Uyu mweshi wapwile, abalashi ba buteko bwa Russia balisokwete mu mayanda ya Nte sha kwa Yehova no kubakaka, kabili ilyo balecita ifi baleti balefwaya ukupwisha ifipondo ifilwisha ubuteko. Bakapokola balingilile ba Nte mu mayanda yabo mu Birobidzhan, mu Khabarovsk, mu Magadan, mu Orenburg, mu Naberezhnye Chelny, mu Perm, mu Pskov, mu Saratov, na mu Tomsk. Balikete ba Nte na bambi 15 ukulunda pali 5 abo baikata kale. Kanshi ba Nte abo bakaka ukwabula ukubalubulwisha pali ino nshita bali 20. Ba Nte bambi babili babeba ukuti tabafwile ukulafuma pa ng’anda. Na kabili, ba Nte ukucila pali 15, ukubikako fye na bali ne myaka ukucila pali 70 na 80, balibasainisha icipepala ca kubakaanya ukufuma uko bekala. Ilyo ubushiku bwa pa 14 June 2018 bwalefika, ninshi abalashi ba mu Russia balibepesha ba Nte ukucila pali 40 ukuti fipondo ifilwisha ubuteko. Nga ca kuti icilye na co casumina ifyo abalashi balanda, aba ba Nte kuti babakaka imyaka ukufika na kuli 10.

Ubuteko bwa calo ca Russia tabukonka ifyo bwalandile mu cilye ukutila nangu ca kuti bwaisala akabungwe kalembeshiwa mwi funde aka Nte sha kwa Yehova, tabwakulakaanya ba Nte ukupepa. Ubuteko bwa Russia bulabomfya ifunde lyaba mu cipande 282 ica lupapulo lutila Criminal Code pa kuti balepeela Inte sha kwa Yehova umulandu wa kutungulula akabungwe ka fipondo ifilwisha ubuteko nelyo uwa kusangula indalama sha kwafwilisha aka kabungwe. Nomba mu nshita ya kulwisha ifipondo ifilwisha ubuteko, abalashi ba buteko bwa Russia balacusha abekala calo abapepa Lesa mu mutende.

Pa 12 June mu 2018 ku Saratov. Bakapokola balisokwete mu mayanda ya ba Nte ayengi kabili balisendele ba Nte ukucila pali 10 ku kapokola mu kubalubulwisha. Ilyo balesokota mu ng’anda imo, abalashi ba buteko balibikilemo impapulo sha mapepo isho babinda kale ku filye fya mu Russia. Ba Nte abaume 5 balibakakile. Ilyo papitile inshita balikakwilepo ba Nte babili, lelo batatu tababakakwile kabili babili pali aba balibapeele umulandu wa kutungulula akabungwe ka fipondo ifilwisha ubuteko. Abo bapeele uyu umulandu ni ba Konstantin Bazhenov na ba Felix Makhammadiev. Ba Aleksey Budenchuk nabo bali pali balya batatu abo bashafumishe lelo umulandu babapeele tatulawishiba. Pa 14 June mu 2018, icilye ca Frunzenskiy District Court icaba mu musumba wa Saratov capingwile ukuti ba Bazhenov na ba Makhammadiev bababike mu cifungo ukwabula ukubalubulwisha ukufika pa 12 August mu 2018. Ici cine icilye capingwile no kuti ba Budenchuk bababike mu cifungo ukwabula ukubalubulwisha kabili tabalandile ubushiku bakafuma. Pa nshita imbi, ba kapokola balipatikishe Nte umbi ukusaina icipepala ca kulanda ukuti takulafuma mu musumba ekala.

Pa 3 June mu 2018 mu Tomsk. Ku ma 10 koloko ya lucelo, bakapokola na ba mu kabungwe ka mu Russia aka Special Military Force (Spetsnaz) balisokwete mu mayanda ya Nte sha kwa Yehova yabili mu musumba wa Tomsk uwa mu Siberia. Ilyo bacitile ifi, balisendele ba Nte 30, ukubikako fye na banakulubantu abaali ne myaka 83. Na kabili bakapokola balipokele ifipe ifyali mu ng’anda e lyo ne fyali mu mamotoka, lyena balibikile ba Nte mu mamotoka ayo bakapokola baishile nayo no kubatwala uko batwala ifipondo ifilwisha ubuteko mu kulubulula uko beta ukuti Center for Counteracting Extremism.

Ilyo bali ukwa kulubulwila, abalubulwisha no kucusha abantu ba Ivan Vedrentsev, ba Aleksandr Ivanov, na ba Vyacheslav Lebedev balilubulwishe no kucusha ba Nte ukufika 02:00 ubushiku bwakonkelepo. Abalelubulwisha ba Nte balyebele Nte umo ukuti bakamutamfya incito. Ilyo balebalubulwisha no kubacusha, baleleta na mamotoka umwa kusendela ba Nte abengalwala ilyo balebacusha pa kuti babatwale ku cipatala, kabili Nte umo alilwele ica kuti ilyo bamutwele ku cipatala baile muteka.

