Munyinefwe Dennis Christensen naikala inshiku ukucila pali 525 mu cifungo pa mulandu wa kucita ifyo asuminamo kabili alimonekela mu cilye mupepi ne miku 50. Icilye ca Zheleznodorozhniy District Court mu musumba wa Oryol, mu Russia, icilekutika ku mulandu waba Dennis, cikatwalilila ukukutika ku mulandu mu December. Nangu ca kuti napapita imyeshi ukucila pali 18 ukutula apo ba Dennis babakakila, balitwalilila ukulasekelela kabili baliba ne subilo. Ukwabula no kutwishika, ni Yehova e ulebatungilila kabili aleyasuka amapepo ya ba bwananyina mwi sonde lyonse aba bapepelako.

Ba Dennis balapokelela amakardi ne fikope ifyo ba Nte mu Russia na mu fyalo fimbi babalembela pa kubalanga ukuti balebatungilila. Ilyo baile ku kulubulula mu cilye pa 30 October ba Dennis baliile amakardi ne fikope fimo ifyo babatumine mu muputule we gilasi umo bababikile, pa kuti balange abaile ku cilye ku kukutika ku mulandu no kubatungilila bakoseleshiwe nga bafimona.

Te ba bwananyina fye mwi sonde lyonse abalebatungilila lelo ne fyalo fimbi na fyo filefwaya ukwishiba ifilecitika mu mulandu wa ba Dennis. Pa 21 July 2017, akabungwe kabela mu musumba wa Moscow aka Memorial Human Rights Centre kabikile ba Dennis pa bantu abo bakakila pa mulandu wa fikansa fya calo. Pa 20 June 2018, akabungwe ka Russia’s Human Rights Council kaebele bashicilye ba Prosecutor General’s Office ukufwailisha nga ca kuti calibafye bwino ukulingana na mafunde ukubika Inte sha kwa Yehova mu cifungo pa mulandu wa fyo basuminamo. Pa 26 September 2018, akabungwe ka ku calo ca United States akalolekesha pa nsambu sha kupepa aka United States Commission on International Religious Freedom kalibika ishina lya ba Dennis pa bantu “abo bakaka pa mulandu wa kucita ifyo kampingu ibeba ukulingana ne fyo basuminamo.”

Ilyo kwali ukulubulula mu cilye, ubuteko bwa Russia bwatile ifi babinda icilonganino ca Nte sha kwa Yehova tacilolele mu kuti ba Nte cila muntu babapoka insambu sha kupepa. Nomba bakapokola na balashi ba buteko tabakonka ifyo icilye calandile kabili balibomfeshe bubi bubi ifunde ilyo bafyengele no kwikata ba Dennis na ba Nte bambi abengi, no kubapeela umulandu wa kuti balefwaya ukwimina ubuteko. Uno mwaka abalashi ba buteko bwa Russia baliingila mu mayanda ya ba Nte no kubasansa pa miku iingi. Pali ino nshita, bamunyinefwe na bankashi abo bakaka bali 25, abali 18 babakakila pa ng’anda, kabili bambi ukucila pali 40 balibapokako ubuntungwa bumo. Ifyo bakapingula umulandu wa ba Dennis fikakuma ifikacitikila Inte sha kwa Yehova ukucila pali 90 mu ncende nalimo 30 ababa mu calo ca Russia abo balefwailisha ku balashi pa kuti bamone nga balicitile imilandu.

Natwishiba ukuti aba bwananyina mwi sonde fye lyonse balepepa ukuti Yehova atwalilile ukukosha no kukoselesha bamunyinefwe na bankashi abo bakaka na abo bapeela imilandu pa mulandu wa fyo basuminamo, ilyo tulelolela ubushiku ilyo Lesa akalenga “ukuti kube umulinganya” ku bantu bakwe.—Luka 18:7.