Pa nshiku ishingi ishapita kwali icikuuku ca mwela icasunkiile amenshi ya muli bemba ku mulundu ico baleita ati Mangkhut icaonawile ifintu ifingi nga nshi ku masamba ya bemba wa Pacific Ocean na kuli bemba ya South China Sea. Lipoti yakonkapo ifumine ku maofeshi ayasakamana bamunyinefwe na bankashi abaponenwe no ubu busanso.

Micronesia: Icikuuuku ca mwela ico baleita ukuti Typhoon Mangkhut casanshile icishi ca Rota, icaba pa fishi ifya Northern Mariana Islands, pa 10 September, 2018. Ici e cikuuku ca mwela icikalamba sana icasansapo icishi ca Rota ukutula mu 2002. Tuli ne nsansa ukumwebako ukuti takwali munyinefwe nangu umo uwacenenwe muli ubu busanso kabili takwali ne Ng’anda ya Bufumu iyaonaike pali ici cishi. Munyinefwe umo balimutwala ku ncende imbi ukufikila ing’anda yakwe bakaiwamye. Kangalila wa muputule aliya kuli ici cishi ku kukoselesha aba bwananyina.

Philippines: Pa 15 September, 2018, icikuuku ca mwela icasunkiile amenshi ya muli bemba ku mulundu ica Typhoon Mangkhut (abana calo baleita abati “Ompong”) calisasansa umusumba wa Baggao, mu citungu ca Cagayan, mu Philippines. Ici cikuuku e cikuuku ca mwela icali na maka sana icasanshile icalo ca Philippines muli uno mwaka. Abantu abafwile nabafika 81.

Ku ca kubalanda ici cikuuku ca mwela caliipaya nkashi umo mu Benguet kabili bamunyinefwe bane balicenekwa. Lipoti ilelanga ukuti pa kubala amayanda ya bamunyinefwe 938 yalyonaike kabili amayanda 15 yalyonaike nakalya nakalya. Amayanda ya Bufumu nalimo 28 yalionaika, imo yalionaika icine cine ilyo umushili wa bungwike. Amakomiti yane ayalolekesha pa kwafwilisha abaponenwe na masanso ayo bapangile mu Baguio, mu Cauayan, mu Laoag, na mu Tuguegarao, yaleafwa aba bwananyina abaponenwe no busanso mu fyo bakabila lwa ku mubili, yalebakoselesha no kubafwa ukupalama kuli Lesa. Mu nshiku shikonkelepo, umo uwa muli Komiti ya Musambo akayatandalila aba bwananyina no kubakoselesha.

Hong Kong: Ici cikuuku ca mwela calisansa umusumba wa Hong Kong pa 16 September, 2018. Calionaulako panono amaofeshi ya musambo ne fikuulwa ifyo ababombela pa Bethel bekalamo. Amayanda yabili aya ba Nte yalionaika sana. Ing’anda imo yalionaika ilyo icimuti caponenepo kabili imbi umwela walifimbula umutenge wa ng’anda. Amayanda yambi yalionaka ku menshi. Komiti iilolekesha pa baponenwa na masanso mu Hong Kong ilesakamana aba bwananyina mu fyo balekabila.

Tulepepelako bamunyinefwe na bankashi abaponenwe no bu ubusanso. Naciwama ukuti ababwananyina balesakamana bamunyinefwe abali na mafya. Ifilecitika filelanga ukuti twalikatana na bamunyinefwe ne nkashi mwi sonde lyonse, kabili ili lipaalo ilyo Yehova atupeela.—Amapinda 17:17.