Pa 7 April 2020, Inte sha kwa Yehova mwi sonde lyonse bali-ibukisha Imfwa ya kwa Yesu Kristu nangu ca kuti icalo nacitebelelwa no bulwele bwa Korona. Munyinefwe Stephen Lett uwa mwi Bumba Litungulula atile: “Ubulwele, nangu icikuko, te kuti filenge twafilwa ukulanga Yehova na Yesu ukuti tulatasha pa fyo batucitila kabili takuli ifingalenga twafilwa ukusefya Umulalilo wa kwa Shikulu.” Twacitile shani pa kuti twibukishe imfwa ya kwa Yesu uno mwaka?

Lino e lyashi lya kubalilapo pa malyashi ayakalaba pa cipande citila Ifilecitika, ayakalalanda pa fyo aba bwananyina mwi sonde lyonse baibukiishe Imfwa ya kwa Yesu muli shino inshiku ilyo kuli ubulwele bwa Korona. Muli lino lyashi lya kubalilapo, twalalanda pa fyo ababa pa maofeshi yakalamba aya Nte sha kwa Yehova na baba pa mabethel yambi mu United States bacitile pa kwibukisha imfwa ya kwa Yesu.

Ibumba Litungulula lyalikonkele ifyo ubuteko bwalandile ukuti takuli abalingile ukulongana abengi, kanshi lyapingwilepo ukuti kukaba fye ukulongana kwa kwibukisha imfwa ya kwa Yesu kumo fye uko ababombela pali aya maofeshi bakatamba. Abalandile ilyashi bali umo balonganina ku Bethel ya ku Warwick. Munyinefwe Anthony Morris e walandile ilyashi. Bonse ababombela pa musambo wa ku United States baletambila ilyashi mu miputule bekala. Nangu ca kuti abalileko umukate na banwineko umwangashi bali fye abanono, bonse fye balibapeele umwangashi no mukate pa kuti baubomfye pa kwibukisha imfwa ya kwa Yesu.

Na kabili ababombela pali aya maofeshi baletamba mu miputule bekala ilyashi lya Cibukisho pa mafoni, pa matabuleti nelyo pa kompyuta pamo na bo balongana nabo abali ku mayanda. E lyo baeluda ababombela pali aya maofeshi balibalombele ukuti bakalande ilyashi lya Cibukisho ukubomfya Intaneti e lyo abo balongana nabo balebatamba.

Abengi ababombela pa Bethel batile tabatala abalonganapo ukulongana kwa Icibukisho nge fi cali uno mwaka. Nangu ca kuti tabalongene pamo na Bena Kristu banabo, baleumfwa ukuti balikatana na bamunyinabo ne nkashi ababa mwi sonde fye lyonse ilyo baleibukisha ifyo Yehova Lesa na Yesu Kristu umwana wakwe, bacitile pa kulanga ifyo batutemwa.—Yohane 3:16; Mateo 20:28.