Napapita umwaka umo ukutula apo ubuteko bwa Armenia bwatendekeele ukupeela abantu imilimo iishili ya bushilika. Abalumendo ababalilepo ukubomba iyi milimo, ni Nte sha kwa Yehova. Babapeele imilimo iimbi iya buteko mu nshita ya kuti babakake pantu balikeene ukwingila ubushilika pa mulandu wa kuti kampingu yabo tayalebasuminisha ukucita ifyo.

Ukutula mu 1985, ba Nte bacaice abalumendo mu Armenia abalekaana ukwingila ubushilika balebakaka. Apo takwali ifunde ilyalesuminisha ukuti umuntu kuti abombako imilimo imbi iya buteko iishili ya bushilika, ba Nte ukucila pali 450 balibakakile mu myaka ukucila pali 20, kabili ilingi line tabalebasunga bwino mu fifungo. Nomba mu June mu 2013 ubuteko bwa Armenia bwalibikileko ifunde ilipya ilyalesuminisha abantu ukubombako imilimo iishili ya bushilika.

Pa 23 October, mu 2013, Komiti ya Calo ca Armenian (Armenian Republican Committee) yalisuminishe Inte sha kwa Yehova 57 abalombele ukuti babasuminishe ukubombako imilimo imbi iya buteko iishili ya bushilika pa mulandu wa kuti kampingu yabo tayalebasuminisha ukulwako inkondo. * Pa numa iyi komiti yalisuminishe ba Nte na bambi ukubombako iyi milimo. Ba Nte 71 batendeke ukubomba imilimo babapeele mu mulungu wa 13 January, 2014. Ilyo umwaka wa 2014 walepwa, ba Nte ukucila pali 126 balebomba imilimo ya buteko iishili ya bushilika.

Ifyo abakalamba ba mulimo, abangalila umulimo e lyo na bambi ababombako imilimo ya buteko iishili ya bushilika balanda filelanga fye ukuti iyi programu ilebomba bwino sana kabili balanda ukuti ba Nte bacaice balabombesha, balitemwa ukwafwa bambi kabili baliba ne mibele iisuma. Ababa muli Komiti ya Calo ca Armenia balanda ukuti ba Nte baleyafwa sana ubuteko bwa Armenia kabili balabomba bwino imilimo babapeela.

• “Muleyafwa sana icalo cesu nangu ca kuti tamufola indalama ishalondoloka. Ukwabula no kutwishika mulabombesha.”—E fyalandile Uwangalila imilimo pa Yerevan/Shengavit Community Services

• “Mulacita bwino sana! Mulafwaisha ukulaikala ifyo Abena Kristu balingile ukulaikala kabili pa nshita imo ine ukubombela bambi mu bwikashi.”—E fyalandile Nasi pa ng’anda basungila abana banshiwa apo batuma ba Nte ukuya mu kubomba.

• “Bushe takwaba na bambi ababa nga imwe? Mubebe bese pa kuti balemombela!”—E fyalandile Umukalamba wa ncito pa Yerevan/Arabkir Community Services.

Ba Nte abalembeshe ukulabomba imilimo iishili ya bushilika nabo balalanda ifisuma.

• “Abo momba nabo baliba no kutemwa kabili balampeela umucinshi, ne ci cilalenga ndeba ne nsansa. Bushiku bumo ilyo nalwele nafilwa no kuya ku ncito, abo momba nabo balintumiine foni pa kuti beshibe ifyo nali. Uyu mulimo lipaalo sana pantu ndabombela Lesa ukwabula ukusakamana nangu cimo.”—E fyalandile Gevorg Taziyan, bamupeela umulimo wa kwafwa banamutekenya ku Territorial Division of the Ministry of Emergency Situations Rescue Services.

• “Tulomfwana na babomfi bambi e lyo na bakalamba ba milimo. Twalimwene ukuti balitubikileko amano, e co na ifwe twalibabikako sana amano. Kwaleba ilyo baletupeela imilimo iyo tushalingile ukubomba, na lyo line twaleibomba.”—E fyalandile ba Samvel Abrahamyan, abo bapeele umulimo wa kuwamya ulubansa pa cipatala ca mashilu ica Sevan Psychiatric Hospital.

• “Fwe batendeke ukubomba pa cipani cilolekesha pa masanso ica Ministry of Emergency Situations twali 13 kabili twatendeke ukubomba pa 14 January, 2014. Ukutula apo twatendekeele ukubomba, tulabomba bwino na bonse abo tubomba nabo kabili tulomfwana. Tatupusana na bakalamba ba milimo. Balitemwa ifyo tubombela pamo bwino.”—E fyalandile ba Artsrun Khachatryan, abo bapeela umulimo wa kuwamya ulubansa mu Cipani Cilolekesha pa Masanso.

Icalenga ukuti iyi programu ilebomba bwino mu Armenia ni co abakalamba ba milimo na bangalila imilimo balabombela pamo kabili na ba Nte nabo balabombesha. Inte sha kwa Yehova mu Armenia baletasha sana pa kubapeela ishuko lya kubombela icalo cabo ukwabula ukucita ifipusene ne fyo basuminamo nelyo ukwabula ukubabika mu fifungo pa mulandu wa kuti kampingu yabo taibasuminisha ukwingila ubushilika.