Pa 5 July, 2024, Munyinefwe Colin Carson, uwa mu Komiti ya Musambo ku Malawi, e wafumishe Baibo ya Amalembo ya Calo Cipya mu lulimi lwa kubomfya ifishibilo ulwa ku Malawi. Iyi Baibo baifumishe pa kulongana kwa Citungu ukwa mu 2024 ukwaleti “Mulebila Imbila Nsuma!”, kabili abantu 331 ebasangilweko pa bushiku bwa kubalilapo ubwa kulongana ukwali mu Lilongwe ku Malawi. Kabili ilyo babilishe fye ukuti Baibo naifuma, bali-ibikile na pa jw.org e lyo na pa JW Library Sign Language app apo abantu bengakopolola.

Uyu e muku wakubalilapo bapilibwile Amalembo ya ciGriki aya Bena Kristu yonse muli ulu lulimi, kabili abantu ukucila pali 400,000 e babomfya ulu lulimi mu Malawi. Pali ino nshita, bamunyinefwe na bankashi ukucila pali 600 e baba mu filonganino 16 e lyo na mabumba 8 ifibomfya ululimi lwa kubomfya ifishibilo mu Malawi.

Pa 19 July, 2024, Munyinefwe Gage Fleegle, uwa mwi Bumba Litungulula, e wafumishe Baibo ya Amalembo ya Calo Cipya iyapitulukwamo mu Cibemba. Iyi Baibo baifumishe pa kulongana kwa Citungu ukwa mu 2024 ukwaleti “Mulebila Imbila Nsuma!” pa bushiku bwa kubalilapo. Uku ukulongana kwabelele mu Cibansa ca bola ica Levy Mwanawasa ku Ndola, mu Zambia. Kabili abantu 23,336 e balongene mu cibansa ilyo babilishe ukuti Baibo ya Amalembo ya Calo Cipya iyapitulukwamo naifuma. Kabili abantu na bambi 5,920 balikutike kuli uku ukulongana ukubomfya intaneti mu ncende 5 umo balongene icitungu. Bonse abasangilwe kuli uku kulongana mu ncende shonse 6, balipokeleko Baibo ya Amalembo ya Calo Cipya iyapulintwa. Pa numa fye ya kubilisha, Baibo bali-ibikile pa jw.org pa kuti abantu bengakopolola kabili balibikilepo ne ya kukutikako amabuuku 4, e kutila Ruti, 1 Yohane, 2 Yohane, na 3 Yohane.

Umuku wa kubalilapo Baibolo Amalembo ya Calo Cipya iya mu Cibemba yafumine ni mu 2008. Mu Zambia mwaba abantu nalimo 4 milioni abalanda ululimi lwa Cibemba kabili bamunyinefwe na bankashi 131,351 e baba mu filonganino 1,856 e lyo na mabumba 8 mu calo conse.

Pa 19 July, 2024, Munyinefwe José Torres, uwa mu Komiti ya Musambo ku Central America, e wafumishe Baibo—Imbila Nsuma Ukulingana ne fyo Mateo Ailembele mu ciQuiche. Baifumishe pa kulongana kwa Citungu ukwa mu 2024 ukwaleti “Mulebila Imbila Nsuma!” ukwabelele mu San Lucas Sacatepéquez, ku Guatemala. Abantu 405 abasangilwe kuli uku kulongana balipokeleko ili ibuuku ilyapulintwa. Kabili pa numa fye ya kubilishe, bali-ibikile na pa jw.org e lyo na pa JW Library app pa kuti abantu bengakopolola.

Abantu nalimo ukucila pali 1 milioni e balanda iciQuiche muli ici calo. Abengi pali aba bekala mu Guatemala, kabili muli ici calo emo icilonganino icibomfya iciQuiche cabalilepo ukupangwa mu 2010. Pali ino nshita, bamunyinefwe na bankashi 387 e baba mu filonganino 16 ifibomfya ulu lulimi muli ici calo.

Pa 28 July, 2024, kwali ukulongana ukwaibela mu Estádio Nacional do Zimpeto mu Maputo, ku Mozambique. Abantu 26,025 e basangilwe kuli uku kulongana pali ici cifulo. Lyena abantu 64,570 e bakutike kuli uku ukulongana ukubomfya intaneti mu ncende shimbi 16.

Pali uku ukulongana, Munyinefwe Fleegle afumishe amaBaibo ayapilibwilwe mu ndimi ishalekanalena kabili abantu balipokeleko ayapulintwa, kabili baliyabikile na pa jw.org. Munyinefwe Fleegle Afumishe Baibo—Imbila Nsuma Ukulingana ne fyo Mateo Ailembele mu ciMakhuwa-Meetto, iciMakhuwa-Shirima, e lyo na mu ciNsenga (ica ku Mozambique); kabili afumishe na Baibo ya Amalembo ya Calo Cipya aya ciGriki aya Bwina Kristu mu ciChuabo, iciPhimbi, ne ciTewe; e lyo na Baibo yonse iya Amalembo ya Calo Cipya mu ciTshwa.

Ici cilepilibula ukuti, Baibo ya Amalembo ya Calo Cipya iyapilibulwa yonse nelyo mu fiputulwa, nomba eko ili mu ndimi 300!