Pali Cisano icungulo, pa 16, November 2018, bakapokola 200 abafumine ku Russia’s Federal Security Service (FSB) baingile mu mayanda ya Nte sha kwa Yehova mu Crimea no kubasansa.

Bakapokola abali ne mfuti kabili abafwele ifya kucinga pa menso balitiinishe ba Nte no bacusha. Ici calengele ba Nte babili umulopa walabutukisha kabili balibabutushiishe ku cipatala. Tuli no bulanda nga nshi ukumwishibisha ukuti nkashi umo umwana alifwila mu mala.

Ilyo baleingila mu mayanda ya ba Nte, bakapokola balicenene ba Aleksandr Ursu abali ne myaka 78. Balibasunkile no kubashintilisha ku cibumba, e lyo babasunkila pa nshi no kubakaka inshimbi ku minwe. Na kabili ba Nte abengi balibepusha sana kuli bakapokola.

Pali ino nshita ni munyinefwe Sergey Filatov fye (abali mu cikope ku kulyo) eo bapeele umulandu. Abalashi ba buteko bamupeele umulandu uwaba mu cipande 282.2, ulubali 1, mu Lupapulo lwa Russia’s Criminal Code, ifunde ilyo ubuteko bwa Russia bulefwaya abekala ku Crimea ukulakonka. Uyu munyinefwe uuli ne myaka 47 kabili uwakwata abana bane, e Nte uo babalilapo ukupeela umulandu ukubomfya amafunde ya buteko bwa Russia ayalanda pa kufwaya ukwimina ubuteko.

Nangu ca kuti bamunyinefwe nabasakamana pa fyo bakapokola baleingila mu mayanda no kucusha ba Nte, tulelolesha kuli Lesa wesu, Yehova ukutukosha muli shino inshiku ishayafya kabili ishakulekelesha.—Esaya 41:10.