Balupwa ne fibusa fya ba Teymur Akhmedov nabasakamana sana pa bumi bwa ba Akhmedov, Inte ya kwa Yehova abali ne myaka 61. Ba Akhmedov balibasangile no bulwele ubukalamba umwaka umo ilyo bashilababika mu cifungo. Pa 8 February, 2018, balibatwele ku cipatala uko bailebalepula no kufumya fimumena fibili, cimo calikulile sana. Balupwa na baloya babo balepapata abalashi ukubafumya mu cifungo, balesakamana pa fyo imikalile yaba mu cifungo ca mu Pavlodar e lyo na pa myundapilwe yabo pantu balekabila ukubondapa na kabili. Ukufika na ino nshita tapali ifyo abalashi balecita.

Ifilye fya mu Kazakhstan fyapingwile ba Teymur Akhmedov ukwikala mu cifungo imyaka 5, bakabafumya mu 2022. Ba Akhmedov babomfeshe fye ubuntungwa bwabo ubwa kupepa, e calengele babekate no kubacusha ku balashi. Balibika ne shina lyabo pa mutande wa bantu abo balingile ukwisalila akaunti ya ku banki pa mulandu wa kuti babamona ukuti kapondo. Ifilye fya mu Kazakhstan nabakaana ukukutika ku mulandu wabo.

Icipani icilolekesha pa nsambu sha bantu ica UN Working Group on Arbitrary Detention calilandile ifyo calemona umulandu ku buteko bwa Kazakhstan, caebele abalashi ba buteko ukufumya ba Akhmedov mu cifungo no kufuuta imilandu babapeela. Akabungwe ka UN Human Rights Committee kaebele ubuteko ukubafumya mu cifungo pa mulandu wa kuti balwele.

Baloya ba ba Akhmedov batile: “Ba Teymur abo bakaka pa mulandu wa lufyengo, abalwele kabili abalekabila ukundapwa, balefwaya umulinganya. Ifi fine e fyo ifipani fya kabungwe ka UN kalandile, na ifwe tulelomba ukuti abalashi ba buteko balangulukileko ba Teymur no kubafumya mu cifungo bwangu bwangu.”