Pa 2 April 2018, kateka wa calo ca Kazakhstan, Nursultan Nazarbayev alibelela uluse ba Teymur Akhmedov abali ne myaka 61 abo bakakile ukucila pa mwaka umo pa milandu ya kubabepesha fye. Ifi ba babelele uluse, balifuuta no mulandu onse. Ba Akhmedov baishibe ukuti na ba babelela uluse pa 4 April kabili babafumishe ninshi bali ku cipatala uko balebasungila pa numa ya kubalepula. Nomba bali pamo no lupwa lwabo kabili kuti cabangukila ukuya ku cipatala no kundapwa ku bulwele bwa kansa ubo balwala.

Ba Akhmedov ni Nte ya kwa Yehova, babekete no kubakaka pa 18 January 2017 pa mulandu fye wakwebako abantu bambi ifyo basuminamo. Pa myeshi iingi ilyo bashilabekata, balelanshanyako na baume bamo abalemoneka kwati balefwaya ukwishiba ifyo Inte sha kwa Yehova basuminamo. Aba baume balebomba na bakapokola ba mu Kazakhstan, National Security Committee (KNB), kabili balekopa ifyo balelanshanya nabo. Pa mulandu ne fyo bakopele, bakapokola balikete ba Akhmedov no kubapeela umulandu wa “kulenga abantu balakansanina pa fya mapepo” no ‘kulaimona ukuti imipepele yabo yalicindamapo’ ukulingana ne Cipande ca mu lupapulo lwa mafunde ya calo ca Kazakhstan (Article 174(2) of Kazakhstan’s Criminal Code).

Ilyo ba Akhmedov babekete, balebepukisha kuli bakapokola kabili pa myeshi itatu bababikile mu cifungo ukwabula no kubalubulwisha. Pa 2 May 2017, icilye cabapingwile ukukakwa pa myaka 5 kabili balibakeenye no kulalanda na bantu pa fyo basuminamo pa myaka itatu.

Baloya ba ba Akhmedov balitwele umulandu ku filye ifyalekanalekana lelo fyonse fyalekaana ukukutika ku mulandu wabo. Pa numa batwele umulandu ku cilye ica fyalo ukuti babafwe. Balembele kalata ya kuilishanya ku cipani icilolekesha pa kubika umuntu mu cifungo ukwabula ukumulubulwisha ica UN Working Group on Arbitrary Detention (WGAD) na kuli komiti iilolekesha pa nsambu sha bantu iya UN Human Rights Committee.

Mu October 2017, icipani ca WGAD calikalipile ubuteko bwa Kazakhstan pa fyo bwakakile ba Akhmedov kabili calandile ukuti ubuteko bubafumye mu cifungo ilyo line fye, pantu ifyo ba Akhmedov bacitile “tafyaleleta ifimfulunganya mu calo kabili fyalilingene no buntungwa bwa kupepa ubo umuntu akwata.” Mu January 2018, komiti ya Human Rights Committee yalipitulwike muli kalata ya ba Akhmedov kabili yaebele ubuteko bwa Kazakhstan ukushininkisha ukuti ba Akhmedov bwangu bwangu babatwale ku cipatala ku kundapwa. Komiti yalandile no kuti, ubuteko bubafumye mu cifungo ilyo balelola ifyo bali no kupingula pa mulandu batwele kuli iyi komiti.

Ilyo ba Akhmedov bali mu cifungo ubulwele bwaile bulekoselako fye. Ku kutampa kwa uno mwaka, badokota babebele ukuti balikwata kansa ya mu mala kabili yalesalanganinako fye. Pa mulandu ne fyo komiti ya kabungwe akalolekesha pa nsambu sha bantu aka Human Rights Committee yalandile e lyo ne fyo utubungwe tumbi twalandile, abalashi ba buteko bwa Kazakhstan baebele ba Akhmedov ukulemba kalata kuli kateka wa calo Nazarbayev, no kulomba ukuti ababelele uluse.

Balilembele kalata pa 5 March 2018, kabili balombele ukuti balolekeshepo pali kalata yabo bwangu bwangu, apo balekabila ukuya ku cipatala ku kundwapwa pa kuti kansa isalangana ukucila mu cipimo. Ilyo balelolela icasuko, abalashi ba cifungo balitwele ba Akhmedov ku cipatala ca mu musumba wa Almaty mu Kazakhstan, uko bailebalepwila pa 27 March 2018.

Ba Akhmedov na bena mwabo ba Mafiza na bana babo bali ne nsansa ukuti ubu bwafya bwapwa. Na kabili na batasha sana Kateka Nazarbayev pa kufuuta umulandu wabo. Pa mulandu wa kuti balibakakile, ubuteko bwalibapokele amaakaunti ya ku banki kabili ici calilengele ulupwa lwabo lulecula ilyo bali mu cifungo.

Inte sha kwa Yehova isonde fye lyonse balesubila ukuti ifi ba Akhmedov bababelele uluse, abalashi ba buteko bwa Kazakhstan bakapeelelapo ba Nte ubuntungwa bwa kupepa.

Icipepala ico ba Akhmedov bekete mu cikope cili pa muulu, pali amashiwi ayalelanda ukuti balibafumya mu cifungo “ilyo kateka wa calo ca Kazakhstan afumishe icipope pa 2 April 2018, No. 656, balibeleela, balibapeela ubuntungwa kabili balifuuta ne milandu babapeele.”