MU NEW YORK, Ba Nte baleyafwa abasanshilwe ne cikuuku ca mwela ne mfula ico baleita ukuti Irma na Maria, icaonawile ifitungu fyaba mu Caribbean na lwa mupepi mu September 2017. Ifyebo fyakonkapo ififumine ku maofeshi ya Nte sha kwa Yehova mu Barbados, Cuba, Dominican Republic, France, na mu United States fyalalondolola bwino ifyo bamunyinefwe baleyafwa abaponenenwe na masanso.

Amakomiti yatatu ayasakamana abaponenwe na masanso (DRCs), ukubikako fye na komiti imo iyapangilwe kwi ofeshi lya musambo ilya ku France, balebombela pamo ukupekanya bamunyinefwe na bankashi abengafwa bakasabankanya abaponenwe no busanso. Indalama ishikafwaikwa pa kuti bakakuule cipya cipya ifikuulwa fyaonaike mu ncende iofeshi lya musambo mu Barbados lisakamana madola ya ku America 2.4 milioni kabili bakawamya na Mayanda ya Bufumu 8 ayaonaike na mayanda ya bamunyinefwe 122. Amayanda na yambi 19 bakayakuula fye cipya cipya.

Iofeshi lya musambo lyatile bakasabankanya abaponenwe no bu ubusanso balefwaya sana ukubafwilisha. Abeminishi ba kwi ofeshi lya musambo baleya ku kubakoselesha.

Amakomiti yatatu aya DRCs yalipekenye ifya kwafwa bakasabankanya 57 abaponenwe no ubu busanso. Bamunyinefwe na bankanshi balisangwilako ifya kulya, amenshi, ifya kufwala, e lyo ne fintu fimbi. Ilyo umweshi wa October walepwa, bonse abo amayanda yaonaike balibawamishe, kabili ababombele sana ni bamunyinefwe aba muli ici calo abaitemenwe ukwafwa.

Iofeshi lya musambo lyalipangile amakomiti yatatu aya kulolekesha pa kwafwalisha abaponenwe na masanso pa cishi ca St. Martin, e lyo na pa cishi ca Guadeloupe, kabili indalama ishilefwayaikwa pa kwafwa madola 1.4 milioni. Pa milimo iilingile ukubombwa pali no kuwamya Amayanda ya Bufumu 12 ayaonaike mu Guadeloupe na yabili ayaonaike mu St. Martin e lyo na mayanda ya bamunyinefwe 24. Bamunyinefwe 22 ababomba mu makuule mu France, Guadeloupe, na mu Martinique e bakabombako muli uyu mulimo wa kwafwa aba bwananyina.

Bakasabankanya ukucila pali 13,000 e baponenwe no busanso bwa cikuuku ca mwela. Pali ino nshita, balipanga amakomiti yane ayaleyafwilisha bamunyinefwe na bankashi abaponenwe no busanso kabili nabapwishako ulubali lwa kubalilapo, apali no kuwamya ifipe ifyaonaike ifya bamunyinefwe no kubapeela ifya kulya na menshi. Bacili balebomba uyu mulimo mu Puerto Rico na mu British and U.S. Virgin Islands.

Abamakuule 690, abali 450 baleya kukwafwilisha ku fishi e lyo 240 baleya ku Florida na ku Georgia, bakaya mu kuwamya Amayanda ya Bufumu ayaonaike e lyo na mayanda ya ba bwabanyina. Indalama shikaposwapo pa kuti umulimo wa kwafwilisha abaponenwe na masanso ukapwe madola ukucila pali 30 milioni kabili bakashibomfya ku kuwamya ifyaonaike ku fintu fyakonkapo:

• Ku British and U.S. Virgin Islands – Amayanda ya Bufumu 5, na mayanda 190

• Ku Florida – Amayanda ya Bufumu 40, amayanda 1,174

• Ku Puerto Rico – Amayanda ya Bufumu 106, Ifikuulwa fya Kulonganinamo Ukulongana ku Kalamba fibili na mayanda 1,216

• Ku Turks and Caicos – Amayanda ya Bufumu yabili, amayanda 56

Tulepepa ukuti Yehova alakosha amaboko ya baleyafwa abaponenwe na masanso. Tatuletwishika ukuti uyu mulimo balebomba, ne fyo balebakoselesha ukubomfya Baibolo, fyalayafwa aba aba bwananyina ukukosa no kutwalilila ukubombela Lesa wesu Yehova.—Nehemia 2:18.

Abo Bakalemba we Lyashi Bengatumina:

International: David A. Semonian, Office of Public Information, +1-845-524-3000

Barbados: John Medford, +1-246-438-0655

Dominican Republic: Josué Féliz, +1-809-595-4007

France: Guy Canonici, +33-2-32-25-55-55