Munyinefwe Rinat Kiramov balimwikete mu April 2023 kabili bamupingwile ukuba mu cifungo pa myaka 7. Ilyo papitile umwaka umo ukutula apo bamwikatile, ukwabula ukwenekela pa 18 April 2024 bakapokola bamukuushishe ku cifungo cimbi uko bondapa abafungwa. Bakapokola balandile ukuti baletunganya ukuti ba Rinat nalimo balikwete ubulwele bwa TB. Ilyo papitile inshiku shibili ukutula apo bafikile, ibumba lya bafungwa lyatendeke ukwipukishisha ba Rinat. Abafungwa balefwaya ba Rinat basokolole ifyebo fimo pa Nte sha kwa Yehova abaleikala mu musumba wa Akhtubinsk. Ilyo ba Rinat bakeene, balitendeke ukubacusha sana. Pa nshiku 4, balebacusha sana mu nshila ishalekanalekana, baleboma, kabili balebomfya ne cintu ico balebika ku malaiti pa kuboca. Kabili aba bafungwa tabalesuminisha ba Rinat ukulaala, ukwikala nelyo fye ukusamba, kabili balebeba ukwiminina akasuba konse no bushiku ukwabula ukwikalapo. Ba Rinat balebasuminisha fye ukulya umuku umo cila bushiku.

Ilyo papitile inshiku ishingi ukutula apo batendekele ukubacusha sana, ba Galina abena mwabo balibatandalile. Balipapile sana ilyo bamwene ifyo ba Rinat balemoneka ku menso, pantu kwali ifilonda sana, balefilwa ukwenda bwino kabili amaboko yaletutuma fye. Ilyo ba Rinat balondolwelele ba Galina ifyacitike, ba Galina balyebele loya wa ba Rinat ifyalecitika. Lyena loya alombele ukuti batwale ba Rinat ku cipatala kabili batendeke no kufwailisha ifyacitike pa kuti bakwate ifilonda.

Ilyo aba mwi iofesi lya bashicilye baishibe, balikumene na ba Rinat kabili bapekenye ukuti babatwale ku cipatala. Ilyo basangile ifishinka ifyalelanga ukuti ca cine bafungwa banabo e babacenene, balitwele umulandu ku cipani ca Ministry of Internal Affairs pa kuti baye bapitulukemo. Kabili basangile ukuti ba Rinat tabalwele ubulwele bwa TB, lyena balibabwekeshe ku cifungo uko bali pa kubala pa 17 May 2024 kabili uku kwine eko bali pali ino nshita.

Ba Rinat baebele ba Galina ifyabafwile ukushipikisha, batile: “Ico nalecita fye kupepa no kulaesha ukwibukisha amalembo yamo aya mu Baibo. Tapali nangu umo uwali no kundesha ukucita ifi. Caliwame filya nalebelenga sana Baibo ilyo bashilankaka pantu calengele ndeibukisha amalembo ayengi.” Ba Rinat balandile no kuti: “Kwaliba abantu abengi abashipikishapo ilyo balebacusha pa mulandu ne fyo basuminamo aba kuti no mupashi wa kwa Yehova taubafwa. Lelo ine Yehova alempeela umupashi wakwe pa kuti ndeshipikisha. Naletontonkanya nati: ‘Ino e nshita ningalanga sana Yehova ukuti nalimutemwa nga natwalilila ukuba uwa cishinka. Nkatwalilila fye ukushipikisha.’”

Nangu ca kuti natumfwa ubulanda pa fyo balecusha ba Rinat, natutemwa ukwishiba ukuti Yehova lyonse akulatupeela “amaka yacila aya bantunse” pa kuti tuleshipikisha.—2 Abena Korinti 4:7.