Pa 18 May 2024, Munyinefwe Kenneth Cook, Jr uwa mwi Bumba Litungulula e walandile ilyashi ilya kupeela ifikuulwa fya Bethel ya mu Chelmsford ku England. Bamunyinefwe na bankashi abali 1,518 ebasangilwe ku kupeela ifi ifikuulwa kabili baali mu miputule 4 iya palya pene pa Bethel. Bamo aba mwi Bumba Litungulula e lyo na bafwilisha mu ma komiti yabo nabo balisangilweko. Lyena abantu 10,085 baletamba iyi programu ukubomfya intaneti mu fikuulwa fya kulonganinamo Ukulongana Kukalamba e lyo na mu fikuulwa umubela Amasukulu ya buLesa mu ncende ishapusanapusana ku Ireland na ku United Kingdom. Bamunyinefwe ne nkashi ukucila pali 3,000 abasangilweko baali pa babwananyina 11,000 abaleafwilishako ilyo balekuula Bethel.

Ubushiku bwakonkelepo, abantu 172,834 balitambile programu iyaibela iyalelanda sana pali Baibo mu filonganino 1,821 ifyaba mu ncende iyo uyu musambo wangalila.

Mu mulungu bali no kupeelelamo iyi Bethel, abo baitile ukuya sangwako balile mu kutandala pali ifi fikulwa ilyo tabalafipeela. Balipekenye ukwebako abaishile mu kutandala imilimo iyo aba pa Bethel babomba iitungilila umulimo wa kubila imbila nsuma mu ncende uyu umusambo wangalila e lyo na mwi sonde lyonse. Ku ca kumwenako, Ibumba Ilikopa Amavidio ilya pa Bethel ya ku Britain balilangilile ifyo bapanga amavidio ayalanda pa fyaba mu Baibo, kabili balitile na bantu pa kuti batambe ifyo bacita pa kukopa.

Pa numa ya kutandala pali filya fikuulwa, bamunyinefwe na bankashi abengi bali-ipakishe ukutandala na pa fikuulwa na fimbi umubela amasukulu ya buLesa ifishaba pa Bethel. Ifikuulwa fimo ifyo batandalile fikuulwa ifyo basungilamo ifya kale mu musumba wa London e lyo na mu musumba wa Kent pa kuti basambilileko na fimbi pa lyashi lya kale ililanda pali Baibo mu England.

Pa numa ya kutontonkanya pa fisuma ifyacitike e lyo ne milimo babombele muli ulya mulungu, Munyinefwe Richard Cook, uwaba muli Komiti ya Musambo wa ku Britain alandile ukuti: “Caliweme nga nshi ukumonana na bamunyinefwe na bankashi abafumine mwi sonde lyonse abaishile kuli uku ukukumana ukwaibela. Twalipapile icine cine ukumona ifyo Yehova atwafwile ukucimfya amafya ayo twalekwata ilyo twalepekanya ukupeela iyi Bethel, kabili ici calengele Yehova alumbanishiwa.”

Nga filya fine bamunyinefwe na bankashi ababa mu ncende iyo umusambo wa ku Britain wangalila baba ne nsansa, naifwe twaliba ne nsansa nga nshi pa mulandu wa kuti ifi fikuulwa ifisuma nga nshi balifipeela kuli Lesa wesu, Yehova.—Nehemia 12:43.