Komiti ya kabungwe akalolekesha pa nsambu sha bantu aka UN Human Rights Committee naibombelapo bwangu pali kalata ba Teymur Akhmedov balembele pa 3 January, 2018. Balibabika mu cifungo mupepi no mwaka umo, ba Akhmedov bali ne myaka 61 kabili balilwala. Apo ifilye fya mu Kazakhstan fyalikaana ukukutika ku mulandu wabo kabili fyalisuminisha ukuti ba Akhmedov balikwata umulandu wa kubomba imilimo ya fya mapepo iyishasuminishiwa, ba Akhmedov batwele umulandu wabo kuli iyi komiti ukuti ibafwe.

Muli kalata balembele pa 9 January, 2018, komiti yaebele ubuteko bwa Kazakhstan ukubika amano ku filecitikila ba Akhmedov, ilyo iyi komiti ishilabombela pali kalata babalembele. Yaebele abalashi “ukushininkisha ukuti ba Akhmedov babondapa bwino kabili imikalile yabo mu cifungo yalingana [ne fyaba mu cipangano ca International Covenant on Civil and Political Rights] ne fyo ifyalo fyonse fikonka.” Na kabili kalata yatile abalalashi “bafumye ba Akhmedov mu cifungo, pantu ubumi bwabo tabuli bwino nelyo babakakile ku ng’anda ilyo balelolela icasuko ukufuma kuli komiti.”

Ifi komiti yalandile ukuti e fyo buteko bucite ilyo balelolela icasuko ku mulandu wa ba Akhmedov e fyo ne cipani iciilolekesha pa kubika umuntu mu cifungo ukwabula ukumulubulwisha ica UN Working Group on Arbitrary Detention calandile. Mu October 2017, ici cipani calipitulwike mu fyo ba Akhmedov bailishinye kabili catile ifi ba Akhmedov bababikile mu cifungo ukwabula ukubalubulwisha, abalashi balingile ukubafumya no kubalipila pa kubacusha ba bacusha. Ukufika ino nshita, ubuteko bwa Kazakhstan tabwacita ifyo ici cipani calanda. Ba Akhmedov na bekala mu cifungo mupepi no mwaka umo pa myaka 5 iyo babapingula.