Imfula ya maka ku Kerala,mu India, yalilenga umushili wabunguka imiku 25, kabili abantu ukucila pali 75 balifwa. Dipartimenti ilolekesha pa micele mu India, yatile amainsa ya uno mwaka yalilenga kwaba imfula iishabala ailokapo kuli iyi ncende.

Twaliumfwa sana ubulanda ilyo aba kwi ofeshi lya musambo mu India batwebele ukuti munyina umo no mwina mwakwe abacilile imyaka 60 e lyo no muntu umo uwalesambilila Baibolo balifwa ilyo mushili wabungwike e lyo abasambi babili balicenekwa sana kabili pali ino nshita bali mu cipatala. Munyinefwe uwa myaka 17 alinwena ilyo alepususha umwina mupalamano wakwe.

Iofeshi lya musambo lyalipanga Komiti ya Kwafwilisha Abaponenwe na Kayofi (DRC) pa kuti bamone ifyonaike kabili bafwilishe bamunyinefwe. Bamunyinefwe balebomfya Amayanda ya Bufumu yamo nge fifulo apa kwafwilishisha aba bwananyina. Amalipoti twapokelele pa kubalilapo yalelangilila ukuti pa amayanda yonse 46 aya bamunyinefwe yamo yalionaika icabipisha e lyo yambi yaonaike fye panono. Indupwa 85 nelyo bakasabankanya 475 balebasungako kuli bamunyinefwe nelyo balupwa wabo. Iofeshi lya musambo lyalitweba no kuti Amayanda ya Bufumu yamo yalibunda. Komiti ya DRC yalatwalilila ukwafwa bamunyinefwe, pantu nalimo imfula ili no kutwalilila ukuloka mu nshiku shileisa.

Bamunyina ukufuma kwi ofeshi lya musambo, capamo na kangalila wa muputule uwa kuli iyi ncende e lyo na baeluda, balitandalile bamunyinefwe na bankashi pa kuti babakoseleshe ukubomfya amalembo.

Tulepepelako bonse abalecula pa mulandu wa mainsa ya uno mwaka ayonawile ifintu ifingi. Tulafwaisha ukumona ilyo utuyofi e lyo na mafya tuleta fishakabeko.—Ukusokolola 21:3, 4.