Mu NEW YORK—Pali Cine pa 3 May, 2018, icilye ca Saint Petersburg City Court cikakutika ku mulandu uo Inte sha kwa Yehova batwala kuli ici cilye pa numa icilye cimbi mu Russia capingwile ukuti babapoke amaofeshi yabo ayakalamba. Nga ca kuti ici cilye cakaana ukukutika ku mulandu wabo, ninshi ubuteko bukapoka ifikuulwa bakwata ifili 14 ilyo line fye. Ifi fikuulwa ifyaba pa ncende iyaba amahekita 25, nga kufibika mu ndalama filafika amadola ya ku America nalimo amamilioni 31.8 (K345,697,800).

Pa kubala mu December 2017, icilye ca Sestroretskiy District Court tacabikile amano ku bushininkisho ubwa kuti abene ba maofeshi ya ba Nte ni ba Watch Tower Bible and Tract Society of Pennsylvania (WTPA), akabungwe akashicita amakwebo akabela ku United States. Inte sha kwa Yehova mu Russia bapeele ifikuulwa ku kabungwe ka WTPA mu 2000, kabili aka akabungwe kalalilipila imisonko isho ubuteko bwa Russia bufwaya, indalama kalipila shalifika na ku madola ya ku America nalimo amamilioni 3 (K32,613,000). Nangu ca kuti ubuteko bwa Russia bwalisumine ukuti ca cine ba Nte balipeele aka kabungwe ifi fikuulwa ukulingana ne fyo amafunde ya calo yalanda, apapitile ne myaka ukucila 17, icilye nomba catile akabungwe ka WTPA tekeene ka ifi fikuulwa. E ico icilye catile abene ba ifi fikuulwa te kabungwe ka WTPA lelo maofeshi ya Nte sha kwa Yehova mu Russia. Nomba apo cilye icikalamba ica Supreme Court calisele amaofeshi ya Nte sha kwa Yehova mu 2017, nga ca kuti ifyo icilye capa kubala capingwile umulandu wa Nte sha kwa Yehova e fyo na ici cilye cikapingula, ninshi bakakakonka ifyo icilye cikalamba capingwile kabili ubuteko bukapoka ifikuulwa fyonse ilyo line.

Bakatendeka ukukutika ku mulandu ne nshita ya 11:30, mu cilye ca Petersburg City Court, ul. Basseynaya, 6, St. Petersburg, Russia.

Abo Bakalemba we Lyashi Bengatumina:

International: David A. Semonian, Office of Public Information, +1-845-524-3000