Pa 23 May 2024, ifyo bapingwile ukuti umuntu alikwata insambu shakukaana ukwingila ubushilika pa mulandu ne fyo asuminamo mu Kazakhstan fyalitendeka ukubomba. Bapingwile ifi ilyo balebombela pa mulandu wa kwa Munyinefwe Daniil Smal uwa myaka 20, kabili kapingula alandile ukuti umulandu wa kwa munyinefwe wali “uukalamba sana.”

Ba Daniil balibetile ukuya kwi ofesi lya bashilika pa 17 May, 2023 ninshi kucili umwaka umo. Balilondolwele ifyo basuminamo mu mucinshi. Abashilika balimwene na amapepala ayalelangilila ukuti ba Daniil balisuminishiwa ukukaana ukwingila ubushilika pa mulandu ne fyo basuminamo. Na lyo line, abakalamba ba bashilika balikeene ukusuminisha ba Daniil ukukanaingila ubushilika. Ubushiku bwakonkelepo, bakapokola bapatikishe ba Daniil ukunina treni iyaleya ku ncende ukwaleikala abashilika apalepele amakilomita nalimo 2,000 ukufuma ku Rudny ukwaleikala ba Daniil. Ilyo baali kuli iyi ncende, ba Daniil balitwalilile ukuba ne cishinka kuli Yehova pali iyi nshita iyali iya-afya, tabaleibika mu milandu ya calo, tabalelapako imilapo ya kwingililapo ubushilika, tabalefwalako ifya kufwala fya bashilika, nelyo fye ukucitako ifyo abashilika balecita. Nangu ca kuti balyeseshe ukulanda na balekanalekana pa kuti babafwe, tapali nangu cimo icalecitika, ici calengele ba Daniil batwale umulandu ku cilye icali ku calo bafumine pantu balemona ukuti bena kuti babafwa. Ici calengele batendeke ukulubulula umulandu wabo kabili balubulwile pa myeshi itatu.

Mpaka pa 9 November 2023, e lyo icilye ca Military Court of the Almaty Garrison capingwile ukuti, filya batwele ba Daniil ku bushilika e lyo ninshi abene tabalefwaya fyalipusene na mafunde. Icilye calandile ukuti: “Ba Daniil balibapatikishe ukuti baye bengile ubushilika e lyo ninshi ukulingana ne fyo abene balondolwele, tabalefwaya ukwingila ubushilika pa mulandu ne fyo basuminamo. Kanshi filya balebapatikisha ukwingila ubushilika, balebekala pa nsambu sha kuisalila ukucita ifyo kampingu yabo yalebeba na pa nsambu sha kupepa.” Icilye calandile no kuti bafumye ba Daniil ku cifulo ca bashilika uko babasungile pa myeshi 6.

Papitile fye inshita iinono ukutula apo icilye capingwilile uyu mulandu, abakalamba ba bashilika balombele icilye ukuti calule ifyo capingwile. Na lyo line pa 16 April 2024, icilye cikalamba ica Military Court of the Republic of Kazakhstan calisuminisheko ku fyo bapwingwile uyu mulandu ku cilye ca kubalilapo. Ala naciwama pantu ifi icilye capingwile fyalitendeke ukubomba pa 23 May 2024, kabili tule-enekela ukuti ifi icilye capingwile fikalenga amafunde mu fyalo ifingi ukubikako fye na mafunde ya mu calo ca Kazakhstan, yakalesuminisha abantu ukubomfya insambu bakwata isha kucita ifintu ukulingana ne fyo kampingu yabo ilebeba. Icilye calandile ukuti: “Icalo tacakwata insambu sha kupatikisha umuntu ukulacita ifyo kampingu yakwe ilemukaanya ukucita nangu fye panono.”

Uyu e muku wa kubalilapo icilye ca mu Kazakhstan capingwile ukwabula ukupita na mu mbali ukuti umuntu alikwata insambu sha kukaana ukwingila ubushilika ukulingana ne fyo asuminamo. Munyinefwe Lev Gladyshev, uulandilako Inte sha kwa Yehova mu Kazakhstan, alandile ukuti: “Natutemwa sana ifi icilye calenga caishibikwa ukuti Daniil alikwata insambu sha kukaana ukwingila ubushilika pa mulandu na kampingu yakwe. Ifi icilye cipingwile fya kulalenga ne filye fimbi filebika sana amano ku kucingilila insambu sha bantu isha kuisalila mu Kazakhstan na mu Central Asia.”—1 Timote 2:1, 2.