Bamo pa bo basendele ni ba Sergey Klimov, kabili bena balibakakile. Pa 5 June mu 2018, aba mu cilye ca Oktyabrskiy District Court ica mu musumba wa Tomsk bapingwile ukuti babike ba Sergey Klimov mu cifungo ukwabula ukubalubulwisha ukufika pa 4 August mu 2018, kabili babapeele umulandu wa kutungulula ababa mu kabungwe ka fipondo ifilwisha ubuteko. Bamafumu balikene ilyo balombele ukuti babakakile pa ng’anda nelyo ukubakakila ku nse.

Pa 3 June mu 2018, mu Pskov. Bakapokola balisokwete mu mayanda ya Nte sha kwa Yehova ayengi mu musumba wa Pskov. Ilyo baingile mu ng’anda ya kwa Nte umo, balisendele fye bonse abali pa ng’anda ukubikako fye na bantu babili abashili ba Nte abaile mu kutandala. Ba Nte abengi pamo nga ba Gennadiy Shpakovsky, balibasendele ku maofeshi yakalamba aya kabungwe ka Federal Security Services (FSB) aya mu Pskov uko baile mu kubalubulwisha no kubacusha. Bamo pabo basendele balibapatikishe ukuti batendeke ukushinina ba Shpakovsky. Abalashi ba buteko balipeele ba Shpakovsky umulandu wa kutungulula akabungwe ka fipondo ifilwisha ubuteko. Nangu ca kuti balibafumishe mu kuya kwa nshita, aba mu buteko kuti babapeela imilandu inshita iili yonse.

Pa 30 May mu 2018, mu Khabarovsk. Bakapokola balikete ba Ivan Puyda pa numa ya kwingila no kusokota mu ng’anda yabo. Balibasendele ku Magadan uko bailebabika mu cifungo. Pa 1 June mu 2018, aba mu cilye ca Zheleznodorozhniy District Court bapingwile ukuti ba Ivan Puyda bababike mu cifungo ukwabula ukubalubulwisha ukufika pa 30 July mu 2018, kabili balibapeele umulandu wa kutungulula ibumba lya fipondo ifilwisha ubuteko.

Pa 30 May mu 2018 mu Magadan. Bakapokola abali ne mfuti kabili abafwele ifya kuifisa pa menso, balisokwete mu mayanda ya mu Magadan kabili balikete ba Konstantin Petrov, ba Yevgeniy Zyablov, na ba Sergey Yerkin no kubabika mu cifungo. Pa 1 June mu 2018, aba mu cilye ca Magadanskiy City Court bapingwile ukuti abo baikete bafwile ukuba mu cifungo ukwabula ukubalubulwisha ukufika pa 29 July mu 2018, kabili balibapeele umulandu wa kutungulula ibumba lya fipondo ifilwisha ubuteko.

Pa 29 May mu 2018, mu Shuya, mu Citungu ca Ivanovo. Abalashi ba buteko babikile ba Dmitriy Mikhailov mu cifungo pa muku walenga bubili. Pa numa ya kusokota mu ng’anda yabo pa 20 April, bakapokola balibapeele umulandu wa kutungulula ifipondo ifilwisha ubuteko. Pa 29 May abalashi ba buteko balibapeele no mulandu wa kupeela indalama ku kabungwe ka fipondo ifilwisha ubuteko. Pa 3 June mu 2018, aba mu cilye ca Shuya City Court bapingwile ukuti bababike mu cifungo ukwabula ukulubulula ukufika pa 19 July mu 2018.

Pa 27 May mu 2018, mu musumba wa Naberezhnye Chelny, uwaba mu calo ca mu Russia ica Republic of Tatarstan. Mu nshita ya bushiku, aba mu kabungwe ka FSB balisokwete mu mayanda 10 kabili balisendele ifyo basangile muli aya mayanda pamo nga amafoni ne fitupa fya kubomfya pa kuya ku calo cimbi. Na kabili balikete ba Ilkham Karimov, ba Konstantin Matrashov, na ba Vladimir Myakushin no kubabika mu cifungo. Pa 29 May mu 2018, aba mu cilye ca Naberezhnochelninskiy District Court bapingwile ukuti abo baikete batwalilile ukuba mu cifungo ukwabula ukulubulula ukufika pa 25 July mu 2018, kabili balibapeele umulandu wa kutungulula ibumba lya fipondo ifilwisha ubuteko e lyo no wa kwingisha abantu muli ili ibumba. Ilyo papitile inshita ba Aydar Yulmetyev na bo balibekete, kabili pa 31 May mu 2018, aba mu cilye bapingwile ukuti na bo bababike mu cifungo ukwabula ukubalubulwisha.

