ubuteko bwa Turkmenistan ukuleka ukucita ifi bucita no kubombela pa milandu ya ba Nte 10 iyo batwele kuli iyi komiti. Ilyo iyi komiti yapingwile iyi milandu, yalikalipile ubuteko bwa Turkmenistan pa fyo bucusha no kukaka ba Nte pa fyo bakaana ukwingila ubushilika pa mulandu wa kampingu. Mu April 2017 iyi komiti yalibwekeshepo ukukalipila ubuteko bwa Turkmenistan pa fyo “bwatwalilila ukwikala pa nsambu sha bakaana ukwingila ubushilika pa mulandu wa kampingu yabo ne fyo bucusha no kukaka Inte sha kwa Yehova pa fyo bakaana ukwingila ubushilika.” Yaebele ubuteko bwa Turkmenistan ukubikako imilimo imbi iya buteko iishili ya bushilika, ukuleka ukucusha abakaana ukwingila ubushilika pa mulandu wa kampingu, no kufumya abo bakaka pa mulandu wa kuti balikeene ukwingila ubushilika.

Mu myaka iingi iyapita, ubuteko bwalyalukako mu fyo bucita abantu abakaana ukwingila ubushilika. Ukutula mu December 2014, mu nshita ya kulakaka abakaana ukwingila ubushilika, pa kubakanda limo bulapokako indalama shimo ku ndalama umuntu afola cila mweshi pa myaka ibili (nga fintu bacitile kuli ba Kakabayev mu 2014) e lyo limo balabakanda mu nshila imbi ukwabula ukubabika mu cifungo. * Mu February 2015 ubuteko bwalifumishe Nte uwashele mu cifungo uo bwakakile pa mulandu wa kukaana ukwingila ubushilika. Ku ca bulanda, mu mulandu wa ba Begenjov na Kakabayev, ubuteko bwa Turkmenistan bwacitile ifyo bwalecita kale, tabwacitile ifilanga ukuti bulacindika insambu isho umuntu akwata isha kucita ifyo kampingu ilemweba.

Abalashi tabapelela fye pa kukaka ba Begenjov na ba Kakabayev, lelo bwalitwalilila ukusunga ba Bahram Hemdemov mu cifungo pa mulandu wa kuti balebomfya insambu bakwata isha kupepa. Apo ni ba Nte, ba Hemdemov balibekete no kubakaka pa mulandu wa kuti ba Nte balelonganina mu ng’anda yabo mu Turkmenabad. Ba Hemdemov balikwata abana bane kabili balibakaka ukutula mu 2015, nangu ca kuti kateka wa calo ca Turkmenistan alifumya abantu abengi mu cifungo pa myaka ibili iyapita, bena tababafumya. Ubuteko bwalibelele uluse no kufumya abafungwa abengi nga nshi mu cifungo lelo tabubikako amano ku fyo ba Hemdemov bapapata ukuti babafumye.

Inte sha kwa Yehova balefwaya aba bwananyina banabo ku Turkmenistan baleke ukubacusha. Balesubila ukuti ubuteko bwa Turkmenistan nomba line bwalacita ifilanga ukuti bulacindika ubuntungwa abantu bakwata ubwa kupepa no bwakucita ifyo kampingu ilebeba kabili bukaleka ukufyenga abantu.