MU ROME—Pali Cisano, pa 24 November, 2017, abasambilila ifya cipatala ne fya mafunde balikumana pa universiti ya Padua, iyi e universiti iyo bakulile kale sana mu Italy, balikumene ku kulanshanya ilyashi ilyakwete umutwe waleti: “Abalwele Abalekaana Ukubabikamo Umulopa: Inshila Imbi iya Kubondapilamo?—Ukukanabomfya Sana Umulopa 2017.” Abaliko kuli uku ukukumana tubungwe twaba sayantisti abena Italy 25 e lyo ne cipani icilolekesha pa bumi mu Italy.

Ukubika umulopa mu mulwele e nshila iyo babomfya pa myaka iingi iyo bamona ukuti ilabomba bwino kabili ilapususha ubumi bwa mulwele uo balelepula nelyo uulwele ubulwele ubukalamba. Nomba ilyo kwali uku kukumana abengi balikeene iyi nshila babomfya pa myaka iingi. Pali bakalapashi abaliko pali na ba Dokota Luca P. Weltert, badokota abondapa amalwele ya ku mutima, mu cifuba na kuli bapwapwa ababomba pa cipatala ca European Hospital mu Rome batile: “Natumona lelo ukuti ukubika umulopa mu mulwele kuti kwalenga ubumi bwakwe bwabipilako kabili inshita iingi no mulopa taukabilwa pa kundapa.”

Ba Dokota Weltert e lyo na badokota bambi abaliko balisumine ifi pa mulandu ne fyo baimwena ilyo baleundapa abalwele e lyo na pa bushininkisho ubo basayantisti basanga ukuti paliba ukwampana pa kubika umulopa mu mulwele no kufula kwa malwele, abantu abalefwa, e lyo no kukokola mu cipatala umuntu nga alwala e lyo na mafya yambi ayesako umuntu nga bamubikamo umulopa. *

Ubushininkisho ubo basayantisti basanga, ukubikapo na mafya ayesako nga babika umuntu umulopa kwalilenga akabungwe akalolekesha pa bumi mwi sonde lyonse aka World Health Organization (WHO) mu 2010 kafwaye inshila iisuma iya kulabomfeshamo bwino umulopa wa mulwele iyo beta ukuti PBM, e kutila inshila ya kundapilamo abalwele ukubomfya inshila ishalekanalekana no kubika amano ku fingafwa ukuwamyako ubumi bwa mulwele no kumucingilila, ukulaundapa bwino abalwele abalekabila ukubalepula no kuleka ukubika sana abantu umulopa. Aka akabungwe kaliyeba ifyalo fyonse 193 ifyaba muli aka kabungwe ukulabomfya ishi nshila sha kundapilamo.

Profesa Stefania Vaglio, umukalamba we bumba ililolekesha pa kubika umulopa mu balwele pa cipatala ca Sant’Andrea University Hospital mu Rome, alilandile sana pa fyo ababomfi ba mu fipatala bamona iyi nshila inshila iisuma iya kulabomfeshamo bwino umulopa wa mulwele, atile kale pa kundapa umulwele balebika amano ku kusunga umulopa wa bantu bambi no kuubika mu balwele, nomba ino nshita “babika sana amano ku kubomfya umulopa wa mulwele umwine.” Ico babikilako iyi nshila ya kundapilamo ni pa kuti “balecefyako umulopa uufuma pa kundapa umulwele ukupitila mu kubomfya umulopa wa mulwele umwine, . . . ukubika sana mano ku fingafwa pa kuti umulopa wa mulwele tauleonaika.” Profesa Vaglio na o alilondolwele bwino bwino ukuti ukubomfya umulopa wa mulwele umwine “kulafwa ukundapa bwino umuntu.”

Dokota Tommaso Campagnaro, uwasambilila ifya kulepula uubomba pa cipatala ca Verona University Hospital, na o alilandile pa busuma bwaba mu kubomfya inshila ishalekanalekana pa kuti tababikile umulopa mu mulwele. Pa numa ya kupwisha ukupituluka mu fyebo ifyo balemba ukutula mu kupwa kwa ba1990 umo baleundapa abalwele ukupitila mu kubalepula pa mulandu na mafya ya mumala kabili abo imyundapilwe ishayangwike, basondolwele ukuti: “Abalwele abo bashabikilemo umulopa tabalekwata amafya ayengi kabili banono fye abafwile ukucila abo babikilemo umulopa.”

Dokota Campagnaro, e lyo na bambi abalandilepo pali uku ukukumana, balitashishe Inte sha kwa Yehova pa fyo balengele badokota ukusangako inshila imbi iya kundapilamo ukwabula ukubomfya umulopa. Ba Anna Aprile, abasambilisha amafunde ya kuma ifya myundapile pa universiti ya Padua, batile: “Tuletasha Inte sha kwa Yehova abakaana ukubabikamo umulopa, icalengele abengi balatontonkanya pali iyi myundapile no kucitapo fimo pa kuti baleundapa abalwele ukwabula ukubomfya umulopa uwingi.”

Abalelanda pali uku ukukumana ni badokota balekanalekana, pamo nga badokota basambilila pa miti ya kulalikisha umuntu ilyo balemubombela, badokota ababombela pa malwele ya ku mutima, badokota ababombela pa malwele yakwata abanakashi, badokota abasambilila pa fya mulopa, badokota ababombela pali fimumena, e lyo na badokota ababombela pa malwele ya mafupa e lyo ne mishipa. Nangu ca kuti abalelandapo balebomba imilimo yalekanalekana, bonse balelanda fye pa cintu cimo: Aba mu fipatala e lyo no tubungwe twa mu fipatala, abapanga amafunde ya calo, e lyo na bantu bonse balingile ukulabomfya iyi nshila ya kundapilamo iya PBM ukulingana ne fyebo basanga e lyo ne fyo badokota ababombela pa balwele basanga.

Dokota Weltert atile: “Ukulepula umutima wa muntu yaba pa myundapilwe iyaafya sana ukubombelapo mu mubili wa muntu. . . . Nga ca kutila [kuti mwalepula ku mutima wa muntu] ukwabula ukumubikamo umulopa, ninshi takuli ico twingafililwa ukundapa umulwele ukwabula umulopa.”