Pa 22 May mu 2018, mu Perm. Ilyo ba Aleksandr na ba Anna Solovyev babwelele ku Perm ukufuma ku Moldova, basangile bakapokola balebalolela pa citesheni ce shitima. Ilyo bafikile fye, balikomene ba Solovyev inshimbi, bapoka ifyo bakwete no kubatwala ku kapokola kabili abena mwabo babasendeele muli motoka imbi. Ilyo ba Solovyev bababikile mu cifungo, bakapokola balingile mu ng’anda yabo no kutendeka ukusokota kabili batendeke ukulubulwisha no kucusha abena mwabo. Pa 24 May mu 2018, aba mu cilye ca Sverdlovskiy District Court bapingwile ukuti babakakile pa ng’anda, kabili balibapeele umulandu wa kuba mwi bumba lya fipondo ifilwisha ubuteko.

Pa 17 May mu 2018, mu Birobidzhan. Bakapokola 150 e lyo na ba mu kabungwe ka FSB baliifungushenye no kwingila mu mayanda 22 aya Nte sha kwa Yehova. Bakapokola balipokele amatabuleti, amafoni e lyo ne ndalama. Muli aya amayanda bakapokola balipikite ba Nte 34 kabili balikete ba Alam Aliev no kubabika mu cifungo. Pa 18 May, aba mu cilye ca Birobidzhanskiy District Court bapingwile ukuti ba Alam Aliev bababike mu cifungo ukwabula ukubalubulwisha ukufika pa 13 July mu 2018, kabili balibapeele umulandu wa kutungulula ibumba lya fipondo ifilwisha ubuteko. Pa 25 May mu 2018, ba mafumu ba mu cilye ca Appellate Court of the Jewish Autonomous Region, ba Judge A. V. Sizova balikene ifyo icilye capingwile pa kubala kabili bapingwile ukuti tabafwile ukukaka ba Alam Aliev ilyo bashilalubulula.

Pa 16 May mu 2018, mu Orenburg. Bakapokola balingile no kusokota mu mayanda. Lyena balikete ba Nte batatu, e kutila ba Aleksandr Suvorov, ba Vladimir Kochnev, na ba Vladislav Kolbanov. Pa 18 May, aba mu cilye ca Promyshlenniy District Court bapingwile ukuti ba Kolbanov babakakile pa ng’anda kabili balibapeele umulandu wa kupeela indalama kwi bumba lya fipondo ifilwisha ubuteko. Ubushiku bwakonkelepo, aba mu cilye cimo cine bapingwile ukuti ba Aleksandr Suvorov na ba Vladimir Kochnev bababike mu cifungo ukwabula ukubalubulwisha ukufika pa 14 July mu 2018, kabili balibapeele umulandu wa kutungulula ibumba lya fipondo ifilwisha ubuteko. Na kabili abafwailisha imilandu balipatikishe ba Nte bambi 7 ukusaina ifipepala fya kubakaanya ukufuma mu musumba bekala ukufika apo bakapwishisha ukubalubulwisha.

Aba mu kabungwe ka European Union (EU) e lyo ne calo ca America balanda ukuti icalo ca Russia cilekala pa nsambu sha bantu baciko. Aba mu kabungwe ka European Union balyeba icalo ca Russia ukuti “cifwile ukulacita ifyo calaya ifyalo fyonse ukuti ca kulacindika insambu abantu bakwata isha kupepa uko balefwaya, isha maisosele ne sha kulongana.” Icalo ca America caebele icalo ca Russia ukuti “cifwile ukufumya mu cifungo bonse abo cakaka pa mulandu wa kupepa no kusumina muli fimo.”

Ba Philip Brumley, abalandilako Inte sha kwa Yehova mu cilye, balandile ukuti: “Ba Nte mwi sonde lyonse baliba sana no bulanda pa fyo bamunyinabo babacusha mu Russia. Ba Nte mu Russia balebacusha kwati ni filya balebacusha ilyo ici calo caletekwa no buteko bwa komyunisti. Ifyo ubuteko bwa calo ca Russia bulecita filelanga fye ukuti tabucindika insambu sha bantu.”

• Ba Dennis Christensen

  Bali ne myaka 45, bekala ku Oryol, bababikile mu cifungo pa 25 May mu 2017, kabili babebele ukuti bakafuma pa 1 August mu 2018.

• Ba Valentin Osadchuk

  Bali ne myaka 42, bekala ku Vladivostok, bababikile mu cifungo pa 19 April mu 2018, kabili babebele ukuti bakafuma pa 20 June mu 2018.

• Ba Viktor Trofimov

  Bali ne myaka 61, bekala ku Polyarny, bababikile mu cifungo pa 18 April mu 2018, kabili babebele ukuti bakafuma pa 11 October mu 2018.

• Ba Roman Markin

  Bali ne myaka 44, bekala ku Polyarny, bababikile mu cifungo pa 18 April mu 2018, kabili babebele ukuti bakafuma pa 11 October mu 2018.

• Ba Anatoliy Vilitkevich

  Bali ne myaka 31, bekala ku Ufa, bababikile mu cifungo pa 10 April mu 2018, kabili babebele ukuti bakafuma pa 2 July mu 2018.