APRIL 3, 2020
IFILECITIKA MWI SONDE LYONSE
Tukalongana Icibukisho ca Mfwa ya kwa Kristu mu Nshila iyo Tushabala Atulonganapo
Aba Bwananyina mwi Sonde Lyonse Bakalonganina pa Mafoni pa Mulandu wa Bulwele bwa Korona
Ba Nte abengi nga nshi mwi sonde lyonse, nabo basambilisha Baibolo bakalongana pali Cibili pa 7 April, 2020, ku kwibukisha imfwa ya kwa Yesu. Uku kulongana kubako umuku umo mu mwaka. Nomba uno mwaka pa mulandu no bulwele bwa Korona, tatwakalongane nge fyo tulongana lyonse. Abengi bakalonganina pa foni.
Apo kuli ubulwele bwa Korona, abalashi ba buteko mu fyalo ifingi balilesha abantu ukulalongana pamo. Kanshi e mulandu wine aba mu filonganino ifingi mwi sonde lyonse balelonganina cila mulungu pa mafoni nelyo pa Intaneti. Na kabili ifi ifilonganino fikalonganina pa mafoni ilyo kukaba Icibukisho ca mfwa ya kwa Yesu. Na lyo line ilyashi lya Cibukisho bakalibika pa webusaiti yesu iya jw.org pa kuti abantu abali bonse bakatambe ilyashi.
Abasangilwe ku Cibukisho ca mfwa ya kwa Yesu umwaka wapwile balicilile amamilioni 20. Na uno wine mwaka tulesubila ukuti abantu abengi bakasangwako ku Cibukisho te mulandu nga bakalonganina pa vidio, nelyo bakakutika ilyashi pa foni nelyo pa webusaiti ya jw.org.
Mu fyalo ifingi ubu bulwele bulesalanganinako fye. Kanshi aba bwananyina balingile ukutwalilila ukulacita ifyo balebeba ku balashi pa kuti baicingilile. Apo twalicetekela sana Yehova ukuti akulatwafwa, tulefwaisha ukucita ifyo Yesu atwebele, ilyo atile: “Mulecita ici ku kunjibukisha.”—Luka 22:19.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Imfwa ya kwa Yesu Yaba Shani “Icilubula ca pa Abengi”?
Bushe icilubula cilenga shani twalubulwa ku lubembu?
AMEPUSHO ABANTU BEPUSHA SANA
Mulandu Nshi Ifyo Inte sha kwa Yehova Bacita Umulaalilo wa kwa Shikulu Fyapusanina ne fyo Imipepele Imbi Icita?
Umulalilo wa kwa Shikulu nelyo Icibukisho ca mfwa ya kwa Kristu, e kulongana ukwacindamisha uko Inte sha kwa Yehova bakwata. Moneni ifyo Baibolo ilanda pali uku kulongana.
PA NTE SHA KWA YEHOVA
Icibukisho ca Mfwa ya kwa Yesu
Cila mwaka abantu abengi sana balalongana pamo ku kwibukisha imfwa ya kwa Yesu. Mukwai tulemwita ukwisalongana na ifwe pa kuti mukeshibe ifyo uku ukulongana ukwacindama kwamukuma.